دچنە بەغدا بۆ دیتنا (عەبادی) ئەوێ ھاتیە وەسفكرن ژ ئالیێ وانڤە ب خیانەتكاریێ. ھەروەسا بۆ دیتنا نوری مالكی ئەوێ ھاتیە وەسفكرن ب بڕینا مووچەیێن كوردستانێ، پاش ھادی عامری دبینن ئەوێ ھاتیە وەسكرن ب داگیركرنا ئەردێن كوردی. ھەروەسا ئەبو مەھدی موھەندس دبینن ئەوێ داخازكری ژ ئالیێ ئەمریكاڤە. ل دوماھیێ قاسم سولەیمانی یێ ئیرانی دبینن كو ئەوژی داخازكریە ژ ئالیێ ئەمریكاڤە. ئەڤ سەرەدانە ھەموو بۆ دەربڕینا نیازپاكیا ھەرێما كوردستانێ دگەل عیراقێ. ب راستی ئەڤ چاڤپێكەفتنە كارەساتن د مێژوو و خەباتا مللەتێ كوردیدا. ئەرێ ئەوان ژبیركر کو ب دەھان پێشمەكە شەھید بوون ل (16) ئۆكتۆبەرێ؟ ئەوێن سەرەدانكرین بۆ بەغدا ھەردەم دروشمێ (یان كوردستان یان نەمان) بكاردئینا. باشە بۆچی چوون، ما ئەو دروشم نە بنەما بوو؟
بەری ساڵەكێ ھەوە دگۆت دێ دەولەتا كوردی بیت و ھەوە گشتپرسی كر. پشتی ھنگێ ھێزێن عیراقی ب فەرمانا عەبادی، ب سەركردایەتیا ھادی عامری و ئەبو مەھدی موھەندس، ھەموو دەڤەرێن ناكۆكی ل سەر داگیركرن بێی شەڕ و ھەوە ڤەكێشان كر ژ وان دەڤەران. وەك كو ئەو دەڤەر ئەردێ عەرەبان و مولكێ عەرەبا بیت و دڤێت ژێ دەركەڤن. ئەڤێ چەندێ ژی رێزگرتنا كوردی شكاند. ئەرێ ئاشتەوایی دناڤبەریا ناڤخۆیی و دناڤبەرا پۆلێن سیاسەتڤانێن كوردیدا دناڤ ھەرێمێدا باشتر نەبوو ژ چوونا بەغدا؟ ئەرێ ھەڤپەیڤین ل سەر ئەردێ كەركووكێ باشتر نینە ژ ھەڤپەیڤینێ ل سەر گازا كەركووكێ ئەوا دھێتە ھنارتن و یەك فلس ناچیتە دبەریكا مللەتێ كورددا، لێ دچیتە بەریكێن گەندەلكاران؟ ھوین ھەردەم دبێژن كەركووك یا داگیركرییە! لێ ژ ئالیێ كێڤە یا داگیركرییە؟ ئەگەر ھوین دەربڕینا نیازپاكیێ دگەل وان سەركردان دكەن ئەوێن ھوین دبێژنێ ھەوە كەركووك یا داگیركری. ئەڤ سەرەدانە بۆ بەغدا بۆ دیاركرنا نیازپاكیێ و چەوانیا ھنارتنا گاز و غاز و ل پێناڤ دابەشكرنا پایەیان. ئەرێ سەرەدانا كەركووكێ باشتر نەبوو ژ سەرەدانا بەغدا؟ چونكو ھەوە دروشمێ خۆ ژبیركر دەمێ ھەوە دگۆتە ھەڤوەڵاتیان “كەركووك دلێ كوردستانێیە”.