گەنج گەنجینەیا هەر وەلات و نەتەوەیەکێ نە. پێشەنگێ دەولەت، ئایندە، گۆرانکاری و پێشئێخستنا هێز و شیانایە. ئۆمێد ب سەرکەفتن و ڤەژاندنا هیڤی و ئۆمێدان دناخێ گەنجان دا، داینەمۆیا کارابوون و خورتکرنا ژیانێ بۆ گەل و وەلاتی دناخێ گەنجان دایە. ئەگەر بەرچاڤرونیەکێ ل رەوشا هەرێما کوردستانێ بکەین د چوار سالێن دەربازبوویدا، گەنجێن مە بێئۆمێد نەبوون ژ قەیران و کاودانێن هەرێما کوردستانێ. هەر ل دەما شەرێ تیرۆرستێن داعش ب دەهان گەنج ل بەرۆکێن شەری بوون و ب فیدایانە بەرگری ژ ئاخا کوردستانێ دکرن و باوەری ب دۆزا خوەیا رەوا هەبوو. پشتی حکومەت کەفتیە د بارودۆخەکێ دارایێ نەجێگردا، گەنج هەڤکار و پشتەڤان بوون دگەل حکومەتێ و بەردەوامی دانە کار و خزمەتێ و گیان و روحیەتا خۆبەخشی، ب رێکا سازیێن جودا جودا و خەباتا کاری و کارکرنێ ل سەر بەهرە و شیان و پیشەیان، و رۆلەکێ کارتێکەر د گۆرەپانێ دا گێران. هەڤدەم حکومەتێ نەخاسمە رێزدار نێچیرڤان بارزانی پشتەڤانی دووپات کر ژ بۆ گەنجان. گەنجێن کوردستانێ دکاودان و رۆژانێن سەخت دا ب هەلویستەکێ جوامێرانە و خۆراگری و ئیرادەڤە سەرەدەری دگەل حکومەتێ کر و خۆ گونجاندن و ل ڤێ داویێ ئەو چەندە دیار بوو بۆ هەموو لایەکێ کو خۆراگری، هیمەت، بەرخودان و بزاڤا گەنجان و حکومەتا نێچیرڤان بارزانی سەرکەفت و سۆزێن خۆ بجهئینان و هیڤی و ئۆمێدێن گەنجان ڤەژاند.
هەلبەت ئەڤ بریارا نەمانا پاشکەفتێ مووچەی لڤینەکا دی کەتە ناخێ گەنجان و رێکخۆشکەرەکێ مەزن بوو کو دیسان گەنج داهێنان و بەرهەمئینانێ دبواریێن خۆ یێن پیشەی دا بکەن. ئەڤە ژی خالەکا گرنگ و ئەرینی و هەری مفایە بۆ کوردستانێ، چونکە هەردەم گەنج ئەو تەخا دەولەمەندا پێشکەفتنا دەولەتێ یە ژ بۆ پێشڤەبرنا گشت سەکتەرێن ژیانێ. ب ڤێ بریارێ دێ کارتێکرنەکا راستەوخۆ ل سەر گەنجان هەبیت ژ روویێ لڤاندنا بازار و بەرهەمێ گەنجان و زێدەتر هەولدان و گرنگیدان ب ڤێ تەخێ دێ بنیاتەکێ هۆشیاری و رەوشەنبیری موکومێ زانست و زانین و داهێنانێ ژ بۆ وەلاتێ مە پەیداکەت. لەورا هەژی یە بێژم ب هەموو کێموکاسی، بەربەست و ئاستەنگان حکومەتا هەرێما کوردستانێ نەخاسمە رۆلێ دیارێ سەرۆك وەزیران نێچیرڤان بارزانی هەڤكار و پشتەڤانێ گەنجان بوویە و گەنج ب هێزا مەزنا هەرێمێ زانی یە ل هەموو قوناغەکێ. ئەڤجا دڤێت پلان و بەرنامێن باشتر ژ بۆ ڤێ تەخا جڤاکی بهێنە دارێژتن و کار ل سەر بەهرە و شیانێن گەنجان بهێتەکرن ژ هەر ئالیەکێ پشتەڤان بن کو دنهادا زێدەتر ژ هەر کەسی گەنجان باوەری ب رۆل، هەلویست و پێگەهێ نێچیرڤان بارزانی هەیە و ب ئەندازیارێ ئاڤەدانی و رێنیشاندەرێ گەنجان زانی یە.
هەروەسا دڤێت ئێدی هەموو ئالیێن سیاسی گەنجان وەکو دەستکەفتەکێ سیاسی ل قەلەم نەدن، بەلکو ب هێزا دەولەتێ بزانن و ب هەموو شێوەیان ئاسانکار و ئامرازیێن هاندەر بن ژ بۆ گەنجان و هەول و بزاڤێن سەرۆك وەزیران و سۆزا وی بۆ خەلکێ کوردستانێ کو چارەسەریا ئەڤێ کێشێ بکەت ب سەرکەفت و دووبارە گەنج ڤەگەریان داهێنان و پێشکەفتنا شیان و بەهرەیان. دیسان خۆراگریا گەلێ کوردستانێ ب گشتی د ماوێ بوری دا سەرکەفت و ئێکگرتن و ئێکرێزیا خەلک و حکومەتێ ب هێزترکەفت ل سەر دوژمنان و وان کەسێن هزر دکر حکومەتێ شیانێن رێڤەبرنێ و بەرسنگرتنا ڤێ قەیرانێ نینە. ئەڤرۆ ژی گەنج ل ناڤەندێن بریاردانێ، پرۆسەیا حکومرانی، یاسای، سیاسی و ئیداری دانە و گرنگیەکا کاریگەر و باش هەیە و دەرفەت بۆ گەنجان هاتی یە رەخساندن ب چەندین رێکێن جودا جودا رۆلێ خۆ دبینن و هەبوونا گەنجان دچەمك و سەرکردایەتی دا هەیە. چونکە گەنج سەرمایێ کاریگەرو زیندەیێ کۆمەلگەهێ یە، لەورا نێچیرڤان بارزانی پاشەرۆژ و دەستپێشخەریێن گەنجان د وەلاتی دا بلند نرخاندی یە و خواستی یە گەنج شیان و رۆل و ئارمانجێن خۆ بێخنە پێناڤی خزمەتکرنا وەلاتی. دیسان گەنجان ژی ل ئایندەی ئۆمێدێن مەزن ب شیان، بزاڤ و رۆلێ نێچیرڤان بارزانی د گۆرەپانا سیاسی دا هەیە.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)