بەری چەند هەیڤان مە سەرەدانا گۆڕێ مارگرێت جۆرج کر ل گوندێ دۆرێ ل دەڤەرا بەرواری باڵا. ئەو یەکەم ژنا پێشمەرگە و یەکەم پێشمەرگەیا شەهید ژی بوو کو بەری نێزیکی نیڤ سەدێ و ب دروستی ل ٢٦ی کانوونا یەکەمان ١٩٦٩ هاتیە شەهیدکرن. گۆڕا وێ ژنوی هاتبوو نووژەنکرن و ئەم یەکەم سەردانکەر بووین پشتی نووژەنکرنێ. ژ وێرێ ئەم ژووردا هاتیینە خارێ بەرەف مالا “مەتەکا” مە ل هەمان گوند و دەما بەحس هاتییە سەر شەهیدا نەمر، “مەتێ” ب تنێ سەرێ خوە هەژاند و هەناسەکا خەمگین هەلکێشا و گووتی “د خەوێدا شەهیدکرن!”. پاشی ئەم چووینە خزمەتا مامۆستایەکێ دێرین ل گوندێ شمایلا ل هەمان دەڤەرێ. مامۆستای مێڤانەك هەبوو و وان ل ناڤ باخچەیێ خانی یێ بچووك و جوان پێشوازی ل مە کر. مێڤانێ نەناس دەستێ بابێ من ب گەرمی و دلخوەشی گڤاشت و گووتی “ئەز دزانم تۆ من نانیاسی! لێ ئەز تە دنیاسم.. بەری پتری پێنجی ساڵان تە گەلەک بەرەڤانی ژ مە دکر دا هندەك تەعدایێ ل مە نەکەن!”
هەڵبەت ئەڤ هەردوو گوندێن مە سەرەدانا وان کری، یێن مەسیحییانە و ل دەستپێکا شۆڕەشا ئەیلوولێ هژمارەکا گەنجێن وان ببوونە پێشمەرگە. ب تایبەتی گوندێ دۆرێ کو ل گۆر زانیاریێن من یەکەمین شەهیدێن شۆرەشێ (مێر و ژن) ژ وی گوندی بوون. لێ پشتی بوویەرا شەهیدبوونا مارگرێت جۆرج، رەوشا وان گەلەك هاتە گۆهڕین و تشتێ کو نوکە ل ڤان گوندان دهێتە دیتن ئەوە کو ئەو جۆشا سەردەمێ شۆرەشێ و هەستا ئینتیمایێ بۆ کوردستانێ خاڤ، سست و بەرەف نەمانە و بەلکو خرابترە ژی. بۆ نموونە نوکە گەلەك ژ “مەسیحی”یێن وێ دەڤەرێ کو هەمی کور، کچ، پسمام، دۆتمام، خزم و کەسوکارێن “مارگرێت جۆرج”ن، رێنادەن پێشمەرگەکێ موسڵمان خانییەکی ل سەنتەرێ ناحیا کانی ماسی ئاڤاکەت!! بەری چەند ساڵان من پرس ژ خووشکەکا مارگرێتێ کر کا کێ خووشکا وێ شەهید کرییە، دبەرسڤێ دا گووتی “تیرۆرستان”. من ئەڤ پرسە ئاراستەی بەرپرسەکێ سیاسی یێ شۆڕەشێ ل وی سەردەمی ژی کر و من گووتێ ژی کو خووشکا وێ ئەڤ بەرسڤە دایە من، بەڕێزی ژی هەمان ئاخفتن هەبوو و گووتی “خووشکا مارگرێتێ بەرسڤا دروست دایە تە.. تیرۆرستان شەهیدکریە!”.
ب راستی ئەز نزانم ئەو “تیرۆرست” کینە و چارەنڤیسێ وان چ لێهاتیە؟ لێ یا ئەز دزانم ئەوە کو وان “تیرۆرستان” ب ڤێ کریارێ نە تنێ ڤیایە پێشمەرگەیەكی/ێ ب کوژن. بەلکو ئارمانجا وان بەری هەر تشتەکی کوشتنا ژنەکێ بوو دا ژنان پێ بترسینن و چاڤ لێ نەکەن، پاشی کوشتنا ئازادیێ بوو د ناخێ وێ ژنێدا دا چ ژنێن دیژی بیر ل وی کارێ وێ نەکەن و ل دووماهیێ ژی کوشتنا پێکڤەژیانێ بوو کو پەیرەوێ خەلکێ وەڵاتی بوو. مخابن نموونەیێن ڤان “تیرۆرستان” هەتا نوکە ژی دناڤ مەدا هەنە و گەشێ دکەن. لەوما هێشتا ل وەڵاتێ مە مارگرێت دهێنە کوشتن، ئازادی دهێنە بەرتەسککرن و پێکڤەژیان دهێتە شێلیکرن. دوهی شیان پشکەکا مەزن یا مەسیحییان ژ جڤاکێ کوردستانی جوداکەن و ناکۆکیێ بێخنە دناڤبەرا (سۆران و بەهدینان)دا. ئەڤرۆ ژی پشکەکا مەزن یا ئێزیدییان دوورکرینە و بێگومان ئەگەر رێیا وان هەر هۆسا یا خوەش بیت دێ هێشتا کوورتر چنە دناڤ جڤاکیدا و دیوارێن بلندتر دناڤ چیناندا ئاڤاکەن! ژبەرکو ئەڤە خرابکارن و ژ ئەزەل کارێ وان تیکدانە، فایلدارن و هندی دوژمنەك مابیت دێ سیخۆریێ بۆ کەن، تابۆرێ پێنجێنە و کارێ وان سستکرنا مۆرالا شۆرەشگێرانە، هەلپەرستن و هەر گاڤا خەبات هەلنگفت دێ بێژن رێبەر خاینە و پێویستە بهێتە سزادان، ئەنفالچینە و ئارەزوویا وان زیندەبەچاڵکرنا خەلکییە، جاشن و ب چ تەرزان دەست ژ زڕینێ بەرنادەن و…).
لەوما دڤێت رێبەرێ مە (سەرکردایەتیا سیاسی) ڤان ژناڤببەت یان ب کێماسی گۆشەگیر بکەت دا چ بزاڤان نەکەن! وەکی چاوا د چیڤانۆکا شاهێ ب ناڤێ (خودانێ دوو شاخان)دا دهێتە ڤەگێران کو وی شاهی مللەتەکێ خرابکارێ خوینرێژ ب ناڤێ (یاجۆج و ماجۆج) بۆ هەتا هەتایێ ل ژێر ئەردی دیل و گۆشەگیر کرینە. بەرەڤاژی ڤێ یەکێ ژی ب باوەرییا من یا مایی دێ گەلەك کمباختر بیت!
