ب درێژیيا پترى چار ساڵین بورى ژ تەمەنێ پەرلەمانێ كوردستانێ، هيچ چاكسازیيەك نەهاتە كرن. خرابترين رەوش دڤان ساڵێن بوریدا بوو. ل هەر روينشتەكا پەرلەمانى بايكۆت ژلایێ هندەك پارتانڤە دهاتە كرن، هيچ پێكهاتنەك دناڤماليا كورديدا نەهات كرن، رەوش و ژيارا خەلكى بەر ب وێرانى و بێ سەروبەریێ بوو. پەرلەمان ژی بێ سەرۆك، ئالۆز، نیڤ پەککەفتی و نەکارا بوو! ڤی پەرلەمانی ژبلى تەرخانكرنا بوودجێ بۆ هەلبژارتنێن بێ سەروبەر هیچ تشتەکێ دی نەکر. دشێێن بێژین پەرلەمانەكێ چۆلكرى بوو! ئەڤ پەرلەمانە بێ هەلویست بوو بەرامبەر گرنگترین ئاریشەیێن خەلکی کو بڕینا مووچەیە ژلایێ حکوومەتێ ب شێوەیەکێ نە یاسایی. ب ڤی شێوەی حكومەت بوویە دەيندارا خەلكى و مووچەیێ فەرمانبەران پاشەكەفت کرییە. پەرلەمانی ژی تنێ بەحس ل سەر ڤی بابەتی کرییە، بێی کو رژد بیت و کارەکێ جددی بکەت.
جهێ مەندەهۆشیێ يە کو ڤان (١١١) ئەندامێن پەر لەمانى د داوى روينشتنا خولا چوارێدا بڕيار دان کو هەر یەك ژ وان (٤٨) مليۆن دیناران وەرگريت و خانەنشينییا وان ژی ل سەر (6,000,000) شەش مليۆنان بيت! پرسيار ل ڤيرێ ئەوە ل هەمبەر چ ئەڤ پارە بوو بێتە خەرج كرن، ما وان چ كريیە؟! ژبلى بايكۆتێ و پشتگوهخستنا ئاريشێن خەلكى چ پروژەيەك پەرلەمانى هەبوویە دڤان سالاندا؟ بۆچی فایلێن گەندەڵی، مافخارنێ نەڤەكرن و كار ل سەر پاشەكەفتێ مووچەی نەكرن؟ بۆچی بۆ خەرجکرنا ڤی پارەی بۆ ئەندامێن پەرلەمانی قەیران نەبوو؟!
ب راستی پەرلەمان بوويە جهى بهێنڤەدان و گەرمكرنا بەريكێ بۆ هندەک بێکار و ديڤەلانكان. مامۆستا و پێشمەرگە ل چەپەرێن خزمەت و خەباتێنە. مووچێ وان ب بهایێ (پێلاڤەك)ا ئەندام پەرلەمانەکی یە! وان ئەڤ خاکە پاراستییە و هوین گەندەڵیێ ل سەر دکەن. ئەو قەردارن و مووچەیێ وان ژ ساڵا (٢٠١٤)وە ژلایێ دەستهەڵاتێڤە هاتییە زیندانکرن. بۆچی وی پەرلەمانی بڕیارەک نەدا بۆ ئازادکرنا وی مووچەیێ کو مافێ خەلکییە! لەوما پشکەکا مەزنا گونەها رەزیلکرن، هەژارکرن، دەیندارکرن، دەربەدەرکرن و پەنابەرکرنا (٤٨) ملیۆن کوردان دکەڤیتە ستۆیێ وە پەرلەمانتەران. سەر ڤێ یەکێ را ژی و بەرامبەر بێکارییا خوە هوین (٤٨) ملیۆن دیناران ژی وەربگرن!
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)