ئەگەر ئەم بزڤرینەڤە بۆ دیرۆکا پڕ سەروەریا رزگاریخوازیا کوردستانێ، دێ بینین کو ل بەرخودان، قوربانیدان و خۆراگریێ دا هیچ درێغى نەکرییە. سەرهلدان و شۆرش ل دویڤ شۆرەشێن چەکدارى بەرپاکرینە. لێ ل هەڤگرتنا تەبایى کو هەمى دئێک سەنگەردا بن، تا دویماهیا سالێن هەشتیاندا ل کوردستانا مەزن ب گشتى و نەمازە ل کوردستانا باشوور ل چەرخێ بیستێ، نەشیاینە ڤێ ئارمانجێ بگەهینن و د هەڤگرتى بن. ڤێجا چ ل بەر ئەگەر و سەدەمێن ناڤخۆیى بن یان دەرەکى. ئەم دپشتراستین ژى کو هەردەمێ هەڤگرتن هەبیت، سەرکەفتن یا مسۆگەرە و بەلگەه ل سەر گوتنا مە سەرهلدانا بهارا پیرۆزا کوردستانا باشوور ل 5/3/1991ێ. هینگێ بەرەیێ کوردستانى هەبوو ب سەرپەرشتیا سەرۆک مەسعود بارزانى. سەرەراى بیروبۆچوونێن سیاسى یێن جودا جودا و هەمى لایەنێن سیاسى یێن شۆرشگێرێن کوردستانێ ل بن چادرا بەرەیێ کوردستانى کۆم ببوون. بوونە خودان ئێک هەلویستێ نەتەوى و بهەڤکارى دگەل جەماورێ خۆراگرێ کوردستانێ شیان مەزنترین سەرکەفتنا نەتەوى و نیشتیمانى ددیرۆکا بزاڤا ئازادیخوازا کوردستانێدا ل کوردستانا باشوور تۆمار بکەن. ئەڤ پارچا کۆردستانێ ل ژێر زولم و ستەما رژێما بەعسا دکتاتۆر و ئەنفالچى رزگار کرن، سیستەمێ دیموکراسى بۆ برێڤەبرنا دەستهەلاتا حکومەتێ پەیرەو کرن و بوونە خودان سەرۆکایەتیا هەرێم، پەرلەمان و حکومەت و رۆژ ب رۆژ د پێشڤەچوونێ دا بیت. ب رزگاربوونا ئەڤێ پارچەیا کوردستانێ بوویە پەناگەهەک بۆ پارچێن دى یێن کوردستانا مەزن.
ئەڤرۆ ژى کو مللەتێ کورد دهەر چوار پارچێن کوردستانێ ب گشتى و نەمازە هەرێما کوردستانێ ل باشوورێ کوردستانا مەزن، د مەترسیترین قویناغدا دەرباز دبیت. دوژمن و نەحەزێن کوردستانێ دبوسە و پیلاناندانە دژى هەرێما کوردستانێ، نەمازە رێکخراوا تیرۆریستا داعش کو ل روویدانێن ڤێ دویماهیێ ب ئاشکرا هێرش ئینا سەر چەند دەڤەرێن کوردستانى یێن دەرڤەى هەرێما کوردستانێ. لێ ب هیمەت و خۆراگرییا پێشمەرگەهێن قەهرەمانێن کوردستانێ، شیان بەرسینگێ وان بگرن و ب سیاسەتا حەکیمانە یا سەرۆک بارزانى و سەرکردایەتیا کورد ل باشوورێ کوردستانێ کارین مەزنترین دەولەتا زلهێز، کو ئەو ژى ئەمریکا و هەڤپەیمانێن وێ بیننە سەر خەتێ و ببنە پالپشت و هاریکار بۆ لێدانا بنگەهێن تیرۆریستى و هنارتنا چەک و تەقەمەنى بۆ دژایەتیکرنا ئەڤێ دەولەتا تیروریستى، ئەوا بناڤێ داعش یان دەولەتا بناڤێ خەلافەتا ئیسلامى و