چەند رۆژە ل سەر مالپەرێن تۆڕێن جڤاکی گەلەك بەحسا نادیا موراد و وەرگرتنا خەلاتێ نۆبل دهێتە کرن. هژمارەکا مەزنا کوردان ب تایبەتی گەنجێن خوینگەرم رەخنەیێن توند ل نادیایێ دگرن و تەنانەت ئاخفتنێن کرێت ژی ئاراستەی وێ خانمێ دکەن. ژبەرکو وێ ب کوردی نە ئاخفتییە و بەحسا پێشمەرگە و کوردان ژی نەکرییە. بەلکو ب عەرەبی ئاخفتییە و سوپاسییا عیراقێ کرییە! هەڵبەت ئەڤ گازندە و رەخنە چەند ساڵە دووبارە دبیت ل سەر ڤێ کچا قوربانی. هەمی ئەڤ کەسێن رەخنەگر دبینن کو نادیا کەسەکا بێ سۆزە بەرامبەر قوربانیدانا ب هزاران پێشمەرگەیێن کو بۆ رزگارکرنا وێ و دەڤەرێن وان شەهید و برینداربووینە. هەروەسا بێ وەفایە بەرامبەر نەتەوەیا خوە و خووشک و برایێن خوە یێن کورد کو ب سەدان هزاران ئاوارەیێن ئێزدی حەواندینە. ل ڤێرە راستییەك هەیە کو ناهێتە ڤەشارتن و ئەوژی ئەوە کو پترییا ئێزیدیان دبێژن ئەو نە کوردن. ب تایبەتی ژی خەلکێ شنگالێ و دەوروبەران. جوداهییا دناڤبەرا وان و نادیا مورادێدا ئەوە کو نادیا خان کەسایەتییەکا ناڤدەولەتی یا ئازادە و دشێت بێ ترس و دوودلی هەر تشتەکی بێژیت و ئەڤ چەندە د کار و رەفتارێن وێدا دیارە. لێ یێن دی پتریا وان ئاوارەنە و ژ رەوشا خوە دترسن، لەوما ڤێ چەندێ ددلێ خوەدا دهێلن.
هەڵبەت گەلەک جاران ئەم هندەك کەسێن ئێزیدی ل سەر شاشەیێن تەلەڤزیۆن و ددەزگایێن میدیاییدا دبینین کو بەحسا کوردبوونا خوە دکەن. لێ ب باوەرییا من هژمارا وان یا کێمە. ئەو ژی یان ئەندامێن حزبەکا دیارکرینە، یانژی فەرمانبەرێن حکوومەتێنە یانژی بازرگانن. تشتەکێ ژ ڤان هەموویان ژی گرنگتر هەیە کو مخابن بەحس ل سەر ناهێتە کرن. ئەو ژی هۆکارێن دوورکەتنا نادیا موراد و ئێزیدییانە! گەلۆ چییە وەدکەت کو ئێزیدی و ب تایبەتی یێن شنگالێ ژ کوردان و پێشمەرگەی ب رەڤن، دوورکەڤن و تەنانەت تۆڕە و دلتەنگ ژی ببن؟! ب باوەرییا من یەك ژ وان هۆکاران ڤەدگەڕیت بۆ بوویەرێن پشتی ٢٠٠٣ و نەمانا رژێما سەدام حسێن. دەما کو شنگال کەتیە بن کۆنترۆڵا پێشمەرگەی و شنگالیان ب تلیلی و کەیف پێشوازی لێ کری. لێ ئەو کەیفا وان گەلەک ڤەنەکێشا، ژبەرکو هندەك بەرپرسێن وان پێشمەرگەیێن وان شاهی بۆ هاتنا وان گێرای ب زفری رەفتار دگەل وان کر، وەکو هاونیشتیمانیێن پلە دوو هژمارتن، بێبارکرن ژ پۆست و پلەیان، کێمترین خزمەتگۆزاری پێشکێشکرن، دەرفەتێن کاری نەهێلان و هژمارەکا کەسێن زەحمەتکێش و کوردپەروەر دوورکرن، مەزارگەهێن وان پشتگوهخستن و…هتد. بەڵگە ژی ل سەر ڤێ گووتنێ ئەوە کو شنگالی ژ هەموویان پتر دتۆڕە و دلتەنگن.
ئەز دبینم کو نادیا موراد وەفادارییەك هەیە بۆ پێشمەرگە، گەل و نەتەوەیا کورد. هەروەسا هاریکاریێن بەڕێز نێچیرڤان بارزانی ژی ل بەرچاڤ دبینیت درزگارکرنا وێ و هەڤالێن وێدا و پشتەڤانیکرنا وێ هەتا نوکە. لەوما ئەو بەحسا دەردەسەریێن بەری هاتنا داعش ناکەت و ئەگەر بکەت ژی گازندە ل سەر نابیت. ژبەرکو راستییەکە و ئەو دگەلدا ژیایینە. ئەڤجا ژبۆ کو بۆ ئێزیدیان دیارببیت کو ئەو پشتگوهخستن، کار و رەفتارێن توندێن بەرامبەر وان هاتینە ئەنجامدان رەفتارێن کەسان بوون نەیێن دەستهەڵاتا کوردی، پێویستە پارتی دیموکراتی کوردستان وەکو دەستهەڵاتدارا دەڤەرێ ل کۆکا ڤێ ئاریشەیێ بکۆلیت. پێنگاڤەکێ بهاڤێژیت و لێپرسینێ دگەل وان گەندەڵان بکەت یێن کو ئەڤ جوداهییا چینایەتی ل شنگالێ دروستکری و کرییە سیستەم و ل سەر چووین و دەرئەنجامێ وێ ژی ئەڤەیە یا ئەم دبینین.