بارزانیێ نەمر د ژیانێ دابا پێشوازى لێ نە دکر!

هەردەم مە گوه ل پەیڤا رێبازا بارزانى دبت, بێگومان ئەو رێبازە ژى ژ رێبازا بارزانیێ نەمر و  یێن بەرى وى یە ژ باب و باپیران. ئەگەر ئەم بەحسا بارزانیێ نەمر بکەین (19031979) رێبازا وى ب رێبازەک پیرۆز دهێتە ب ناڤ کرن. ژبەرکو ئەو رێباز یا پر بوو ژ (کوردپەروەرى، دادپەروەرى، دەستپاکى، یەکسانى، دۆستینیا هەژاران، سەروەری یا یاسایێ، پێکڤە ژیان و ژیانەک سادە و … هتد) ژ وان دەستەواژەیێن جوان کو د واقعى ژى بوون نەک ب تنێ گووتن. هەر سال ل گەل سالڕۆژا  ژدایکبوونا بارزانیێ نەمر و هەلکەفتێن ئادار و نەورۆزێ، ب سەدان کەس ژ ئەندامێن پارتیا دیموکراتا کوردستانێ سەرەدانا مەزارێ نەمران ل بارزان دکەن. پرانیا وان بەرپرس و خوەدى پلە نە ل ڤى وەلاتى، چو ل سەر وان هاتبتە فەرزکرن یان ژبۆ موکومکرنا کورسیکا خوە سەرەدانا مەزارى دکەن. دیسان تەخ و چینێن دى ژى هەنە یێن کو ژدل ل گەل رێبازا بارزانى و حەز ژێکەرێن وێ رێبازێ.

ل گەل وێ سەرەدانێ هەر ئێکێ دچت ژ بلى خواندنا سورەتا فاتیحە ل سەر مەزارى سۆز و پەیمانان ب بارزانیێ نەمر ددەن کو ل سەر رێبازا وى بەردەوام بن. ئەو رێبازا ل سەرى مە باس لێ کرى، لێ ئەگەر ئەوێن دچن و سەرەدانێ دکەن و سۆز و پەیمانان نوى دکەن بۆ بەردەوامیبوون ل سەر رێبازا بارزانیێ نەمر، ب راستى ل سەر سۆزا خوە بن و وێ رێبازا پیرۆز بکەنە ژیوارى و د بوارى جێبجیکرنێ دا، دێ بینین کوردستان دێ بیتە شاما شەریف. لێ دەما ئەم ڤان سەرەدانان و سۆز و پەیمانان دبینن و ل هەمبەرى وێ ژى نە دادپەروەرى، بنپێکرنا یاسایێ، نە یەکسانى، نە دەستپاکى، نە دۆستینیا هەژاران و نەژى کوردپەروەرى!.  ژبەرکو ئەگەر کوردپەروەر بن دێ چەوا خەلکى برسى کەن و مالێ هەژاران دزن و سەرێن گران کنە قەسر و قوسیر و بنە خوەدى پارچە زەڤیێن مەزن و مەزرەعە و زارویێن خوە ل قوتابخانە و زانکۆیێن ژدەرڤە دنە بەرخواندنێ و یێن خەلکێ دى قوتابخانە نەبن لێ بخوینن؟!. ئەو خوەدى مووچەیێن زەبەلاح بن و هەتا هەڤژینێن وان ژى و هەر دامەزراندنەک و گرێبەستەک بۆ وان و رەشەکێن وان بن و یێن دى ژى ب سالان ل هیڤیا دامەزراندنێ بن و بێهیڤى بن ژ دەستهەلاتێ؟!، دێ چەوا هەرۆ ل وەلاتەکى بن؟! دێ چەوا دەرمانێن سەختە پرى بازاران بن؟ دێ چەوا دۆشەکێن گەنجێن مەژى تریاک و مادێن بێهوشکەر تێدابن؟!، دێ چەوا گەنجان هندە ژ پاشەرۆەک گەش بێهیڤى کەن و بەرێ وان دەنە دەریایا ئیجە و پاشەرۆژەک نەدیار؟!، دێ چەوا ب سەدان و هزاران بندیوار ل ناڤا لیستەیێن مووچەخوران هەبن؟!، و و و … لیستە ب داوى ناهێت.

ئەگەر ب راستا ئەو سۆز و پەیمانان ب بارزانى د دەن بۆ بەردەوامبوونێ ل سەر رێبازا وى دڤێت وەلات ژ گەندەل و دز و نە دادپەروەیێ و نە دەستپاکیێ و و و ڤالا ببت. لێ ئەگەر ئێک هەبت ڤان کارێن نە یاسایى ئەنجام بدەت بلا سەرەدانا وى مەزارێ پیرۆز نەکەت. بێگومان بارزانیێ نەمر یێ بەرى یە ژ ڤان کریاران، ئەگەر بارزانیێ نەمر نوکە د ژیانێ دا با و کریارێن ڤان کەسان دیتبان ب هیچ رەنگى پێشوازى لێ نە دکر و نە دهێلا ئەڤ کریارە ل ناڤ لایەنگرێن وى و ل وەلاتێ وى و ل ژێر دەستهەلاتا وى دا بێنە کرن. ژبەرکو بارزانى سومبولا نەتەوا کوردە و گەلەگ مەزنترە ژ یا ئەڤرۆ دهێتە کرن.

·         ماڤپەروەر

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top