هەر ژ دەستپێکا سەرهەلدانا باشوورێ کوردستانێ و، دامەزراندنا یەکەم حکومەتا ڵاواز و تژى حیزباتى، باشوورێ کوردستانێ دچەندین قۆناغێن سەختێن دەستکرددا دەربازبووە. دئەڤان کادودانێن خراب و دژواردا وەک شەرێ براکوژیێ و قەیرانا دارایى …هتد، تنێ هەڤوەڵاتیان باجا ئەڤێ چەندێ دایە. چونکو چەندین وەڵاتێن جیهانێ دچەند ساڵێن کێمدا گەهشتینە بلندترین ئاستێ پێشکەفتنێ ژلایێ ئابوورى، سەربازى و بازرگانێڤە. لێ مخابن (27) ساڵین سەربخۆبوونێ ل ژێر دەستێ دوو حیزباندا ئەم نەگەهشتینە چ تشتەکێ دلخۆش و، تانها دبێژن حکومەتا مەیا ساڤایە!! دەستنیشانکرنا کورێ مەزن یێ بەرێز مسعود بارزانى بۆ کابینەیا نوو یا حکومەتا باشوورێ کوردستانێ، ب دیتنا من گۆرینێن وەتۆڤ و ل ئاستێ پێتڤى ناهێنکرن. چونکو دبینم کەسەکە ژلایێ هەوالگێریێڤە شارەزا و ب ئەزموونە. ئەز دبینم حکومەتەک پۆلیسى و هەوالگیرى دهێتە ئافراندن. چێدبیت ئەڤێ حکومەتێ گەلەک باشیێن خۆ هەبن. لێ خەلکى خزمەت دڤێتن نەک یاسایێن سەربازى و گەلەک توندکرنا یاسایان ل سەر هەژاران. چونکو دڤى وەڵاتیدا ئەگەر تۆ حیزبى نەبى، ئەگەر تۆ کورە ئاغاو ژ بنەمالەک بەرنیاس نەبى، دێ یاسا تە داعیریتن و کەڤى دزینداناڤە. ژبۆ راستیا ئاخفتنا من هنگۆ کورێ کیژ بەرپرسى یان ئاغاى یان بازرگانەکێ گەندەڵ دزینداناڤە دیتى یە؟
هەر تاکەکێ ڤى وەڵاتى چاڤێ ل چەند پێنگاڤەکێن ڤێ حکومەتا نوو یا کو رێزدار مەسرور بارزانى پێک دئینیتن. وەک موچە، سزادانا گەندەڵان، راکرنا هندەک رێڤەبەرێن وەک پادشایان چەندین ساڵە کورسیک چۆلنەکرى، دامەزراندنا دەرچوویێن زانکۆیان، زڤراندنا موچەیێ کەمئەندامان و دادگەهـکرنا بکوژێن روژنامەڤان و راگەهاندکار و ژنکوژان. ل دوماهیێ گۆرین دێ هێنەکرن، لێ دبەرژوەندیا هەڤوەڵاتیاندا نینن. چونکو تا نها حکومەتەک ساڤایە ب دیتنا دەستهەڵاتدارێن باشوورێ کوردستانێ. لێ هەڤوەڵاتى هشک بوون و بێ هیڤى نە ژ ڤان سەرکردان. چونکو (27) ساڵە سۆزێن بێ کریار ددەن، خەلکى دخاپینن و هەر چاڤێ وان یێ ل کورسیک و پلە و پۆستان. ئەو گاڤا ڤێ حکومەتا نوو کورێن بەرپرسان و رێڤەبەرێن گەندەڵ ب تەمامى سزادان و ل راگەهاندنێ بوو هەموو خەلکى دان دیارکرن، هەموو خەلک ب ئێک ئاست دیت و ل دووڤ پێڤەرێن زیرەکیێ پۆست هاتن پارڤەکرن و یاسا بۆ تەڤ خەلکى ئێک یاسا بوو.. وى دەمى دێ ئەڤ حکومەتە بسەرکەڤیت. دڤێت حکومەتەک تژى خزمەت بیت، تژى سزایێن وەکهەڤ و بێ جوداهى بیت، ئەگەرنە دێ هەمان حکومەتا بورى بیت و دێ هەر بێژن حکومەتەک ساڤا مە یا هەى. لێ پێشڤەچوونێن دبەرژوەندیا هەڤوەڵاتیان دا بیت، ئەز تنێ دوو ساڵان دبەرژوەندیا هەڤوەڵاتیاندا دبینم.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)