ژ دەستدانا شیانێن گەنجی ژی جۆرەکە ژ گەندەڵیێ

مللەتێ مە د قۆناغا ئەڤرۆدا پێدڤیەکا مەزن ب رەوشنبیران هەیە. بێگومان گەنج گرنگترین تەخە د جڤاکیدا کو دشێت جهێ رەوشنبیرێن دانعەمر ئەڤێن خودان شەهرەزا و سەربور بگریت، دا جڤاک بکاریت ب مەژییەکێ ڤەکریتر سەرەدەریێ دگەل گوهۆرین و رویدانێن ژیانێ بکەت. ل ڤێرە یا گرنگە بێتە زانین کا دەزگەهێن مە یێن حکومی تا چ ڕاددە دیموکراسیەتێ د چەسپینن. بێگومان هینگێ دێ زانین کا چەند ئەو دهزر ڤەکرینە دسەرەدەریکرنا دگەل گەنجێن خۆدا. لەو ئەگەر ئەو حوکمەت شیان نەبن پاراستنێ ل سەر هێز، شیان و ئۆمێدێن گەنجێ خۆ بکەت. یان نەزانیت گەنجێ وی د چ بوارێن ژیانێدا دێ سەرکەفتنێ ئینیت، وی دەمی جهێن بەرپرس ژ سەرکردە و حوکمەتا مە ل هەڕێما کوردستانێ دێ سامانەکێ مەزن د پێشئێخستنا کۆمەڵگەهێ مە ل هەرێمێ ژ دەستدەت. بێگومان ژ دەستدانا وان بۆ هزر و شیانێن گەنجێ خۆ هەر جۆرەکێ دییە ژ گەندەلیێ. نە تنێ گەندەلیا ماددی، بەلکی گەندەلیا هزری. لەو ئەگەر مە جڤاکەکێ ساخلەم ژلایێ رەوشنبیری ڤە بڤێت، تڤیا جهێن شۆلەژێ ئاراستەکرنا گەنجی بۆ بەرەف رێکێن ساخلم ڤە ببەن. لێ ئەگەر گەنجی هەستکر یێ هاتیە پشتگوههاڤێتن، بێگومان دێ بەرەف ئاراستەکا شاش و ئاڵوزڤە چیت. د ئەنجامدا دێ جڤاک ژی ب ههمی کت و مل ڤە، بەرەڤ رێکێن شاش و تارڤە چیت.

لەو ئەگەر گەنجەک توشی سترێسێ بیت، دێ جڤاک ژی بەرەف وێ سترێسێ کەڤیت، و ئەگەر چارەسەری نەبوو یا دویر نینە ئەو گەنج خۆکوشتنێ بکەت و دئەنجامدا جڤاکێ کوردی ههمی دێ بەرەف خۆکوشتن و نەمانێ چیت. یان ئەگەر گەنجی بڕیاردا هێشتا بژیت ژی دێ ژ نەچارەیی و بێ ئۆمێدیا خۆ فێری ب کارینان و بازرگانیکرنا حەشیش، تریاگ و دەرمانێن بێهۆش بیت. د ئەنجامدا پرانیا جڤاکی دێ بێهۆش بیت. ل ڤێرە گرنگە کا چاوا هاندانا گەنجی بێتە کرن و ئەگەر دبوارەکی دا سەرنەکەفت ژی چ دایباب یان جهێن بەرپرس ژ گەنجێن مە بزانن کا د چ بوارێ دیدا دێ سەرکەڤیت. بزانن دێ چاوا پشتەڤانیا وی کەن و ب ئۆمێد ئێخن، دەلیڤێن کاری و شارەزایێ دهەر کارەیدا بدەستڤە ئینن. هەروەسا دەلیڤێ بدەنێ دربرینێ ژ هەست و شیانێن خۆ بکەن. یان د چ بوار دا دێ شێن خزمەتێ کەن؛ چ جڤاکی، سیاسی، وەرزشی یان تەکنۆلۆژی و هۆسا. لێ ددەستەکیدا، دڤێت حوکمەت هەمی پێکۆڵا بکەت، هەمی خزمەتگوزاریا بۆ گەنجان تەرخان بکەت، هاریکاریێن ماددی بۆ وان بکەن و ددەزگەهێن حوکومی و میریدا بێنە دامەزراندن. ل دویڤ شیا و باوەرنامێن وان دا بشێن خزمەتێ ل خۆ و جڤاکێ خۆ بکەن. دیسا گەنجێ مە وەسا بێتە هشیارکرن و تێگەهاندن کو بوهایێ وی یێ ڕاست و دورست ئەوە کار بکەت و خزمەتا جڤاکێ خۆ بکەت. نەک هەر ژ جڤاکێ خۆ بخۆت و ببیتە کەسەکێ بێ بەرهەم دناڤ مللەتێ خۆدا.

  • مامۆستایە و ل وەڵاتێ بریتانیا دژیت

 

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top