هەڤپەیڤین: ئەڤین ئەحمەد
رۆژئارتیکڵ: دەستپێکا كارێ وە یێ راگه‌هاندنێ چاوا بوو؟
(نسيم صباح): به‌ریا نها من ل كه‌نالێ وار تی تيڤى وه‌ك مۆنتێر و پێشكێشكار كار كر و به‌رنامێ (ئه‌ز دبێژم) پێشكێشكر كو به‌رنامێ پرسیار و به‌رسڤان بوو. به‌رنامه‌كێ مه‌یدانی بوو، خه‌لات هه‌بوون و پێزانین ژی د گه‌هشته بینه‌ری. ژ ده‌رهێنانا بینا قه‌ره‌داغی و ئاماده‌كرنا سۆلین قه‌ره‌داغی بوو. پشتی هینگێ من ل كه‌نالێ (ئه‌لمه‌دا) كار كر كو ل سه‌ر ئاسته‌كێ عه‌ره‌بی بوو. ل وێرێ ژی وه‌ك مۆنتێر و پێشكێشكار كاركر و ب زمانی عه‌ره‌بی بوو. وه‌كی دی ژی من كارێ تایبه‌ت بۆ پرۆدێكشنا دكر كو كارێ فلمێن دوكیۆمێنته‌ری بوو.
رۆژئارتیکڵ: ئه‌گه‌ر چ بوون ژ تی ڤی بۆ سۆشیال میدیایێ؟
(نسيم صباح): ئه‌گه‌رێ ئێكێ ئه‌ز نه‌مامه ل كوردستانێ! و ئه‌گه‌رێ دوویێ نوكه په‌یام د سۆشیال میدیایێ دا بله‌زتر دگه‌هیت و دگه‌هیته پرانییا خه‌لكی. چونكی سۆشیال میدیا ئێك ژ ئه‌گه‌رێن كێمبوونا بینه‌رێ كه‌نالانه. نوكه هه‌می ته‌خێن جڤاكی مژیلی سۆشیال میدیایێ و مخابنیڤه سۆشیال میدیا دبادینان دا ب تنێ یا مای بۆ په‌یجێن سنێلا كو تشتێن هه‌ره‌مەكی به‌لاڤ دكه‌ن. هه‌می بوویه په‌یڤێن كرێت و ده‌نگوباسێن دره‌و و پرۆپاگندێن پارتا و كه‌سێن نه بسپۆر خۆ كرینه دگه‌له‌ك بواراندا كو نه كارێ وانە. له‌وا دێ ڤالاهییه‌كا مه‌زن بینی كو یێ ب مفا بیت یان ئه‌كادیمی بیت و وه‌ك ژێده‌ر وه‌رگری یان ژی بینه‌ریا وی بكه‌ی. له‌وا من ژی دیت كو گه‌له‌ك یا فه‌ره به‌رنامێ خۆ ل سۆشیال میدیایێ به‌لاڤ كه‌م. دگه‌ل هندێ ڤالاهیا دسۆشیال میدیایێ دا تژی كه‌م و مفایه‌ك بگه‌هیته خه‌لكی. چونكی وه‌لاتێن دی به‌ری مە راكریه و به‌رێ خۆ ب ته‌مامی دایه سۆشیال میدیایێ و ئه‌م پاشڤه‌ماینه. ژنوی ئه‌ڤه به‌رنامه‌ك هیڤی دكه‌م دداهاتی دا پتر لێ بهێن.
رۆژئارتیکڵ: بابه‌تێن ته هه‌می ره‌خنه‌نه، ئەرێ گه‌ف ل ته نه‌هاتینه كرن؟
(نسيم صباح): گه‌له‌گ گه‌ف دهێن نه‌خاسم ل وه‌رزێ ئێكێ ژ به‌رنامه‌ی. چونكی گه‌له‌ك بابه‌تێن سیاسی هه‌بوون و ئه‌گه‌ر راسته‌وخۆ ژ لایەنه‌كی ڤه نه‌هێن ژ دیڤه‌لانكێن وی لایه‌نی دهێن. به‌لێ نوكه د وه‌رزێ دوویێدا گه‌له‌ك كێمتره، چونكی بابه‌ت پتریا وان جڤاكینه. نه‌ك وه‌كی وه‌رزێ ئێكی. لێ من پێ سه‌یره گه‌فا بكه‌ن. چونكی ل دوماهیێ به‌رنامه‌كێ ره‌خنه‌یی كۆمێدییه. ره‌خنا مه یا ئاڤاكه‌ره و مه چ مه‌ره‌مێن كه‌سایه‌تی دگه‌ل كه‌سێ نینن. ئه‌گه‌ر ره‌خنه ژ كه‌سه‌كی گرت و یێ پشتراست بیت كو یێ درسته ما دێ بۆ گه‌فا كه‌ت؟ ب تنێ ئه‌و گه‌فا دكه‌ت یێ بزانیت یێ خه‌له‌ته و نه‌ڤێت دانپێدانێ ب خه‌له‌تیا خۆ بكه‌ت. ژ به‌ر نه‌باوه‌ری بخۆبوونێ نكاریت بسینگه‌ك به‌رفرهـ وه‌رگریت،ودبيژمێ لجهێ گە فان بکە ن بلا بچن پە رتوکان بخینن، کە سێت زانا گەفان ناكه ن چنكى گه ف كارى نه زانانە.
