پێشەکی دڤێت ئاشکرا بکەین دەمێ پەرلەمان و حکومەتا هەرێما کوردستانێ هاتی دامەزراندن یا ساناهی نەبوو. پەرلەمان بەرهەمێ خەبات و شۆرەش و خوینا سەدان هزار نشتیمانپەروەرێن ڤی گەلەیە. ئەڤە دەسکەفتیەکا گەلەک مەزن بوو کو هەمی گەلێ کوردستانێ پێ دلخۆش بی. ژبەر کو گەلێ کوردستان ب خوە بڕیار ددەت و نوێنەرێ خوە دیار دکەت کو ئەڤە نوێنەرێ راستەقینە بەرگری مافێ هاوڵاتیان بکەت. بەلێ جهێ داخە زۆر پێ نەچوو پەرلەمان و حکومەت هەر هەمی تشت کەفتن بن رحما بەرژوەندیێن حزبی و نەدروست. پەرلەمان هات دابەشکرن، خولێن چوویی پەرلەمانێ کوردستانێ زۆر رووداوێن نەخۆش و دویر ئەخلاقێ نیشتیمان پەروەری و خزمەتا هاوڵاتیان رویدانە کو ڤێ پەرلەمان سەنگ و قیمەتا خوە یا راستەقینە کێم کریە. رۆژەک ئێک دکەت مەیدانا شەڕی و ئێکێ دی دەرگەهی دابێخیت و ئێکێ دی پەیرەوی لادەت. دبێژنە ڤێ یاریکرن و شکاندنا شکۆیا پەرلەمان.
دڤێت خالێن پۆزەتیڤ ئاشکرا بکەین، زۆر بڕیارێن گرنگ و مێژوویی هەر ژ پەرلەمانێ کوردستانێ دەرکەفتینە کو جهێ شانازیا هەمیانە. بۆ نموونە بڕیارا هنارتنا پێشمەرگەی باشوورێ کوردستان مل ب ملێ شەرڤانان بۆ رزگارکرنا کۆبانێ، یان پرۆژێن خزمەت یێن جۆر ب جۆر یان بڕیارا ریفراندۆما سەربەخویێ. پەرلەمان دەزگەهەکێ هەرە گرنگە وەڵاتی یه کو دامەزراوەکا تەشریعی بەرنیاسە، کو سێ ئەرکێن سەرەکی هەنە. ئەویش.. یاسادانان، چاڤدێریا کاروبارێن حکومەتێ و گەنگەشەکرنا کێشەیێن رۆژانە. بەلێ ئەگەر پەرلەمان کرداری ئەرکێ خوە یێ دروست رابیت، دڤێت هەر تشت بکەت خزمەتا خەلکێ خوە. بەرنامێ خۆدا خۆشگۆزەرانیا هاوڵاتیان، یەکسانی ئەولەویەت دانن بێ جوداهی. چاڤێ هاوڵاتیان ل پەرلەمانەکێ یە کو خزمەتا هەمی کوردستانیان بکەت.
پەرلەمانەک هەردەما گەندەڵی لایێ هەر بەرپرسەک بهێت کرن، هەر پلە و پۆستەکێ بیت، بشێت لێپیچینێ بکەت و سزا بدەت دا کەسەکێ دی چاڤ ل گەندەڵی نەکەت. دڤێت پەرلەمانتار یێ ئازاد بیت ب جۆرەکێ ئامادەیی تێدا بیت ئەگەر کەساتیێن حزبا وی گەندەڵ بن پشتگیری لێ نەکەت. دیسان ئەگەر هەر لایەنەک یاسا و پرۆژەکێ خزمەت پێشکەش بکەت، ئامادەیی نیشان بدەت کو پشتگیری لێ بکەت. نابیت پەرلەمانتار چ دەور نەبیت وەکی پەیکەرەکێ بیت. زۆر پەرلەمانتار تنێ دەستێ خوە بلند دکەن کو ئەویش ئەمرێ دەرڤە وەردگریت. دێ بینی ئەڤ پەرلەمانتارە بەردەوام بۆ کەناڵێن راگەهاندنێ دئاخڤیت خوە دیار دکەت. ئەگەر دیڤچوونێ بۆ دەورێ وێ بکەی ناڤا پەرلەمانی دا، دێ بینی وەکی پێتڤی ژ ئاستێ داخازیێن دەنگدەرا نەبوویە و زۆر جارا خوە ژ کێشە و گازندێن خەلکی ناکەت خودان یان ژ خەلکی هەر درەڤیت، یان پەرلەمانتار دێ رێکێن جودا بۆ خوە دەرخستن و خوەنیشاندان کو خەمخۆرە دێ بێژیت ئیمتیازاتێن پەرلەمانتاری من حەرام بن و وەرناگرم یان دێ مووچەیێ خوە کێم کەم یان ترۆمبێلێ وەرناگرم.
ئەڤە تشتەکێ خراب نینە بەس چاڤێ هاوڵاتیان خۆشگۆزەرانیە، پارە و داهاتێ مللەتێ تێرا مووچەیێ تە و مووچەیێ هەمی مووچەخۆرا هەیە، ئەگەر شەڕی ل سەر بکەن و دروستاهی دابەشبکەن. پەرلەمانەک دویر ململانیا حزبی و ئێک دوو شکاندن و تۆمەت بەخشین، هەردەما کێشەیێن حزبی و شەخسی ئینان ناڤا پەرلەمانی دا، دێ وەکی جارا تووشی رووداوێن نەخوەش هێین و ئەوا خەلکی نوێنەرێ خوە دڤێت ئەو نابیت. بۆ هاوڵاتیان گرنگ نینە کێ دبیت سەرۆک یان کێ چەند وەزارەت بەردکەڤن یان رێککەفتن چەوا بهێت کرن. گرنگ ئەوە ئەڤ قەیرانە بهێن چارەسەرکرن کو ڤێرە بەرپرسیارەتیەکا مەزن دکەڤیت سەر ملێ حکومەتێ کو دامەزراوەکە جێبەجێکارە. وەڵاتێ پر کانیێن زێری و داهاتێ ملیار دۆلاری کەڤیت خزمەتا وەڵاتی دا، گونەهەکا مەزنە وەکی بەرێ پێناڤ بەرژوەندیێن خوە مللەت بکەن قوربان و قەیران دیڤ قەیرانێ بهێن دروست کرن، بگەهیت وێ ئاستێ وەڵاتێ خێر و بەرەکەت و نیعمەت هاوڵاتی لێ برەڤیت کو دەریا ئیجە ببیت گۆڕستانا کوردستانیان.
- مامۆستا
(گووتار دەربڕینا بۆچوونا نڤیسکارانە نەیا سایت و گووتارنامەیا رۆژئارتیکڵ)