مرۆڤ ل سەر ئاستێن جودا گرنگیێ ددەنە ئاشتیێ. گەلەک یا گرنگە ژی کو مرۆڤان باوەری ب ئاشتیێ هەبیت و پێڤە بهێنە گرێدان. پەیڤا ئاشتیێ پەیڤەکا پر مەزنە، لەوما دڤێت ئەم هەمی کار بۆ بکەین و ب رێکێن ئاشتیانە داخازا مافێن خوە بکەین ژ هەر کەسەکێ و ب تایبەت ژ دەستهەلاتێ. ناڤێ ئایینێ مە یێ ئیسلامێ ژی ژ پەیڤا (سەلام) هاتیە کو رامانا ئاشتیێ ددەت. ئەڤ ئاشتییە ژی دڤێت ببیتە دروشمێ هەر کەسەکی دڤێ دونیایێ دا ب تایبەتی یا مرۆڤێن موسلمان. ژبەرکو ئیسلام ژ مە دخوازیت کو ئەم دگەل دەروون، بنەمال و دەوروبەرێن خوە ب ئاشتی و ئازادی بژین.
ب بۆچوونا من شەڕ، جەنگ و ململانێ بارودۆخێن ئاسایی نینن. ئەو کارێن بەروەختن و مرۆڤ ژ نەچاری دکەت. لێ مخابن نوکە جەنگ، شەڕ و ئالۆزی بووینە پشکەک ژ کولتور و بارودۆخێ ژیانا مرۆڤان. ئەرکێ ل سەر مە هەمیان کو ئەم هەوڵێن جددی و بەردەوام بدەین دا وی بارودۆخی بگوهرین و نەهێلین. چێنابیت دەستا داهێلین و هەر ب وی چاڤی تەماشەی ڤی بارودۆخی بکەین، دا خوە تووشی چ خەلەتیان نەکەین. پێویستە بێژین نا بۆ دوژمنکاریێ و بەلێ بۆ بەرگریێ و زڤراندنا ئاشتی و ئازادیێ.
ئەم دبێژین کو تشتێ گرنگ د ژیانا هەر مرۆڤەکیدا ئەوە باوەریێ ب ئاشتیێ بینیت و بەرەڤ پێشڤە ببەت. هەروەسا داخازا مافێن خوە یێن دروست بکەت ب ڕێکێن ئاشتیانە و دوور کەڤیت ژ ڕێکێن شاش و خەلەت. تشتەکێ دی یێ هەری گرنگ هەیە کو پێدڤییە مرۆڤ ژبیرنەکەت، ئەوژی ئەوە کو هێڤێنێ هەمی مرۆڤان ئێکە و هەمی ژ ئێک بنەکۆکێ دروستبووینە. جوداهیان گەل و مللەتان هەر بۆ هندێیە ئەو ئێکودوو بنیاسن و هەڤبگرن، دا ئاشتی بەرەڤ قوناغێن باش و بلند بچیت ژبۆ خوەشکرنا بارودۆخێ ژیانا مرۆڤان ب گشتی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)