هەڤالەکێ من پێشمەرگەیە و کرێدارە. چوار زارۆک هەنە و زارۆیەکێ وی ب نەخۆشییەکا گران یێ نەخۆشە و بتنێ ل نەخۆشخانەیان دگێڕینیت. سێ زارۆیێن وی یێن دی ژی ل قوتابخانەیەکا سەرەتایی ل باژێڕێ دهۆکێ دخوینن. ئێک ژ کوڕێن وی کو ل پۆلا پێنجێ سەرەتایی یە گۆتە بابێ خۆ: “باب مامۆستایان گۆتییە مە هەر ئێک ژ وە دووهزار دیناران بینن دا بۆ هەوە بدەینە ب گاز. ل شوونا هووون د سەرماندا نەخۆش ب کەڤن و پارەیەکێ مەزنتر بدەنە نوشداران، هەر ئێک ژ وە دووهزاران بینن دا ئێدی نەهێلین وە سار ببیت”. بابێ وی ژی تەماشەی من کر و گۆت: “ما ئەڤە ژیانە ئەم تێدا، ئەز ل ئەرکی زێرەڤانیێ ل بۆڕیا گازێ بکەم. ل مال ژی زارۆیێن من ل بەر سەرمایێ بن و ل قوتابخانێ ژی ب هەمان شێوە؟! ما چ ویژدان قەبویل دکەت مە ئەڤ داهاتێ هندە مەزن هەبیت و دڤێ رەوشێ دابین. وەک دبێژن ‘ئەم یێن ڤێ ئاخێ دپارێزین و مە بۆستەک ل سەر ڤێ ئاخێ نییە و کرێدارین!’ ما چ حکوومەتە مە هەی کو نەشێت گازێ بۆ قوتابخانەیان دابین بکەت. ل لایەکێ دیژی زارۆیێن بەرپرسان ل سەر سەرێ مە سەمایێ دکەن. هەموو ل قوتابخانەیێن تایبەت دخوینن و ئەم بۆ وان و زارۆیێن وان شەڤ و رۆژان دکەینە ئێک؟” من ژی بتنێ سەرێ خۆ هەژاند و گۆتێ برا دبێژن: “دێ چێبیت”. بەس ب راستی ژی چێنەبوو و من نەباوەرە چێببیت ژی. چونکی ل ڤی وەڵاتی هندی من ل بیره بەحسێ چاکسازی، پاکسازی و سەروەریا یاسایێ دهێتەکرن.
یا جهێ پرسیارێ ژی ئەوە کو مە نەدیتییە و گوهلێنەبوویە دیڤچوونەک بۆ مال و سامانێن بەرپرسەکی هاتبیتەکرن. یان گۆتبیتێ چەوا ب مووچەیێ خۆ تۆ شیایی ببیە خۆدانێ ڤان هەموو ڤێلە، ئۆتۆمبێل، باخ و بیستانێن جۆراو جۆر؟! مە نەدیتییە و گوهلێنەبوویە سەرا دزی و گەندەڵیێ بەرپرسەکێ ڤی وەڵاتی هاتبیتە سزادان. یان بۆ رایاگشتی هاتبیتە دیارکرن کو سەرا خراب بکارئینانا دەستهەڵاتێ فلان بەرپرس هاتە سزادان! بناڤ چاکسازیا ل ڤی وەڵاتی هاتییە کرن و مە هەموویان دیتی و پێ کەفتینە رەوشەکا خراب. بتنێ پاشەکەفتکرنا مووچەی بوویە ژلایێ حکوومەتێڤە. لەوما ب دیتنا من گۆتنا “هێتلەر”ی ئەڤا دبێژیت (یاسا وەکی تەڤنێ تەڤنپیرکێ یە و بتنێ دشێت پێشیکێن بچویک بگریت) دروست بەرسڤا وێ گۆتنێ یه یا دبێژیت (یاسا سەروەرە). خەلکێ هەژار فیداییێن وە نە ئەڤجا ئەگەر هەمی مافێن وان ژی نەدەنێ بتنێ وەنەکەن ل هاڤینان ل بەر گەرمێ و ل زڤستانان ژی ل بەر سەرمایێ نەخۆش بکەڤن. مووچەیێن وان ب دروستی و د دەمێ واندا بدەن. هوون ژی بەردەوام پلە، پۆست و کانیێن نەفتێ ل سەر هەڤدوو بەڵاڤکەن. چەپەرێ گەشتێن گۆزاری ژی بەرنەدەن و مێر نابێژیتە وە (پێلاڤا ل پێ وە یا خوارە).
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)