پشتی قارەمانیا کۆپا ئاسیا یا ٢٠١٩ ل ئیماراتێ بۆ جارا ئێکێ ب پشکدارییا ٢٤ ھەلبژارتیان دەستپێکری، پتریا چاڤێن حەژێکەر و پشتەڤانێن فۆتبۆلێ کەتینە سەر ئاست و ئەنجامان. بەلێ ژلایێ بازرگانیێ ڤە و ب تایبەت ژلایێ سپۆنسەریکرن و پشتەڤانیکرنێ ڤە خودانێن کۆمپانیان ب رەنگەکێ بازرگانی بەرێ خو دایە ڤێ قارەمانیێ و ھەر ژبەر ڤێ چەندێ ھەڤرکیەکا دژوار دنافبەرا کۆمپانیێن عەرەبی و بیانی دا پەیدا بوویە و پتریا جارا وەسا دجادەیا وەرزشی و دەزگەھێن راگەھاندنێ دا بەربەلاف بوویە کو ئێکەتیا تەپا پێی یا ئاسیایێ سپۆنسەرێن وەلاتێن کەنداڤی پتر وەردگریت دخول و قارەمانیان دا. راستیا ڤێ چەندێ د ناسنامەیێن خودان کۆمپانیێن سپۆنسەر و پشتەڤانێن ڤێ قارەمانیێ دا دیار دبیت، ئەوێن ژلایێ سایتێ ئێکەتیا فۆتبۆلا ئاسیایێ ڤە ھاتنە بەلافکرن، ئێکەتیا فۆتبۆلا ئاسیایێ ھەڤپشکێن خۆ وەکە سپۆنسەر و پشتەڤان ل سەر سێ ئاستا بەلاڤکرینە و ب ڤی رەنگی ئاستێ کۆمپانیێن سپۆنسەر ژ ٧ حەفت کۆمپانیان پێک دھێت و ئاستێ کۆمپانیێن پشتەڤان ژ ٧ حەفت کۆمپانیان پێک دھێت و ھەڤپشکێ دەمێ فەرمی ئێک کۆمپانی یە و بەر ب وەلاتەکێ ئەوروپی کەتیە.
ل ڤێرە مە پشتبەستن یا ل سەر سایتێ ئێکەتیا فۆتبۆلا ئاسیایێ کری، ئەو چەندە دیار دبیت کو لۆگۆیێ چەند کۆمپانیێن دی دیار دبیت. وەکی کۆمپانیا FWDیا فلیبینی یا (تامینات)ێ. ل دویف سایتێ ناڤبری وەسا دیار دبیت کو ھەر ١٥ کۆمپانیێن سپۆنسەری و پشتەڤانیا کۆپا ئاسیا٢٠١٩ دکەن ژ شەش وەلاتا پێک دھێن و کۆمپانیێن یابانی ب ھەشت کۆمپانیان کۆنترۆڵ ل سەر سپۆنسەریا کۆپا ئاسیا ٢٠١٩ کریە. ئانکو ژ نیڤێ پتر ب دەست کۆمپانیێن یابانی کەفتیە و رێژا وێ دگەھیتە ٥٣٪. کۆمپانیێن وەلاتێ مێھڤاندار ژی ل رێزا دووێ ھاتن دەمێ سێ کۆمپانیێن ئیماراتی شیاین مافێ سپۆنسەری و پشتەڤانیێ ژ ئێکەتیا فۆتبۆلا ئاسیایێ وەرگرتی و رێژا ئیماراتێ گەھشتە ٢٠٪. ھەر چوار کۆمپانیێن دی ژی ل سەر سێ وەلاتان ھاتنە دابەشکرن. ھەر ئێک ژ وان رێژا ٧٪ بەر کەفت کو پێک دھاتن ژ ئەمریکا و ھەر دوو وەلاتێن ئەلمانیا و سویسرا ژ کیشوەرێ ئەوروپا. زێدەباری وەلاتەکێ دی یێ کیشوەرێ ئاسیا، ئەوژی وەلاتێ قەتەرە کو ب تۆرێن خو یێن راگەھاندنێ سپۆنسەری کریە. کۆمپانیێن وەلاتێ یابانێ ب ڤی رەنگی بوون؛ تۆیۆتا و سایسۆن کادو ئای یۆ وەکە سپۆنسەر، کۆمپانیێن نیکۆن، مۆلتن، ماکیتا، فامیلی مارت و ئاساھی شیمبۆن وەکە پشتەڤان.
کۆمپانیێن ئیماراتی ب ڤی رەنگی ل رێزا دووێ ھاتن؛ السرافیە و تەیران ئیمارات وەکە سپۆنسەر، کۆمپانیا شرف دی جی وەکە پشتەڤان، کۆمپانیا بی ئێن سپۆرتس یا قەتەری وەکە سپۆنسەر، کۆمپانیا کۆنتیننتال یا ئەلمانی سپۆنسەر، کوکا کولا یا ئەمریکی وەکە پشتەڤان، کۆمپانیا تاغ ھویر یا سویسرا وەکە ھەڤپشکا دەمی ھاتنە وەرگرتن. ئەڤە وێ چەندێ دگەھینیت کو گوتنێن جادەیا وەرزشی و دەزگەھێن راگەھاندنێ دوورن ژ راستیێ و ئێکەتیا فۆتبۆلا ئاسیایێ بۆ قارەمانیا کۆپا ئاسیا ٢٠١٩ گرنگی ژلایێ بازرگانی ڤە پتر وەرگرتیە ژلایەنێ ھەست و ڤیانا وەلاتێن کەنداڤی.
· ھەلگرێ باوەرناما ماستەرێ ب راگەھاندنا وەرزشی و رێڤەبەرێ راگەھاندنا زانکۆیا پولیتەکنیکی یا دھوک
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