رۆژئارتیکڵ: تا نوكه هیچ كه‌نالان داخازا پرۆگرامێ ته نه‌كریه؟
(نسيم صباح): گه‌له‌ك كه‌نالان داخازا به‌رنامێ (سحبه‌ت) كریه. د وه‌رزێ ئێكێ دا كه‌نالا به‌رنامه دڤیا. لێ ب وی مه‌رجی كو ده‌ستكاریێ د ناڤه‌رۆكا به‌رنامه‌ی دا بكه‌ن. به‌لێ پا ئه‌ز رازی نه‌بووم. نوكه ژی هه‌تا ٤ كه‌نالا داخازا به‌رنامه‌ی كریه. لێ ئه‌ڤ جاره بودجێ پێتڤی نه‌شێن ته‌رخان كه‌ن. له‌وا هێأ پێكهاتن دگه‌ل چ كه‌نالان نه چێبوویە.
رۆژئارتیکڵ: تۆ دبینی ئه‌گه‌رێن ناڤوده‌نگیا به‌رنامێ (سحبه‌ت) بۆ چ ڤه‌دگه‌رن؟
(نسيم صباح): یا ئێكێ وێره‌كی یا دبه‌رنامه‌ی دا و یا دوویێ ده‌مێ خه‌له‌كێن سحبه‌ت دهێنه خار بینه‌ر وان بابه‌تا د بینیت كو ل هڤییێ بوو ره‌خنه‌ك ل وان بابه‌تا و كه‌سا بهێت گرتن. سه‌ر ڤێ چه‌ندێ را كو دبینیت ئه‌و ره‌خنه یا دروست و ئاڤاكه‌ره و ب شێوازه‌ك كۆمێدی هاته پێشكێش كرن و رێژه‌كا زۆر یا بینه‌ران حه‌ژ كارێكته‌رێ من كر د ره‌خنێ دا. وه‌كی ئه‌م د كۆمێنت و ناما دا دبینین و ئه‌ڤ تشتێن هه وه ل به‌رنامه‌ی كر كو گه‌له‌ك نێزیكی خه‌لكی بیت و زوی به‌ربه‌لاڤ بیت و بناڤوده‌نگ بیت. و دا ژبیر نه‌كه‌م زێده‌كرنا ستافی ژ ریسێرچه‌را و ئه‌كته‌را د وه‌رزێ دووێدا وێ چه‌ندێ ژی كارتێكرنا خۆ هه‌بوو.
رۆژئارتیکڵ: وه‌كی دزانین به‌رنامه هه‌می ژبه‌رهەڤكرنا ته بوو. زه‌حمه‌ت نه‌بوو بۆ ته؟
(نسيم صباح): به‌لێ گه‌له‌ك زه‌حمه‌ت بوو، چنكی دڤێت ئه‌ز ب كارێ هه‌میا رابم. دانانا هزرێ، لێگه‌ریانێ، ئاماده‌كرنێ، نڤێسینێ، گرێدانا بابه‌تان، وێنه‌گرتنێ، مۆنتاژی و هه‌روه‌سا پێشكێشكرنێ بكه‌م. لێ چونكی من به‌ری نوكه كارێ وێنه‌گرتنێ و مۆنتاژی كریه و ده‌ستڤه‌دانا من بۆ زمانێن دی ئه‌و كار به‌ر من ب ساناهی لێ كر. لێ ئاریشا دما ل وێرێ ئه‌و بوو كو گه‌له‌ك ده‌م دچوو هه‌تا بگه‌هم ب وان هه‌می كارا رابم و ل دوماهیێ خه‌له‌كه گیرودبوون. به‌لێ پا پشتی زێده‌کرنا ستافی د وه‌رزێ دووێ دا بارێ من سڤكکر.
