هژمار (سفر) و “تێست” یا گووتارنامەیا (رۆژئارتیکڵ) یا کاخەزی ل ١٦ی تەباخا ٢٠١٧ دەرکەتبوو. دسەرگووتارا وێدا ئاماژە ب وێ یەکێ هاتبوو دان کو یەك ژ ئارمانجان گەهاندنا پەیاما رەخنەیی یا رۆژنامەڤان و نڤیسکارێن ڤێ دەڤەرێ یە و ب تایبەتی یا گەنجان و خودانێن خامەیێن خورت. ئەڤرۆکە ژی ب هیممەت و پشتەڤانیا کۆمەکا نڤیسکار، رۆژنامەڤان و پشتەڤانێن کو ب شێوەیەکێ خوەبەخش کاردکەن، ژمارە “٢٥” چاپبوویە و کەتییە بازاری. هەڵبەت گرنگیدانا مە ب بۆچوونێن جودا و ب تایبەتی گەنجان، یا بێ وەستیان نەبوو. ژبەرکو هندەک بەشداربوویان ئەزموونا نڤیسینێ نەبوو، لەوما رێنڤیسا هندەك گووتاران گەلەکا بێ سەروبەربوو و تەنانەت هندەکان ئەم نەچاردبووین دووبارە بنڤیسینەڤە دا بشێین بەڵاڤبکەین. ئەڤە ژبلی ئاستەنگێن چاپکرنێ کو نەچاربووینە ل دەرڤەی دەڤەرا خوە چاپ بکەین. زێدەباری کێشەیا دیتنا فرۆشیاران کو هەمی کەسان ئەو دەرگەهە بۆ مە ڤەنەدکر، هندەکان ژی پشتی ڤەکری دووبارە گرتەڤە.
مخابن پشکەکا فرۆشیاران ژی گووتارنامەیا مە ل بنێ هەمی بەڵاڤۆکان دادنن. هندەك ژی ل بن مێزە و جهێن ڤەشارتی دادنن. بەربەستێن بەڵاڤکرنێ ژی ب هەمان شێوەنە و پشکەکا مەزنا وی کاری ژی ل سەر ملێن چەند خوەبەخشانە وەکی هەمی ستافێ کاری. لێ ل بەرامبەر ژی ئەنجامێ ڤێ کەدێ بەرچاڤە. دماوەیێ ساڵەکێدا (رۆژئارتیکڵ) ب کارێ خوەبەشی بوویە ناڤەك دناڤ بەڵاڤۆکێن ڤێ دەڤەرێدا یێن کو هەیڤانە ب دەهان هزاران دۆلار ل هندەکان ژوان دهێنە خەرجکرن. ل ڤێرە دێ ئاماژە ب نموونەیەکێ دەم ل سەر ڤی پرۆژەیێ مە کو جهێ شانازییەکا مەزنە بۆ هەمی ستافێ کاری. ئەو ژی هژمار (١٠) یا (رۆژئارتیکڵ)ە کو ب مانشێتێ “تۆز و ئافەرین بۆ پێشمەرگەی مان”، (١٥٠٠) هزار و پێنج سەد دانە ژێ هاتبوون چاپکرن. (١٠٠) دانە مە ل چەند کەمپێن پەنابەر و ئاوارەیان بەڵاڤکرن (بێ بەرامبەر). (٥٠) دانە ژی مە دگەل (٩) هژمارێن بەرێ کرنە دزەرفاندا و وەکو دیاری پێشکێشی هندەك کەسایەتی و دەزگەهان کرن. (٥٠) دانە ژی کو بۆ ئەرشیفی هاتبوون هەلگرتن، ب شاشیڤە وەکو دیاری پێشکێشی مێڤان و سەردانکەران کرن.