ئەوا ل ژێر پەردەیا ئایینێ پیرۆزێ ئیسلامێ، مەزنترین تاوانێن دویر ژ پرەنسیپێن ئایینى، ئەخلاقى و مرۆڤایەتى ددەرحەقى کورد و کوردستانیا ئەنجام ددەت. ب هەرحال فەرە ئەڤرۆ بەرەیەکێ کوردستانى یێ نیشتیمانى و نەتەوەیى و ب هەمى لایەنێن سیاسى یێن کورد و کوردستانى ل هەر چوار پارچەیێن بهێتە دامەزراندن. دویر ژ حزبایەتیا بەرتەسک و ئارمانجا نەتەوەیى ل پێشیا هەمى ئارمانجەکا دى بیت، تاکو بهەڤکارى دگەل دەولەتێن هەڤپەیمان بکارین و مفایى ل ڤان گۆرانکاریێن کو دێ هێنە کرن ل رۆژهەلاتا ناڤین وەربگرین و ل سەر ئەڤى دوژمنێ سەرسەخت زاڵ ببین و بگەهیننە ئارمانجێن دویماهیێ کو ئەو ژى دەولەتبوونا کوردستانێ یە.
بۆ ڤێ مەبەستێ سەرکردایەتیا سیاسى یێن لایەنێن سیاسى یێن کوردستانى د داخواز کرینە کو ب زووترین دەم کۆنگرەیا نەتەوەیى سازبکەن. لێ ژبەر چەند ئەگەرەکا هەتا نوکە نەهاتیە گرێدان، سەرەراى هندێ کو بەرى هێرشێن داعشێ بۆ سەر عێراق و کوردستانێ، هندەک ئامادەکارى ل هەولێرا پایتەخت بۆ هاتبوونە کرن. هەروەها د داخازکرینە کو بەرەیەکێ هەڤگرتى یێ کوردستانى دابمەزرینن و رابگەهینن و هزر دڤێ چەندێ دا بهێتە کرن کو ئەڤرۆ سەردەمێ پەیرەوکرنا سیستەمێ دیموکراسیەتێ یە. نەک یێ دەرئێخستنا بڕیارێن تاکرەوى و هەردەمێ هەر پارچەیەکا دى یا کوردستانا مەزن رزگار بوو، دکارن مفایى ژ سەربورا هەرێما کوردستانا باشوور وەربگرن، ب هەلبژارتنان دەستهەلاتا خوە برێڤە ببەن. دیسان ئەڤ بەرەیە بڕیار بهێتەدان کو هەر دەما پارچەیەکا کوردستانێ تووشى داگیرکارى و زولم و هێرشان بیت، لایەنێن سیاسى یێن پارچەیێن دى ب هەموو شێوەیەکێ هاریکاریا وێ پارچەیێ بکەن دا بشێت بەرەنگارى ڤان هێرش زولمکارییا ببیتەڤە. چونکە ب هەڤگرتن و تەبایى دێ کارین ل سەر هەمى دوژمن و نەحەزا زاڵ بین و خەون و پیلانێن وان بن گۆر بکەن. ڤێجا بلا بەس بیت ئەو گوتنا کو دبێژیت ب تنێ ئەز بم و کەسێ دى قەبیل نەکەم. چونکە ئەو سەردەم نەمایە و ئەڤرۆ سەردەم سەردەمێ دیموکراسیەتێ و دەستهەلاتا گەلى یە. فەرە ئەڤە ژى ل بیرا مە نەچیت کو ئەڤرۆ پتر هەمى وەختەکێ کورد پێتڤى ب رێککخستنا ناڤمالا کوردى یە کو هەمى ببنە خودان ئێک هەلویستا نەتەوى و نیشتیمانى. چونکە ئەڤ قۆناغا ئەم تێدا دەرباز دبین قۆناغەکا هەستیارە و نەمازە چاڤەرێ گۆرانکاریێن مەزن دهێنە کرن ل رۆژهەلاتا ناڤین.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)