دەستهەلات ژبۆ بڕیاردانێ یە و هەر بڕیارەک ژی دڤێت د بەرژەوەنیا گشتی دا بیت. دەستهەلات دڤێت سنورێن وەلاتێ خۆ بپارێزیت و ئارمانجا وێ خزمەتکرنا گشتی بیت. ئەڤجا ئەو دەستهەلاتا سەرپەرشتی و بڕیار گرتە دەست، دڤێت بەرپرسیارەتیێ ژی وەرگریت و وەلاتیێن خۆ بپارێزیت. ل ڤێرێ جهێ پرسیارێ یە بۆ دەستهەڵاتدارێن مە، ئایا وە تەنها دەستهەلات بۆ بڕیاردانێ دڤێت و بڕیارێن توند ب دژی خەلکێ خۆ دەربکەن کو نە د بەرژەوەندا واندا بن. تنێ دا ل سەر وان زالبن، زەڤلەکێن خۆ نیشا وان بدەن و دیاربکەن کو دامودەزگەهێن وە یێن حکومی یاسایینە و هەمی رێنمایان جێبەجێ دکەن. بۆ بریڤەبرنا کاروبارێن خەلکێ هەژار ئێک کیتابێ ئاراستەی دەهان دایرێن حکومی دکەن تا بگەهیتە جهێ مەبەست و هەر بێ ئەنجام. ل زانکو و قوتابخانان ژی دەڤێ قوتابیان بهێتە گرتن بەس پەیڤا بێدەنگبە ل بەرامبەر وان هەبیت.
ئانکو حکومەت ژ بچویکترین دامودەزگەه تا مەزنترین جهێ بڕیارێ بەس ل سەر وەلاتیان یا زاڵ و توندە. لێ بەرامبەر نەهامەتیێن گەندەڵێن خۆ و پشتگوههاڤێتا وەلاتیان دبێ بڕیارن. زێدەباری ڤێ یەکێ ژی بەرامبەر تاوانێن تورک و ئیرانان ژی د بێ دەنگن کو هەتا نوکە ب سەدان کەس بوونە قوربانیێن تۆپبارانا سووپایێ تورکیا. مخابن تا نها راگەهاندن ژی وەک دەستهەلاتا چارێ و خودان دەستهەلات و بڕیار، نەشیایە ب چاڤنەترسی فشارێ بێخیتە سەر حکومەت و پەرلەمانی ژبەر تاوانێن تورک و ئیرانێ. ئیتر ئەو راگەهاندنە ژی یا وان سەرکردایە یێن وێ حکومەتێ برێڤەدبەن. پەرلمان ژی فشارێ نائێخیتە سەر وەزیران کو بۆ بەرژەوەنیا گشتی کاربکەن. چونکی حکومەت، پرلمان و دادگەه هەمی پێکڤە ملکێ دوو پارتێن سەرەکی یە. هەمی یێن ئێکن و وەلاتی د بێ خودانن.
باشە هوین وەک حکومەت نەشێن رێیێن خودانکرنێ بۆ وەلاتیان ببینن. پا بۆچی هوین وان ژ مال و مولکێ وان دکەن و سنوورا ناپارێزن و هەلویست نیشاننادەن؟ هوین ب پۆستێن خۆ، بەرژەوەندا خۆ و وەرگرتنا دەستهەلاتێ بوینە بەندەیێن دەولەتێن جیران. لێ نزانم پەرلەمانتارێن کورد ل عیراقێ چ رۆل هەیە؟ ژخوە پەرلەمانێ کوردستانێ بەردەوام بێنڤەدانا رەسمی یە. مە چ پەرلمان نینن، ئەڤجا بلا ل پەرلمانێ عیراقێ فشارێ بێخیتە سەر و هەندەک پرۆژە یاسا بێخنە بەر دانوستاندنێ ژبۆ ڤەدیتنا رێگەچارەیەکێ بۆ وەلاتیێن هەژار. ئێدی وەلات هەمی پێشمەرگەنە و دبێ مووچە.
(گووتار دەربڕینا بۆچوونا نڤیسکارانە نەیا سایت و گووتارنامەیا رۆژئارتیکڵ)
