چاڤەرێ بووم
لێ نەهاتى
هزرێت من
مینا باژێرەکێ بەر دڕیاى یێت بەلاڤ بووین
باڤلوژانکێ هیڤیێت من یێت ڤەگرتین
سەرێ ئێڤارێت من ژى
ل سەر ملێت وان یێت شۆربووین
هەناسێت من ژى
دناڤ گەرماتیا رۆندکێت خودا یێت سۆژن
شەڤێت من د غەریبیا عەشقا تە دا یێت دفەتسن
دلێ من ژ لێدانێت خۆ ب شادبوون ب دیدارا تە بلەزترە
ژ زارۆیەکێ دایک نە دیتى غەریبترە
ژ بیرکالەکێ بێ دەست و لەپ و گاف شەپرزەترە
….
چاڤەرێ مە
نۆبەدارێ یەلدایێ مە
رێڤینکێ رییا تە مە
هزر یێ ژ هزارا دکەڤن
هندەک دناڤ جادەیێن سەرێ من دا یێ دغولغولن
هندەک یێ دلێ من دگڤێشن
هند یێ رۆندکا ژ چاڤێت من درێژن
سەر هندى را یێ ل جڤاتا وان دگرنژم
دا تاریاتیێت شەڤێت خۆ ژ رۆناهیا عەشقا تە شیرڤە بکەم
پیرە یادێت خۆ ب نڤینم
رۆندکێت خۆ ژبیرڤە ببەم
پاشى دێ گازى وى باى کەم
یێ جاران باهین ل بەر دلێ تە ددان
دا بێ هیڤى بوونێ پاشڤە بزڤرینم
دێ بزڤرە
دگەل ئێکەم دیدارا من ب گرنژە
دەما تە عەشق دناڤ دلێ خۆ حەواندى
و ل بهارا خەونێت من چەراندى
و ل بهارا دلێ من ئافراندى
وى دەمى ل وەستیکا بووم
یێ بێ زمان و ئێش و خەم بووم
دناڤ جڤاتا خەونێت خۆدا سۆر گولا بهارى بووم
ژ وى دەمێ تە یارى ب هەستێت رۆژێ کرین
حەژ بارانێ کرى
گازى رۆندکێت باى کرى
ئەز و رۆندکێت بارانێ
مینا بەفرو هەتاڤێ لێ هات بووین
ئەم ڤێک کەفت بووین
لێ راستى دبن پێ کەفت بوو
بەفرو هەتاڤ
بوون دلۆپەک ژ دەریاى ڤێ راستیێ
و ژ دێم و چاڤێت تە بەهی بوو
من ژێ بۆ خۆ ڤەکرت دبوو
دناڤ دەستێت خۆدا هەلگرتبوو
حەژێ کربوو
……..
هشکە ساڵیێ ب سەر هیڤیێت مە دا گرت
باى برن و بارۆڤێ شویشتن
ڤیانا تە دناڤ دلێ من دا پرت پرت کر
پاشى ل ئاشەکێ هویر کر
ب تنێ ما لەشەکێ بێ گیان
پەرتووکەکا پرى پەیڤێت بێ رامان
بەرى ئیسکێت خاترخاستنێ دەستێ خۆ ب سەرێ من دا بینە خار
قورچەکا رۆندکێت گەرم ب لەخرینى
ب سەر خۆزیێت پۆشمانیێ دا بکەم
من بڕیاردا
هەمى سۆزو ژڤانیت خۆ سێدارە بدەم
خۆ ژ هەمى هیڤیا ب دا قوتم
هندەک گونەهێت خۆ ب رائێخم و هشک بکەم
و بەرى رۆژێ سلاڤ بکە م
دەستێت خۆ ب سەرێ ئەلندا سوبەیا خۆ دا بینمە خار
ل بەر گرنژینا تیرۆژکێت وێ
گەردەنا خۆ پێ ئازا کەم و هەمبێزکەم
پاش ژ دەڤ بارکەم