چایخانە ل کوردستانێ ئەو جهن یێن هندەک جاران دبنە مزگەفت، هندەک جاران ژی دبنە پەرلەمان، جارنا ژی جهێ یاخی و بەرهەڵستکارانە. ل چایخانەک ژ چایخانێن بازاڕێ باژێڕی یێ روینشتیبووم، کۆمەکا گەنجان ل دەستێ من یێ چەپێ و کۆمەک ژی ل هە مبەری من بوون. پترین سوحبەتا وان ل سەر یاریێن تەپاپێی، بێکاری و چوونا ژ دەرڤەی وەڵاتی بوو. لێ یا گەلەک سەرنجا من راکێشایی ئەو دوو پیرەمێرێن ل دەستێ من یێ راستێ بوون. دوو پیرەمێر ل سەر کورسیێن دەستێ من یێ راستێ روینشتبوون و بیرهاتنێن خۆ یێن بەرێ نوی دکرنەڤە و جارنا ژی باس ل نهایا مە دکر.
ئێکی گووتە یێ دی: “دێ میرزا ما ئەگەر تە زانیبا ئەڤا مە بۆ دکر بۆ ڤێ رەوشا نوکە بوو دا تڤەنگێ ب ملێ خۆ ڤەکەی؟!” وی بەرسڤ دا و گووت: “میرخانێ برا یا مە دکر سەرباری وێ ئێکێ کو مە بەرەڤانی ژ ڤی مللەتی دکر، مە بۆ کوردینیێ دکر.. کوردینیێ!. لێ نە ب خودێ من زانیبا دێ ئەڤە هەر هۆسا ب سەر و ستۆیێن ئێک و دوو ڤەبن و ل شوینا پلان و پیلانێن دوژمنان ژ ناڤ ببەن، دێ ل بەر ئێک و دووڤە د راوەستای بن، و هەر ئێک یێ دی ب خائین، خاکفرۆش، گەندەڵ، هیچ و پۆچ دەتە زانین!، نەوڵڵا ئێک رۆژ ژی من تڤەنک نەدهەلاند. راستە نوکە ئەم ب ئازادی دهێین دچین لێ دلێ مە یێ خۆش نینە .. نە”. دیسان ئەوێ ناڤێ وی میرخان پرسیار کر: “ئو میرزا برا تشتەکێ دی، بیرا تە ل “ب، ی” دهێت؟! میرزای ژی د بەرسڤێدا گووت: “ما نە ئەوێ ب )بەرگویزێن پشتپەز( بەرنیاس؟”، میرخانی بەرسڤ دا و گووت: “بەلێ ئاها ئەو ‘حەمێ میسێ’!”، میرزای گووت: “بەلێ ولڵا برا بیرا من دهێت دزانم کا ئەو چ ‘جاش’ بوو، ولڵا پا وی ئێک و دوو یێن داینە کوشتن، هەر ئەوبوو یێ جهێ هەڤالەکێ مە یێ پێشمەرگە نیشا ‘عەسکەری’ دای و هەڤالێ مە ب درندانەترین شێوە هاتییە شەهیدکرن، هەر ئەو بوو دەنگ و باسێن گوندی و پێشمەرگەی بۆ ‘بەعسیان’ دبرن”.. میرخانی ئاخفتنا وی بڕی و گووتێ: “پا ولڵا برا نوکە ئەو مووچەیێ خانەنشینیێ ب پلەیەکا بلند وەردگریت و ل دیوانانژی دبێژیت: ‘نیڤا ڤێ کوردستانێ (بارزانی) یا رزگار کری و نیڤا دی ب خەباتا من و یێن وەک من یا هاتییە رزگار کرن’!”.
میرزای ئاخینکەک هەلکێشا و گووت: “ڤێ دلنازکییا ‘سەرۆکی’ ئاگر بەردا هناڤێن من، ئێ برا ولڵا ‘حەق’ ئەو بوو ئەو نە چ مرۆڤێ مە لێ دگووت و یێن وەکی وی هەمی ل نیڤا سیکێ ل بەر دەرێ ئەمنا هینگی خەلک تێڤە دهاتە ئەشکەنجەدان، نها ئەو لێ هاتبانە سێدارەدان. بەس دلۆڤانیا “سەرۆک”ی دەریایە دەریا!. باوەریا تە بهێت مە کر و هندە کا خوار، مووچەیێ خانەنشینیێ بتنێ تێرا دەرمانێن من ژی ناکەت و سەرباری وێ ئێکێ کو یێ کێمە زۆی نادەن ژی. بۆ خۆ نەک خەم چایا خۆ ڤەخۆ هێش سارنەبووی. یێن دبێژن دێ چێبیت و ئەز ب خۆ ژی دبێژم ئینشڵڵا ڤێجارێ بەرەف چێبوونە” دیسان میرزای ئاخینکەک هەلکێشا و گووت: “بخودێ برا، هندی چاڤێ وان ل فەقیر و هەژاران نەبیت، کەسێن دز ل سەر کورسییان لانەدەن، ئەڤ ‘مەسئولک’ێن دوهی چ نە و ئەڤرۆ بووینە خودان ترۆمبێلێن ئاخر مۆدێل و ‘قەسر’ مالێ وان ژێ نەهێتە ستاندن و دفنا وان نەهێتە چەماندن، چەندی ‘سەرۆک’ خودانێ خۆ ڤێ دلۆڤانیێ بیت خائینان سزا نەدەت، چێنەبوو و چێنابیت ژی.
- نوونەرێ رۆژئارتیکڵ ل ئامێدی