ئەگەر ژلایێ جۆگرافی و ئاکنجیبوونێ بەرێ خۆ بدەینە ھەرێما کوردستانێ دگەل وەلاتێن ئەورۆپی ناھێتە بەراوورد کرن. چونکی ھەرێما کوردستانێ قەوارەیەکێ ئیداریێ بچیکە دناڤ وەلاتەکێ بچیک یێ فیدرالیدا کو عیراقە. لێ سیاسەتا دبلۆماسی و دەرڤەیی یا ھەرێما کوردستانێ، پێگەھێ سیاسی یێ ھەرێما کوردستانێ گەھاندیە مینا وەلاتەکێ مەزن و خودان سەروەری. چونکی ب سەدان ھەرێمێن ژ ھەرێما کوردستانێ مەزنتر دناڤ وەلاتێن فیدرالدا، نە ئەم ناڤ و پایتەحتێ وان دزانین، نەژی سروودا وان یا نشتیمانی و سەرۆک و لەشکرێ وان. پایتەختێ ھەرێما کوردستانێ ژ ئەنجامێ سیاسەت، دبلۆماسیەت و کاریزمایا نێچیرڤان بارزانی بوویە قیبلەیا دبلۆماسیەتێ. رۆژانە چەندین بەرپرس و پلەدارێن ھەرە مەزنێن وەلاتێن جیھانێ ب سەر دکەن. سەرەدانا جوسێپێ کۆنتێ سەرۆک وەزیرێ ئیتالیا، ھەر وەسا رۆژا پاشتر سەرەدانا سەرۆک وەزیرێن ھەرێما کوردستانێ نێچیرڤان بارزانی بۆ بەغدا و کۆمبوون دگەل عادل عەبدولمەھی سەرۆک وەزیرێن عیرقێ. پەیوەندیێن دبلۆماسی ستۆنا بھێزبوونا دەولەت و حکومەتانە نەخاسمە بۆ حکومەتا ھەرێما کوردستانێ کو پشتی خیانەتا شازدێ ئۆکتۆبەرا سالا ٢٠١٧ ھەتا راددەیەکێ پەیوەندیێن ھەرێمێ دگەل جیھانێ خاڤ و سست بوون و دگەل عیراقێ ژی ھەتا وی رادەی تێکچوون لەشگرێ عیراقێ ھەمی شیانان بۆ داگیرکرنا کوردستانێ بکار بینیت.
ھاتنا سەرۆک وەزیرێ وەلاتەکێ وەکی ئیتالیا کو ئێکە ژ وەلاتێن بھێز و کاریگەر ھەم ل سەر ئاستێ ئەورۆپا ھەم ژی دناڤ ھەڤپەیمانیا دژی تیرۆرستیا داعش. ئەڤ سەرەدانا چەندین ڕامان ددەت، ژوانا دانپێدانە ب قەوارێ ھەرێما کوردستانێ وەک ھەرێمەکا کاریگەر ژئالیێ سیاسی و ئێمناھیا دەڤەرێ. ئیتالیا وەلاتەکێ پیشەسازیێ مەزنە ل سەر ئاستێ جیھانێ، پشتەڤانیا وێ ب ڤان سەەردانا بۆ ھەرێما کوردستانێ دێ دابین بیت و ل داھاتی دا ھەرێم دێ مفای ژ ئەزموونا وان یا پیشەسازی و کارگێری وەرگریت و ژئالیێ لەشکری ژی پشتەڤانیا وان دێ زێدەتر بیت بۆ پێشمەرگەھێن کوردستانێ. گرێدانا ڤێ بازنا سەرەدانێن رۆژانە یێن بەپرسێن وەلاتێن ئەمریکا و ئەورۆپا بۆ ھەرێما کوردستانێ سەرکەفتنەکا ھەرە مەزنا دبلۆماسیەتا کوردستانێ یە ل سەر دەستێ نێچیرڤان بارزانی و ل ئاییندەکێ نێزدا دێ ئەنجامێن وان د بەرژەوەندا کوردستانێ دا دیار بن. دووماھی سەرەدانا سەرۆکێ حکومەتا ھەرێما کوردستانێ بۆ بەغدا و کۆمبوونێن جەنابێ وی دگەل سەرۆک وەزیرێ عیراقێ. دیسان بۆ ڤان کاودانان دێ خزمەتەکا ھەرە زۆر گەھیتە ھەرێما کوردستانێ ژلایێ سیاسی، کارگێری، ئابووری و ئاستێ پەیوەندیان و چارەسەرکرنا وان پرس و ئاریشێن ھەلاویستی دناڤبەرا ھەرێمێ و عیراقێ دا.
پشتی روودانێن شازدێ ئۆکتۆبەرێ و کارڤەدانێن پشتی وێ، ھەرێمێ پێتڤی ب کەسایەتیەکی ھەبوو ل دەمەکێ زوو سەنگ و گرانیا کوردستانێ وەک قەوارەیەکێ کاریگەر بینیتەڤ ناڤ قادا سیاسی و ئابووری، ھەم ل سەر ئاستێ عیراقێ ھەم ژی ل سەر ئاستێ ھەرێمی و نیڤ دەولەتی بۆ گەشەبوونەڤا ھەرێمێ و ڤەژاندنا ئابووری، جڤاکی و سیاسی. نێچیرڤان بارزانی شیا ببیتە ئەڤ کەسایەتی و ب رۆلێ جەنابێ وی ئەڤ چەندە د بەرژەوەندا ھەرێما کوردستانێ و دۆزا سیاسی یا کوردستانی دالەنگی و بەرژەنگێن بھێزبوونا کوردستانێ دیار بوونە. ئەڤ سەرکەفتنێن ل سەر دەستێ سەرۆکێ حکومەتا ھەرێما کوردستانێ فاکتەرن کو ل دەمێن داھاتی دا ھەرێما کوردستانێ ب سەرۆکاتیا نێچیرڤان بارزانی دێ شێت پشتەڤانیا نیڤ دەولەتی و ھەرێمی بۆ کوردستانێ دابین کەت و دێ بیتە جھێ رەزامەندیا خەلکێ کوردستانێ و جڤاکێن نیڤ دەولەتی. ئەڤ ھەردوو سەرەدانە زۆر ڕامانان ددەن و دەسکەفتێن زۆر ژی دێ بۆ خەلکێ کوردستانێ دابین کەن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)