زمان وەکو ئالاڤەکى دئێتە بکارئینان دناڤبەرا مرۆڤاندا ژبۆ دروستبوونا پەیوەندیان و لێکتێگەهشتنێ و بەڵاڤبوونا بیروبۆچوونان. هەڵبەت هەر گەلەک یان نەتەوەک خودان زمانەکە و مە وەکى مللەتێ کورد ژى زمانێ خۆ هەیە کو ئەوژى زمانێ کوردى یە. زمانێ کوردى د قۆناغێت سەخت و بەرتەنگدا تێپەرییە یان دەربازبوویە. هندەك جاران ژی دەرفەتێن باش بۆ زمانێ کوردى هاتینە پێش کو دشیاندا بوویە بگەهیتە گۆپیتکا پێشکەفتنێ. لێ مخابن نەشیایە مفای ژ گەشەسەندن و کارتێکرنا ئەزموونێت پێشکەفتى یێن دچەرخێ بورى (بیستێ)دا وەربگریت کو بەشەکێ کوردستانێ ژی گهورینەکا باش ب خۆڤە دیت ژ ئالیێ سیاسى ڤە و کاریگەریا خۆ ل سەر بوارین دى ژى کربوو وەکو (زانستى، کۆمەلایەتى، سیاسى) و روویەکێ جوان دابوو کوردستانێ.
د دیرۆکا نویدا ژی بزاڤەکا خورت و باش دناڤ زمانێ کوردى دا دەنگ ڤەدا د ساڵێن ناڤبەرا (1970- 1979) ژ چەرخێ بوری. تشتێ سەرنجراکیش د ڤێ قۆناغێدا ئەو پێشکەفتن و گەشەسەندنا مەزن بوو د هژمارا نڤیسکاران و ناڤەرۆکا بابەتێن واندا پەیدابووى و گهورین و پیشکەفتن ئێخستییە هزرو بێرین وان و خواندەڤاناندان. ئەڤە وەکو سەرهلدانەکێ بوو بۆ ڤەژاندنا زمانی و بەرهەمێن نڤیسینێ کو بوویە جهێ گرنکیدانا جڤاک و رەوشەنبیرێ کورد. خالا کو ل ڤێرە مە دڤێت ئەم بەحس ل سەر بکەین ئەوە کو دناڤ ڤێ رێژا زۆر یا نڤێسەراندا، ژمارەکا گەلەکا کێم ژێ هەبوون کو دئاستەکێ پێشکەفتیدا بوون و شارەزابوون دزمانى دا کو ب نڤێسینێت خۆ یێت رێکوپێک ببوونە جهێ مفا وەرگرتنا خەلکەکێ دن و ببوونە نموونەیێن بەرچاڤ کو جڤاک گەلەک تشتان ژێ فێرببیت. دبیت هۆکارێ وێ ژی نەبوونا گرنگیدانێ بیت ب وان نڤیسکاران و ب بەرهەمێن وان. لەوما ئەو دەرفەت ژ مە چوو.
ئەڤرۆکە دەرفەت و دەلیڤەکا دی بۆ مە هاتییە پێش کو نڤیسینا ب کوردی خورت و زێدە و ئازادبوویە. لێ دگەلدا ژی ئەم دووبارەبوونا ڤێ مەترسیێ ل سەر زمانی دوور نابینن هەکە خواندنەک و هەلسەگاندنەکا باش بۆ رەوشا ڤێ قۆناغێ نەهێتەکرن و مفا ژێ نەهێتە وەرگرتن. ژبەرکو گەلەک نڤیسکار و نڤیسین هەنە، لێ هێشتا نەشیانە ب باشی خزمەتا دۆزا زمانێ کوردی بکەن. لەوما پێویستە گرنگی ب نڤیسکارێن خودان سەربور و شیان و بەرهەمێن وان بهێتە دان دا ئەڤ دەرفەتە ژی ژ مە نەچیت و بشێین خزمەتا زمان و کولتوورێ خۆ بکەین ل سەر ئاستێ ناڤخۆ و ناڤدەولەتی ژی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
