ژ ساڵا (1991) و تا نها ئەڤرۆ پتر ژ چارێک چەرخی دەم ب سەر سەرهلدانا گەلێ باشوورێ کوردستانێ را بووری. هەر ژ وی دەمی گەلێ کورد هەست ب شانازییا پەیدابوونا روودانەکا ژ ڤی رەنگی دکر و دکەن. ژبەرکو نە تشتەک بچووك بوو دوژمنەک بهێزا رژێما بەعس ب کێمتر ژ مەهەکێ ژ تەڤ جهێن هەرێمێ بهێتە رامالین، و پشتی کۆچا ملیۆنی ژی سەقایەکێ ئازاد (ژ روویێ چەکداری و لەشکریڤە) هاتە هەبوونێ. ئەڤەژی دیسان بەرهەمەکە مافەکێ رەوایە شانازی پێ بهێتە بڕن، لێ پرسیار ئەڤە یە، پشتی سەرهلدانێ مە چ کر و ئەم چ دکەین دڤی سەقایێ پەیدابوویدا؟ مە چەند گرنگی دایە ئاڤاکرنا مرۆڤی؟ ئاڤاکرنا وەڵاتی (دوور ژ دوریشمان) وەکو کریار؟ فەتوایا مە چەند یا عاتیفی بوویە چەند ژی سیاسی؟ مە پشتی سەرهلدانێ سەرهلدانەکا زانستی ژی کر، یان ژی مە ب چاڤەکێ بازرگانی گرنگی دا هەبوونا سازییێن زانستی؟ مە چەند ژبلی (هین جهێ شانازیا مەنە) چ بۆ قوربانییێن شۆرەشێ و ئەنفالێ و و و کر، مە وەکر کو خەلک ژ قوربانییێن خۆ پەشیمان نەبیت؟
هەلبەت بۆ ڤێ هەموویێ مە چ نەکر کو ژ هەژی بیر ئینانێ بیت، ژ بلی ساخکرنا بیرەوەریا ڤێ رۆژێ و ئەنجامدانا ئاهەنگ و خاندنا هەلبەستان. مە ب چاڤەکێ لۆژیکی تەماشەی رەوشا خۆ نەکر. نە هەر ئەڤە، بەلکو گەلەک جاران یێن گۆتی بلا پێ گۆتن و ئاهەنگ بەس بن ئێدی دەمێ رژدیێ یە، د هاتنە گونەهـ بارکرن ب نە دڵسۆزیێ و نە کوردیێ. ڤێ رەوشێ ژی دوو بەرهەم پەیداکرن، ئێک خەلک ژ ئەگەرێ پشتگوهـ هاڤێتنێ کەفتنە د قەیرانێن پێگەهشتنا هزری، دارایی و ئازادیەکا ب رامانا ئازادیێدا، دوو ئەوێ دوهی دهۆل بۆ بابێ عودەیی د قوتا ئەڤرۆ ژی هەر دهۆلقوتە و ژ دڵسۆزیێن سەر و مالێن وی چوین دڵسوزترە. ئەڤە ژی بەرکو کادرێن پارتان گرنگی نەدا پێگەهاندنێ، هندی گرنگی دایە مووچێ خۆ، و رێکخراوێن ئێن، چی، و ژی دبنەرەتدا چی ئو بوون. ل بن پەردا مەدەنیەتێ دەرگەهەکێ کۆمڤەکرنا پارەیی بوون. لەوما داکو سەرهلدان ب گەهیتە وێ ئارمانجێ یا بۆ پەیدابووی گرنگە ئێدی گرنگی دانا مە ب وێ د چەپلە قوتان و ئاهەنگان دا بچیک نەبیت، داکو وەڵات ببیت وەڵات و کەس ژ قوربانیا خۆ پەشیمان نەبیت.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)