هندی مە دیتی و مە بهیستی چیا، کەڤر و تەراشێن ڤی وەلاتی چەپەر و جهێ حەواندن و خۆراگری و پاراستنا گەلێ مە بوون. داگیرکەر، نەحەز و نەیارێن گەلێ مە ب هەمی هێزا خوە یا سەربازی، ب تۆپ، تانک و زریپۆشێن خوە نکارین جهێ پێ خوە ل سەرێن ڤان چیایان بکەن و ب هەڕمینن و بەردەوام ل بەرامبەر واندا تووشی شکەستن و رەڤینێ دبوون. چۆنکە ئەڤ چیا، کەڤر و تەراشێن وەلاتی ب خوینا خۆشمێر، قەهرەمان و نەڤیێن کاوەیێ ئاسنگەر هاتینە پاراستن و د چاخ و قۆناغێن جودا دا ناڤەندێن شۆرەش و بەرخوەدان و فێرگەهێن خوەگوریکرنێ بوونە و قوربانیدانێن بێ هژمار ل پاش خوە هێلاینە ژ بۆ هندێ ب هەناسەیا ئازادی و سەرفەرازیێ بژین. ئانکو دا ئەم، زارۆک و نەڤیێن مە ژی ب خەمل و جوانیا سروشتێ وەلاتێ خوە شادببن پشتی کو قەیدێن ستەم و زۆرداریێ هاتینە شکاندن و دیوارێن دکتاتۆریەتێ هاتینە هەرفاندن.
لێ ب مخانیڤە دێ بێژین ئیرۆ مە گوهلێ دبیت کو هندەك ژ تاکێن ڤی وەلاتی ل سەر کیستێ ڤێ ئازادای و خوینا پەچکەشێر و کورێن شۆرەشڤانان، مەزنترین گونەهـ، غەدر و بێدادیێ ل گەل و خاکا وەڵاتی دکەن کو ل سەرێن چیا، گر و کەڤرێن ڤی وەلاتی قەسر و ڤیللەیێن مۆدێرن ئاڤاکرینە و ژبلی کو مولکی گشتی دەستەسەرکرینە و سروشت تێکداینە، هەروەسا ئەو سروشت و خاکە کرینە جهێ ڤەحەواندن و مێڤانداریکرنا دەهمەنپیسان. ب ڤێ چەندێ ژی پیرۆزیا ڤان جهان و ژینگەها ب خەمل و جوان یا وەلاتێ مە دهەتکینن و دهەڕمینن. ب راستی ئەڤە ما بی کو مە نەدیتی، ئانکو دەهمەنپیسێن گەرۆك ژی مە دیتن. لەوما هیڤیدارین هەمی لایەك ببنە هاریکار بۆ نەهێلانا هەر جۆرە تێکدانەکێ بۆ سروشت و حورمەتا چیا و کەڤر و تەراشێن وەڵاتی. ژبەرکو هەر بهۆستەکا وان وەکی مەزارەکییە و جهێ بەرخوەدانا قەهرەمانەکییە.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)