ده‌رگه‌هێ به‌ربژێركرنێ ڤه‌كرى يه!

ل ته‌ڤ جيهانێ ل وه‌لاتێن پێشكه‌فتى په‌رله‌مان ده‌زگايه‌كى هه‌رى گرنگه‌ و كارێ وێ يێ سه‌ره‌كى ده‌رێخستن و په‌سه‌ندكرنا قانوونا و چاڤدێريكرنا حكۆمه‌تێ يه‌. لێ ل وه‌لاتێن پاشكه‌فتى ته‌مامه‌ن به‌رۆڤاژى يه‌ كارێ وان چه‌وانى يا تژيكرنا به‌ريكا خوه‌ و خه‌زينێن پارتێن خوه‌يه‌! و بۆ پارتێن ب هێز و ده‌ستهلات ژى مينا دكانه‌كێ يه‌ هه‌رده‌ما زانين كاره‌ك نه‌ د به‌رژه‌وه‌ندى يا وان دا دێ ل وى ئاڤاهى ئێته‌ ئه‌نجامدان دێ خه‌به‌نكا وێ ئيننه‌ خوار وبه‌رێ په‌رله‌مانتاران دنه‌ مال! يان ئه‌و پرۆژه‌ قانوونێن ل په‌رله‌مانى هه‌ر گه‌نگه‌شه‌ ل سه‌ر نائێته‌ كرن و ئه‌گه‌ر هاته‌ كرن ژى نائێنه‌ په‌سه‌ند كرن ئه‌گه‌ر د به‌رژه‌وه‌ندى يا وان دانه‌بن. په‌رله‌مانتار ژى مينا ستێرنێ ترۆمبێلێ نه‌ د ده‌ستێن پارتێن خوه‌دا بۆ كيڤه‌ بادا دێ بۆ وێرێ دنه‌ رێ بێى هه‌ست ب به‌رپرسياره‌تى يا نوينه‌راتى يا گه‌لى بكن. ژبه‌ر كو هه‌ر وه‌كى مه‌ ل سه‌رى ئاماژه‌ پێداى د بنيات دا ژبۆ به‌رژه‌وه‌ندى يا گه‌لى و گشتى نه‌چووينه‌.

پارتێن ئوپوزسيون ژى يێن خه‌لك هنده‌ باوه‌ريێ د دتێ و ب ده‌نگێن گه‌لێ نه‌رازى دگه‌هن كورسيكێ د ناڤبه‌را چاڤ و بريان دا دێ خوه‌ ب پاره‌ فرۆشن و خوه‌ دنه‌ ل گه‌ل پارتێن زلهێز و وان هه‌مى سۆز و په‌يمانێن ب جه‌ماوه‌رێ خوه‌ داين ژبۆ كاركرنێ بۆ به‌رژه‌وه‌ندى يا گشتى ب په‌سه‌ندكرنا قانوونێن باش و چاڤدێريكرنا حكۆمه‌تێ و داخوازكرنا كه‌سانێن گه‌نده‌ل و خه‌مسار بۆ هۆلا په‌رله‌مانى ژبۆ لێپرسينێ! ب هه‌مى چاڤشۆرى خوه‌ د دنه‌ بن سيبه‌را وان پارتان! نزانم بۆ ڤه‌كرنا ده‌رگه‌هێ به‌ربژێركرنێ بۆ سه‌روكاتى يا هه‌رێمێ بكه‌نم يان ژى بگريم؟ ب وان بكه‌نم يێن د چن خوه‌ به‌ربژێر دكن و د ده‌مه‌كى دا هه‌ر تشت به‌رى هينگێ دناڤبه‌را پارتاندا ب رێكه‌فتن هاتى يه‌ ئێكلا كرن! نزانت يێ د چت شه‌رعيه‌تێ د دته‌ وى په‌رله‌مانى و وێ پرۆسێسا به‌ربژێركرنا سه‌قه‌ت!؟ يان بۆ وان پارتێن ئوپوزسيونێ بگريم يێن خوه‌ فرۆتين و وێ پرۆسێسا ديموكراسى يا هه‌لبژارتنا سه‌رۆكێ هه‌رێمێ و ده‌نگى ب لايه‌نه‌كێ دياركرى د دن كو پێشتر و به‌رى رێكه‌فتنێن ڤه‌شارتى ب هه‌مى هێزا خوه‌ ل هه‌مبه‌ر د راوستيان و قه‌بيل نه‌دكر ل سه‌ر ده‌ستهه‌لاتێ به‌رده‌وام بن و هه‌تا به‌ربژێرێن وان ژى ب كه‌سانێن نه‌ شه‌رعى و نه‌ ژ هه‌ژى د ديتن! يان هه‌ر بگريم بۆ مێشكێ وی خه‌لكێ باوه‌ر ژ وێ ديمۆكراسيه‌تێ دكت و دێ ل سه‌ر سه‌ركه‌فتنا به‌ربژێرێ خوه‌ ژى ب هه‌مى شانازى و ده‌ستكه‌فت ئاهه‌نگان گێرن!

له‌ورا ب ديتنا من هه‌لبژارتنا سه‌رۆكى ب رێكا خه‌لكى ديموكراسى تره‌ چۆنكى هه‌لبژارتنا وى ل په‌رله‌مانى, په‌رله‌مانتارێن كيژ پارتێ يان هه‌ڤپه‌يمانيێ يان رێكه‌فتنێن پێشوه‌خت پترن سه‌رۆك دێ ژ وان بسه‌ركه‌ڤت, لێ ب رێكا ده‌نگێن گه‌لى باوه‌رم گه‌له‌ك هه‌نه‌ لايه‌نگرێن پارته‌كێ نه‌ لێ به‌ربژێرێ وان ب دلى نينه‌ دێ ده‌نگى ب به‌ربژێره‌كێ دى دن چ سه‌ربخوه‌ بت يان ژ پارته‌كا دى يێ ژ هه‌ژى ده‌نگێ وى بت و بزانت دێ پتر خزمه‌تێ كت.

·         مافپەروەر

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

 

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top