هەردەم پارڤەکرنا بودجەى بۆ پرۆژەیێن حکومى ل سەر پارێزگەهێن هەرێمێ ژلایێ حکومەتا هەرێما کوردستانێڤە، ب نەدادى بوویە ب رێژەیەکا بەرچاڤ. ناخوازم بێژم زۆنا زەر و کەسک، لێ ژیوارە. لەورا ئەگەر باس ل هەردوو پارێزگەهێن زۆنا زەر بکم، بەردەوام پشکا شێرى ژ بودجێ بەر ب هەولێرێ کەتیە و پشکا رویڤى بەر ب دهۆکا شەهیدان! ئەڤە ژ سالا 2014ێ و شەرێ دەولەتا تیرۆرستى یا داعش وەرە، ب بهانەیا قەیرانا دارایى پرۆژێن حکومەتێ ب تایبەت یێن مەزن ب رێژەیەکا بەرچاڤ بەر ب کێماتیێ، بەلکو نەمانێ ڤە چووینە. سەرەراى ڤێ قەیرانێ ل هەولێرا پایتەخت جادەیەکا 120م ل دورماندورى هەولێرێ بێى ترافیک هاتیە دروستکرن کو شۆفێر ب 7 خولەکان لێ بڤەگەرت جهێ خوە. بەحس دهێنە کرن کو دەست ب جادەیا 150 م هاتیە کرن د دەمەکى دا هێشتا وێرێ باش نەبوویە جهەکێ ئاکنجیبوونێ. لێ یا خویایە کو مەرەمێن بازرگانى ل پشتن!. نابیژم بلا ل هەولێر چێنەکن و ل دژى وێ ژى نینم، ژبەرکو پایتەختە و خەلکێ وێ ژى ژ هەژى ڤان جۆرە پرۆژەیانە. لێ بەلێ بلا دهۆکێ قوربانى چو پارێزگەهێن دى نەکن!
ئەگەر هەر بەحسا جادەیێن ناڤخوە یێن باژێرى و وێ قەرەبالغا ئێکجار مەزن نەکەم، ئەڤا ژ ئەنجامێ بەردەوام یا هاوردەکرنا ترۆمبێلان، ب تایبەت یێن تەکسى ژلایێ بازرگانێن خوینمێژڤە بۆ ناڤ هەرێمێ، نەچێکرنا جادەیێن نوى و مۆدێرن ب تایبەت یێن بەرفرەه، ئۆڤەرپاس و نەبوونا چو پلانێن باش یێن رێڤەبەریا هاتن و چوونێ و کێمییا پارکێن راوستاندنا ترۆمبێلان، سەرەراى چەند جادە کرینە هاتن یان چوون ب تنێ. جاران هاتن و چوون ب کەرى دێ زویتر مە گەهینتە جهێ مەرەمێ. لەورا ئەگەر بەحسا جادەیا سەرەکى و گشتى (عام) بکەم، ب تنێ مە ئێک هەیە ئەوژى هەتا شۆفێر ژ ئێتویتێ ب چتە سێمێلێ، ب نەچارى دڤێت ل حەفت ترافیکان ب راوەستت. ئەرێ گونەها وى چییە ل جادەیەکا ب ناڤ گشتى حەفت جاران ب راوستت و هەر جارەکێ ژى چەند چرکە و خولەک ژ دەمێ وى بچن؟. ژبەرکو جاران ب دوو و سێ گەران هەتا شۆفێر ژێ دەرباز دبت! ئەرێ هەبوونا جادەیەکێ ب حەفت ترافیکان رامانا جادەیا گشتى (عام) د دەت؟!
ئەرێ چێکرنا جادەیەکا سەرەکى و گشتى (عام) و نوى بێى ترافیک، بەلکو ب ئۆڤەر پاس ل دهۆکێ ژ پێدڤییانە یان جادەیەکا 150م ل دورماندورى هەولێرێ، ددەمەکى دا کو ژنوى جادەیا 120م ب دوماهى هاتیە؟! دێ ب حەفت خولەکان ل دۆر هەولێرێ زڤرى و ب حەفتێ خولەکان ل دۆر دهۆکێ نازڤرى! ب هزرا من ئەڤ هەمى نەپیتەپێدان، پاشگوهخستن و نە ئەنجامدان و دروستکرنا چو پرۆژەیێن مەزن و ستراتیژى ل پارێزگەها دهۆکێ ژ ئەگەرێ وێ بێدەنگبوونا خەلکێ وێ یە. هەروەسا مسوگەر و گەرەنتیکرنا دەنگێن وانە د بەریکێدا. دیسان بەشەک ژى بۆ وێ خەمسارى و ب کێرنەهاتنا کارگێرى یا خوەجهى و ئەنجوومەنێ پارێزگەهێ ل دهۆکێ ئەڤا بەرژەوەندیێن تاکى و پارتایەتى ب یێن گشتى نەدن. زێدەبارى نەبوونا چو پارت و تەڤگەرێن ب هێز یێن ئۆپۆزسیۆنێ د زڤرت! لەورا پێدڤى یە خەلکێ دهۆکێ ژى ئێدى ب گەرنتیکرنا پرۆژەیێن مەزن و ستراتیژى دەنگى ب پارتێن دەستهەلات بدەن و ئەگەر نە هەر ب وان دەنگان ل سەر سندوقان سزا بدەن.
· مافپەروەر
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)