د ڤی ژیوارێ کوردستانێ دا هەمی خەلک ب هەمی تەخ و چینانڤە خوەدیێن ڤێ ئاخێنە. لێ هندەکان مافێن تایبەت و بێسنوور هەنە د “کڕین”، وەرگرتن، دەستەسەرکرن و داگیرکرنا زەڤییان دگەل هەمی جۆرێن سامانێن سروشتی یێن سەرئەرد و ژێرئەرد! و چ لایەن ژی نەشیاینە رێگریێ لێ بکەن. مینا ڤان گران، دروستکرنا ڤێلایان و گرتنا ئەردی ب سیمەی. هەڵبەت گەلەک ژ ڤان مرۆڤان ئەڤ زەڤییە ب پارەیێن خوە نەکڕینە و خانیێن سەفەری ژی لێ ئاڤا نەکرینە. بەلکو بەرپرس و پلەدارن د ئۆفیسەکا حکومیدا ب پارێ گەندەڵیێ یێ دروست کری. ژبەرکو تێکڕایێ مووچەیێ بەرپرسان ل ڤێ دەڤەرێ دورێن دوو ملیۆن دینارانە. ب ڤی شێوەی ژی پێدڤییە ب دەهان ساڵان کۆمکەن هەتا بشێن پارچە زەڤییەکێ بکڕن. ژخوە ئەگەر ڤێلایێ ئاڤاکەن پێدڤییە ب سەدان ساڵان مووچەیێ خوە کۆمکەن دا بشێن وی کاری بکەن! واتە ئەڤ کارە هەمی ب پارە و مولکێ گشتی هاتییە کرن.
ئەڤە ژلایەکی ڤە و ژلایەکێ دیڤە گەلەک پارە و شیانێن حکوومەتێ بۆ گەهاندنا پرۆژەیێن خزمەتگۆزاری بۆ ڤان خانی و ڤیللەیان هاتینە تەرخانکرن و تێچوویا وانژی گەلەک بوویە ل سەر حکومەتێ. مینا دروستکرنا جادێ، راکێشانا هێلا ئەلەکتریکێ و کۆلانا بیرا ئیرتیوازی یا ئاڤێ و …هتد. تنێ ئەو کارەبا ب شەڤ ل وان جهان هلدکەن دبیت چەندین مێگاوات بن. هەڵبەت گەلەک جهـ ژوان ددیارن، ژ وانا گەلیێ رەشانکێ، نزارێ گەلیێ قەنتارا و گەلەک جهێن دی. هەمی ژی ب رێکێن نەیاسایی دروست کرینە و کەس ژی نەشێت مایێ خوە تێ بکەت. چونکو خودان واستە و دەستهەلاتن. لێ ئەگەر هەژارەک دناڤ رەزێ خوەدا کەپرەکێ ژی چێکەت، دێ ل سەر قەدەغەکەن. یانژی ئەگەر مۆلەتەکێ بدەنێ دێ چەندین مەرج و یاسایێن توند ل سەر سەپینن.
هەڵبەت د وەختێ بوریدا گارە، ئێنیشکێ و هندەک جهێن دی ئەڤ جۆرە ڤێلایە لێ هەبوون. لێ ڤێ گاڤێ ئەڤ چیایە هەمی یێن بووینە گارە، ژبەر ڤان جۆرە ڤێلایان. ئەڤجا ژبۆ پاراستنا زەڤی، پارە و مولکێن دەولەتێن و رێگریکرنێ ل ڤێ گەندەڵیێ، پێدڤیە ل سەر هەر ناڤچەدارییەکێ کارێ جددی بکەت و بۆ هەمیان هەمان رێکار، یاسا و مەرج بێنە پەسەند کرن و یاسایا دارستانێ کو دبێژیت ‘یێ بهێز لاوازان دخۆت’، ل ڤی وەلاتی بهێتە ب دووماهیک ئینان.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)