رۆژئارتیکڵ: ژبلی به‌رنامێ (سحبه‌ت) ته چ كارێن دی ل به‌ر نینن؟
(نسيم صباح): ژبلی به‌رنامێ (سحبه‌ت) من ل به‌ره پارچه ڤیدیۆیا به‌لاڤ بكه‌م كو تێدا بابه‌تێن هشیاركرنێ پێشكێشبكه‌م. چونكی دبینم ده‌مێ بابه‌تێن به‌رنامێ (سحبه‌ت) به‌لاڤ دبن، هندهك كه‌س نه‌زان ب دروستاهی د بابه‌تی ناگه‌هن. من ژی دیت كو یا فه‌ره هندهك بابه‌تێن هشیاركرنێ به‌لاڤ كه‌م دا پتر دبه‌رنامێ (سحبه‌ت) بگه‌هن. بۆ نموونه بزانن كا جیاوازی چییه دناڤبه‌را ره‌خنێ و هێرشكرنێدا، یان كا ب دروستاهی ده‌ورێ عه‌شیره‌تێ چییه، یان بزانن كا چ یاسا هه‌یه ل سه‌ر وان كه‌سان یێن ته‌شهیرێ بكه‌ن ل سه‌ر سۆشیال میدیایێ. چونكی هێژ گه‌له‌ك ئازادیا راده‌ربرینێ و ته‌شهیرێ ژێك جودا ناكه‌ن. ژبه‌ر هندێ دبینم یا فه‌ره هندهك بابه‌تێن وه‌سا به‌لاڤ بن.
رۆژئارتیکڵ: ته هاریكاریا چ كه‌سێ دی نه‌كریه بۆ دانانا پرۆگرامان یان به‌رهه‌ڤكرنى؟
(نسيم صباح): وه‌كێ من ئاماژه پێ دای ژبلی به‌رنامێ (سحبه‌ت)، كارێ من هه‌ر كارێ وێنه‌گریێ یه و مۆنتاژی دكه‌م. له‌وا گه‌له‌ك جاران به‌رنامە یان ڤیدیۆكلیپان چێدكه‌م یانژی هاریكاریا هندهك هه‌ڤال و گه‌نجان دكه‌م بۆ دانانا بنیاتێ هزره‌كێ یان پرۆگرامه‌كی. چونكی ئه‌م پێتڤی پتر چێكه‌رێن بابه‌تاینه، له‌وا دبینم یا فه‌ره مه گه‌نجێن چالاك پتر هه‌بن.
رۆژئارتیکڵ: پشتی تۆ چوویه ده‌رڤه ته به‌رنامێ ره‌خنه‌یی چێكر و ل كوردستانێ تۆ یێ بێده‌نگ بووی؟
(نسيم صباح): ئه‌ز یێ بێده‌نگ نه‌بووم.. وه‌كی من گووتی من هه‌ر كارێ راگه‌هاندنێ دكر. لێ چونكی ئه‌ڤه به‌رنامه ره‌خنه‌ك پتر وێره‌كی تێدا بوو و دسۆشیال میدیایێدا په‌یام بله‌زتر دگه‌هیت. خه‌لك وه‌سا تێگه‌هشت كو من ژنوی ل ده‌رڤه ده‌ستپێكر. لێ دیسا ئه‌ڤ جۆره ره‌خنه ژ ده‌رڤه‌ی كوردستانێ پتر ئازادیێ دده‌ته تە.
رۆژئارتیکڵ: وەك دبينین هندەک گەنجێن هەولێر و سلێمانیێ هه‌مان به‌رنامە، بابه‌ت و شێوازێ ته چێكرینه. بۆچوونا ته چییه بۆ وان؟
(نسيم صباح): ب راستی كه‌یفخۆشبووم كو من ده‌رگه‌هـ بۆ گه‌له‌كان ڤه‌كر. ئارمانجا من یا مه‌زن ئەوە به‌رنامه گه‌له‌ك هه‌بن د سۆشیال میدیا كوردیدا. له‌وا ل ده‌ف من چ ئاریشه نینن کو ئه‌ڤرۆ هه‌مان بابه‌تێن من چێكه‌ن، به‌لكی سبەهی ئه‌و بخۆ دێ بابه‌تێن خۆ چێكه‌ن.
رۆژئارتیکڵ: تە سایتێ رۆژئارتیکڵ دیت و تە گووتارێن وێ خاندینە. تۆ چ دبێژی بۆ ڤێ گووتارنامەیێ؟
(نسيم صباح): هندی کارێن هشیارکرنێ بۆ خاندەڤانا بهێن کرن باشە، چونکی زێدەتر مە پێتڤی ب وان کاران نینە یێن پێش خویندەڤان و بینەرا هزر و بڕیار بدەن. مە پێتڤی ب کارێن وەسایە کو جەماوەر تێدا هزر بکەت و بڕیار بدەت نەك ئەم.