ئێک ژ رەفتار و رەوشتێن ھەڤوەلاتیێن وەلاتێن بیانی، ھەروەسا یێن پێشکەفتی وەک یێن ئورۆپی ئەوە دەما دەستھەلاتدار، پلەبلند، سەرۆک، وەزیر و هەر بەرپرسەکێ بلند خوە نیشا خەلکێ خوە ددەت و خوە نێزیکی وان دکەت، خەلکێ وان گەلەک ب سادەیی رەفتارێ دگەل وان دکەن. ئانکو گەلەک مەندەھۆش نابن و بکەن ھەوار و بێژن ‘ووو ئەڤە فلان تشتێ مەیە!’. هەڵبەت ل وێرێ نە ب تنێ خەلک ب سادەیی بەرێ خوە ددەنە پلە بلندان، ھەروەسا زوربەیا پلەبلندێن وان بخوە ژی ب سادەیی خوە دەردێخینن و نورمال ل سەر جادەیان و جھێن گشتی ھاتن و چونێ دکەن. دیسان دەما تۆ پرسیارێ ژێ دکەی، ئایا بۆچی ھوون ب سادەیی خوە دیاردکەن و ھەروەکی ئەڤە کەسەکە ھوون نانیاسن؟ ئەو دبێژن ‘ئەوژی تاکێن ڤی وەلاتی نە وەک مە و چ کارێن مەزن ناکەن. تنێ ب ئەرکێ خو رادبن وەکی مە.. ئەوژی وەک مە فەرمانبەرن’،
لێ ل کوردستانێ ب تەمامی بەروڤاژییە. ئەگەر چایچیێ خودان کێمترین پۆست ژی ل ناڤا جھەکی ببینی، ب خەون دھێتە وەسفکرن و دبیتە دەمێ وێنەگرتنا ل گەل وی. ژ خوە خودان پلە و پۆست بێ زێرەڤان و کێمتر ژ دوو ترۆمبێلان ژ مال دەرناکەڤیت. ئەگەر بچیتە جھەکێ گشتی ژی، بۆ نموونە رێستورانتەک بیت، وێ رۆژێ هەمیێ دێ خوەدیێ رێستورانتێ د خوەشیا دا خارنێ بێ بەرامبەر دەتە ھەمی بکڕێن خوە!
ل ڤێرە من دڤێت بێژم کو پێویستە ئەڤ خالە ب ‘چنینە’ نەھێتە وەسفکرن. ژبەرکو دبیت ئەڤ رەوشتێ ھە یێ کو ئەم ھندەک کەسان بلند دانین، ھەر ئەو بخوە هۆکار بیت کو د نوکەدا بەرپرس، دەستھەڵاتدار، ئاغا، چایچی و…ھتد ل دووڤ دەنگ و ئازارا خەلکی ناھێن و ب دلێ خوە داھاتی بکاردئینن. بلا ژبیرنەکەین ژی کو ئەم ژی کاردکەین و ئەو ژی کاردکەن و چ جوداھی دناڤبەرا مە دا نینە. ئانکو ‘ئەو ژی وەک مە فەرمانبەرن’.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)