بەحسێ فلان حزبێ نەکە هێلا سورە، بەحسێ فلان بەرپرسی نەکە ئەو هێلا سورە، مایێ خوە ددینی دا نەکە هێلا سورە، هشیاربی بەحسێ فلان عەشیرەتێ بکەی دێ ئاریشە بۆ تە چێبن هێلا سورە، فلان ئالای رانەکە ل ڤێ ناوچێ هێلا سورە، تۆ چەوا دبێژی بڕیارا فلان کەسێ شاشە هشیاربی ئەو کەس هێلا سورە، تۆ وەلاتفرۆشی تۆ بەحسێ فلان سەرکردەی بکەی ئەو هێلا سورە و… هتد. ئەڤە و چەندین گووتنێن رۆژانە ئەم دبینن و گوهلێ دبین دتۆرێن جڤاکیدا و ل چایخانە و دناڤ سوحبەتێن خەلکێ دا. هەر ژکەڤندا د جڤاکێ مەیێ کوردەواریدا هێلێن سور هەبوینە و تانوکە ژی ژ ئاستێ ئۆلی و کەسێن ئاغا و عەشیرەتێ بەرفرەهتر بوویە بۆ ئاستێ حزب، کەس، دەولەمەند و هەتا دەسهەلاتێ ژی. هەبوونا زێدە هێلێن سور و موقەدەسکرنا گەلەک جهـ، کەس، حزب، عەشیر، ئاغا، دەرەبەگ و دەولەمەندان ڤەدگەریت بۆ هندێ کو ئەم شاش د زاراڤێ ” ڕەخنێ” گەهشتینە .
د جڤاکێ مەدا رەخنە دهێتە واتەیا سڤکاتیپێکرنێ، لەوا هەردەمێ ڕەخنەک ل تشتەکێ یان ل بابەتەکێ هات کرنێ، ئێکسەر هێلێن سور دهێن دناڤ بابەتیدا. نەبوونا ئازادیا رادەربڕینێ ب شێوەیەکێ تمام، کوێلەبوون و ئاستێ نەهوشیاریا تاکە کەسان کاریگەریەکا زۆر هەیە د پیرۆزکرنا هندەک بابەتاندا. لەوا هەردەم ب چەند دروشمەکێن درەو و بێ بنیاد حزب، کەسێن دەسەلاتێ، دەرەبەگ و سەرۆک عەشیر جۆرە پیرۆزیەکێ بۆ خوە پەیدا دکەن د مێشکێ تاکە کەسان دا. هەردەم وەک پەرژان پەیڤا هێلا سور بۆ خوە بکاردئینن دا کێماسی و خرابکاریا خوە ڤەشێرن و پتر جهێ خوە ئاسێ و موکوم بکەن.
لەوا ئێدی فەرە هێلێن سور کەسک ببن. ئەو بابەتێن د بازنەکا تەسک دا بەحس ل سەر دهاتنە کرن ژبەر پیرۆزی و موقەدەسکرنا وان، ئێدی ب بەرفرەهی بەحس ل سەر بهێتە کرن ژبۆ وێ یەکێ راستی و دروستیا هەمیان ئاشکەرابیت و پچەک رویێ دیموکراسیەتێ پێڤە دیاربیت. گەلەک جاران ئەم دبینن دجڤاکی دا گەلەک کەس دبنە قوربانی چ ب گیانێ خوە یان ژی ب مافێن خوە، ژبەر سنوربەزاندنا وان هێلێن سور ئەڤێن هندەک کەسان ئافراندین دجڤاکیدا. نابێژم بلا سنورێ هەر تشتەکی بهێن بەزاندن، نەخێر بەروڤاژی بلا رێز ل هەمی وان تشتان بهێتە گرتن ئەڤێن هێژای رێزگرتنێ بن. لێ ژبلی “خودێ” هەر تشت (قابلی) بەرامبەری رەخنەگرتن و پرسیارێ یە. بلا یەکتر قەبولکرن دهەمی بابەتاندا ل دەف مە هەبیت و ب شێوەیەکێ تمام ئەم سەرەدەریێ دگەل رویدان و بابەتان بکەین. ژبەر وێ چەندێ دا چ کەس و لایەن ڤان هێلێن سور بۆ خوە ب دەلیڤە نەبینن بەرژەوەندیێن خوە تێدا بپارێزن و خەلەتیێن خوە ل بن ڤان هێلان پەردەپۆش بکەن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)