جارێ یەکەم خالا دەستپێکرنا من بلا ئەڤە بێت ئەوا پارتی و ئێکەتی دکەن، ب هەموو ڕامانان بێ ڕێزی و حساب نەکرنە بۆ دەنگ و ئیرادا دەنگدەرێن خوە، پاشی دەنگدەرێن هەرێمێ ب گشتی ب درێژەکێشانا ئەڤان کۆمبوونان بێی کو چ ئەنجام بهێنە دیارکرن. دیارە پشتی چەند دەمژمێرەکان ژ هەر کۆمبوونەکێ و خوارنا چەندین کیلۆیێن مۆز و سێڤان و ڤەخارنا چەند جۆرەکێن شەربەتا گران بوها دبێژن: “مە بڕیار دا پشتی هندە ڕۆژێن دی دیسان کۆم ببن.” بێ دەنگی و بێ هەلویستییا پارتێن ئۆپۆزسیۆن یێن دناڤ پەرلەمانی ژی بەرامبەر ئەڤێ بێ ڕێزی و حسابنەکرنا ئەڤان دوو پارتان ب وەلاتییان، ب هەمان شێوازی بێڕێزی یە و خوەدی دەرنەکەتنە ل ئیرادە و باوەریپێدانا دەنگدەرێن وان بۆ وان. ئاخر ل کیژ جهێ جیهانێ هەبوویە شەش مەهان پشتی هەلبژاردن و دەنگدانان هیشتا ب ڕێژەیا ژ ۱% ژی بۆ خەلکی نەهاتییە دیارکرن؟ ئایا چارەنڤیسێ وێ حکومەتێ چ لێ هاتییە و چ وێ لێ بهێت ب دەستێن ئەڤان کۆمبوونان ڤە؟ ئەو حکومەتا بەریی شەش مەهان خەلکی ب چەندین بیر و خەیالێن جودا جودا ڤە، خەوا سبەهێ کرینە قوربانی تبل شینکرنی ژ پێخەمەت چاڤێنڕەشێن ئەڤان پارتان.
تشتەکی دی ژی هەر یەک ژ ئەڤان پارتێن من ل سەری ناڤێن وان نڤێسی ب دەهان یان، بەلکو ب سەدان شیرەتکارێن سیاسی و سەربازی و جۆگرافی و… هتد، هەبن. ئەرێ یا بەر عەقلە کەسەک ژ وان نابێژە سەرکردێن خوە ئەڤا هوون دکەن زێدەتر کوشتنا دیموکراسیەتێ و باوەری هەبوونێ یە ب هەلبژاردنان د داهاتی دا؟ ئەرێ کەس نینە بێژە ڤان هەوە ب درێژاهییا ژیێ حکومڕانییا خوە و تەنانەت د شەڕێ ناڤخۆیی ژی دا دروشمێن وە بەرژەوەندیا وەلاتییان و خزمەتکرنا وەلاتییان بووینە. ئەرێ ئەڤا هوین دکەن چ جۆرە ژ بەرژەوەندی و خزمەتکرنی ب وەلاتییان؟! ئەگەر پارتی ڕاست دبێژێت ناڤێت بێی ئێکەتیێ حکومەتێ پێک بینێت، بلا هەموو داخوازیێن وان بجه بینێت و هەر پۆستەکی داخواز دکەن بلا بدەتێ بێ یەک و دوو و ئیدی نە مە و نە وان پێدڤیی ب کۆمبوونێن سێڤ خوارنێ و بێ ئەنجام نابن. ئەگەر ئێکەتی ژی هێشتا خوەدانا دروشمێ دەلیڤێن کار و خزمەتێ یە، بلا چیدی چارەنڤیسێ پتر ژ پێنج ملیۆن کەسان نەکەتە د ترازۆیا پۆستەکی دا. پێشنیار دکەم چی دی پارتی و ئێکەتی مەترسییا سەرهەلدانا شەڕێ ناڤخۆیی و دروستبونا دوو ئیدارەیی نەکەن بەهانە کو ژبەر هندێ دێ تا حەفکێ خوە گرین و نزانم چێ. چونکی پشت راستم کەس چەکی نە ژ بۆ بارتی و نە ژ بۆ ئێکەتی بۆ شەڕێ ناڤخۆیی ناڕاکەت و بابەتێ دوو ئیدارەییێ ژی ئەو بخوە ئەڤە چەندین سالن کوردستان ب سەر هەردوو زۆنێن زەر و کەسک دا هاتییە دابەشکرن. هەموو تشت ژی دوو ئیدارەیی نە و تەنێ ب فەرمی نەهاتییە ڕاگەهاندن و ب من وەرە هەر کەسێ دەستێ خوە بدانێتە سەر وژدانا خوە نەشێت حاشاییێ ل ڤێ چەندێ بکەت.
ژبەر هندێ ب فەر دبینم ئێدی ئەڤ بێڕێزی و حساب نەکرن بۆ ئیرادا خەلکی و ڕەوشا خراپ یا ژین و ژیارا وەلاتییان، بهێتە ڕاوەستاندن و ب بەروڤاژی دێ بێتە ئەگەرێ ژدەستدانا ب تمامی یا باوەرییا وەلاتییان ب ڤان پارتان و جارەکا دی دێ بێتە ئەگەرێ سەرهەلدانا کۆچکرنێ بەرەف وەلاتیێن ئۆروپا، و پارتی و ئێکەتی ب پلە یەک و پارتێن دی ژی ب پلە دوو و سێ و… هتد، بەرپڕسیارن ژ ئەنجامان ژبەر هندێ بلا کۆمبوون پتر کۆم نەبن.
- رۆژنامەڤان
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
