بەریا نها ب سالەکێ و پشتی ئەنجامدانا ریفراندۆما سەرخوەبوونا هەرێما کوردستانێ ل ٢٥ی ئەیلولا پارسال، کو ب رێکەفتن، بڕیار و یەکرێزیا هەموو ئالیێن سیاسی یێن هەرێمێ هاتیە ئەنجامدان. حەشدا شەعبی و سووپایێ عیراقێ ب پشتەڤانیا پاسدارێن ئیرانێ ل شەڤا ١٦ی ئۆکتۆبەرێ یا سالا بۆری ب رێکەفتنا وان هێزان دگەل هندەک ئالیێن سیاسی ل هەرێمێ، ب چەکێن پێشکەفتی و ب شێوەیەکی توندرەو و تیرۆری هێرشێن مەزن کرنە سەر ناڤچەیێن کوردی یێن ژ دەرڤەی ئیدارەیا هەرێمێ.
د وان هێرشان دا هژمارەکا گەنج، چالاکڤان و دلسۆزێن کورد ل بەر سینگێ وان هێزان راوەستیان. وان خوە کرنە قوربانی و ژبال وان ملیشیاتانڤە هاتنە ئێشاندن و ئەشکەنجەدان و ب توندترین شێوە هێڕش ل سەر هاتە کرن. تەڤایا گەلێ کورد ب وان کریار و رێکەفتنان دلگران و خەمبار بوو، ژبەرکو کەد و خەباتا چەندین سالان یا هێزێن پێشمەرگەی پێخەمەت ڤەگەراندنا وان دەڤەران بۆ باوەشا کوردستانێ، بێ هیچ ئەگەرەک ب بەر ئاڤێ دا بەردان. هەروەها بێ هیچ بەرگریکرن شنگال، کەرکووک و ئەو هەموو ناڤچەیێن کوردی رادەستی هێزێن حەشدا شەعبی و سووپایێ عیراقێ کرن.
ئانکو رێژەیا ٥١٪ ژ ئاخا کوردستانێ ب ئەگەرا خیانەت و رێکەفتنان مە ژدەستدا و هێزێن کوردی پاشڤە ڤەگەریان. پشتی پاشڤەکێشان و بجهبوونا وان هێزان ل هندەک ناڤچەیێن دناڤ سنوورێ هەرێمێ دا، نەچاربوون شەڕی ژی دگەل هێزێن هێڕشکەر بکەن داکو دەڤەرێن هەرێمێ ژی نەهێنە کۆنترۆڵکرن ژلایێ وان هێزێن عیراقیڤە. دئەنجامدا شەڕێن مەزن و دژوار چێبوون. پاشی ب زەحمەت، زۆری و چەند رێکەفتنێن خوە نزمکرنێ بۆ عەرەبان، هەتا کو شەڕ راوەستاندن. لێ جهێ حێبەتیێ یە کو ئەو شەڕە ب داستان و سەرکەفتن، ژ بال هندەک ئالیێن سیاسی ڤە دهێنە ناڤ دان و ژبیرکرنە کو ئەو پاشڤە ڤەگەریان و ژدەستدانا ئاخێ بوو. ژنووڤە دبێژن ژی کو “فلان داستان دەستکەفت و شانازی یە!”.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)