بلا گەلەك دویر ل بەختەوەریێ نەگەرین

ئارمانجا سەرەكی یا هەر كەسەكی دڤێ ژیانێدا پەیداكرنا بەختەوەریێ یە. ئەڤ پێكۆلە هەر ژ دەسپێكا پێگەهشتانا مرۆڤی بۆ ژیانێ دەستپێدكەت و هەتا دوماهی رۆژ ژی ئەڤ پێكولە یا بەردەوامە. چ پێناسێن جهگیر نینن بۆ خۆشیێ، چونكی ل هەر جهەكی و ل دەڤ هەر كەسەكی ب رەنگەكییە و هەر ئێك خۆشیێ د تشتەكیدا دبینیت. بلا گەلەك دویر ل بەختەوەریێ نەگەرین كو د شیان دایە ژ بچویكترین تشت ژی پەیدا ببیت. دبیت هندەك جارا خۆشی گرنژینەك بیت یان گوتنا پەیڤەكا خۆش هەم دێ كەسێن ل دەوروبەر دلخۆش كەی و هەم ژی دێ دناخێ خۆدا هەست ب ئارامیێ كەی. گەلەك ئەگەر هەنە ژ مە ب خۆ دەستپێدكەن داكو رۆژا مە نەخۆشكەن. وەكو مایتێكرن دكارێن وان كەساندا یێن مە پەیوەندی پێڤە نەبیت. یانژی چاڤلێكرنا كەسێن ژ خۆ بلندتر، یانژی ئەو كەرب و كینا ناخێ مە داگیركری و گەلەك جار پرسیار ژ دانعەمرەكی دهێتەكرن، ئەرێ د بەرێدا خۆشتربوو یان نوكە؟ ئەو كەسە بێی دوودلی دێ بێژیت بەرێ! بۆچی؟ دێ بێژیت “بەرێ ژیانا مە یا سادەبوو، دلێ خەلكی یێ پاقژ بوو و كەرب و كین نەبوو.

ئەرێ بۆچی نوكە كەرب و كین هەیە و بۆچی د نوكەدا دلێ خەلكی نەیێ پاقژه؟ ئەز دبێژم د بەرێدا خەلك هەمی چینەك بوون و ژیارا وان هەمیا وەكی ئێك بوو. ئەرێ ما دا ل سەر چ تشتی حەسیدیێ ب ئێك و دوو بەن؟! د نوكە دا هەر ئێكی بۆ خۆ ب تنێ دڤێت و هەر ئێك پێكۆلان دكەت ژ یێ دی پتر مال و مولك هەبیت. رازی نابیت یێ بەرامبەری خۆ بینیت كو ژ وی باشتر بیت و پتری وی مال و زاروك هەبن. یان ژیانا وی خۆشتر بیت و…هتد. هەر ئێك پێكۆلا هندێ ددەت پلەكا مەزنتر بدەست خۆڤە بینیت. هزر دكەت ئەگەر ئەو پلا وی ڤیا گەهشتێ، دێ بەختەوەر بیت. بلا خۆ مافێ ویژی نەبیت، بلا بدزیت یان ژ هەژارەكی بستینیت. یا گرنگ ل دەف وی ئەوە تشتێ وی ڤیا بدەست خۆ بێخیت. بەلێ د راستیدا سروشتێ مرۆڤی یێ وەسایە کو ب چ تشتان رازی نابیت و بەردەوام پێكۆلا هێشتا و باشترینێ دكەت. یا باشتر ئەوە خۆ ب گونجینین دگەل دەوروبەرێن خۆ و ئەو ژینگەها ئەم تێدا دژین، رازی بین ب وێ ئەوا مە هەی، بۆ خۆ بژین و ناخێن خۆ پاقژ بكەین و چەوا مە بخۆ بڤێت وەسا بۆ دەوروبەرێن خۆ ژی بڤێت. ل وی دەمێ كو ل جهێ ئەم ل بەختەوەریێ بگەرین، دێ بینین بەختەوەری ب هەمی ناڤ و رامانێن خۆڤە یا بەرەڤ مەڤە دهێت.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top