دەما مە زانی کو مە ئەو هژمار نەمایە ل ئەرشیفی مە هزرکر کو ب سەدان دانە دێ ژ بازاری زڤرن و دێ هەلگرین بۆ ئەرشیفی. لێ تنێ (١٥) دانە ژ بازاری زڤرین. ئانکو نێزیکی (١٣٠٠) دانە ژێ هاتبوون فرۆتن. ئەڤە ددەمەکیدایە کو ل گۆر زانیاریێن مە دماوەیێ ڤان ساڵاندا فرۆتنا هیچ رۆژنامە و بەڵاڤۆکەکێ ل دەڤەرا مە نەگەهشتیە ڤی ئاستی. ب باوەرییا من ئەڤ فرۆشا زێدە ڤەدگەریت بۆ رژدیا ستافی ل سەر کاری، مانشێت و بابەتێن گەرموگوڕ و گرێدای رەوشا رۆژێ، گەهشتنا گووتارنامەیێ بێ گیروبوون و ل رۆژا دەرکەتنێ بۆ هەمی رۆژنامەفرۆشان و فرۆتنا وێ ل پتری (٢٧) جهان. هەڵبەت مە گەلەك جاران بەحسا وێ یەکێ کرییە کو مە (رۆژئارتیکڵ) ل سەر کاخەزێ چاپ کر ژبۆ هاندانا خاندنا کاخەزێ. هەر ژبەر ڤێ یەکێ ل دەستێکێ مە رێ نەدا نڤیسکار گووتارێن خوە یێن ل (رۆژئارتیکڵ) بەڵاڤبووین ل سەر لاپەرەیێن خوە یێ تۆڕێن جڤاکی ژی بەڵاڤکەن. مەزانی ژی کو ژبەر ڤێ داکۆکییا مە ل سەر چاپا کاخەزێ، دلێ هندەك نڤیسکارێن مە ژ مە دما. لەوما ل داویێ و ل سەر داخاز و گڤاشتنا گەلەك نڤیسکاران، مە ل ١٤ی ئادارا ٢٠١٨ لاپەرەکێ فێسبۆکێ ڤەکر تنێ بۆ داناسینا گووتارنامەیێ و بەڵاڤکرنا گووتارێن کەڤن. لێ نڤیسکار، خاندەڤان، پشتەڤان، دۆست و هەڤالان ب ڤێ ژی رازی نەبوون و ب شێوەیەکێ رۆژانە و بەردەوام داخاز دکرن سایتێ ئەلەکترۆنی ڤەکەین دا گووتارێن وان دزووترین دەمدا بگەهنە پترین ژمارا خاندەڤانان. لەوما ل ساڵرۆژا دەرچوونا ژمارە (سفر) مە بڕیاردا سایتێ ئەلەکترۆنی دروست بکەین و، ل ٧ی ئۆکتۆبەرا ٢٠١٨ سایتێ گووتارنامەیێ ب شێوەیەکێ دەمکی و وەکو تێست کەتە بەر دەست و دێ بەردەوام بیت. ل رۆژێن داهاتی ژی و پشتی وەرگرتنا تێبینی و بۆچوونێن هەڤالان، دێ بڕیاردەین کا دێ چاپا کاخەزی و یا دیجیتاڵ چاوا دەرێخین.
ل ڤێرە من دڤێت سوپاسییا هەمی نڤیسکار، رۆژنامەڤان، پشتەڤان، دۆست و هەڤکاران بکەم بۆ خەمخۆرییا وان یا بێسنوور. ب راستی قەرزارێ دلسۆزیا وەمە. دەربارەی پرۆژەیێ سایتێ (رۆژئارتیکڵ) ژی من دڤێت سوپاسییا هەڤالێ زارۆکینیێ، نڤیسکار و سیاسەتمەدارێ کورد- نەرویجی، نەوزاد ئامێدی بکەم کو ژ ژمارێن دەستپێکێ بەشداری و پشتەڤانیا مە کری. هەروەسا بۆ ڤێ پێنگاڤێ ژی خەرجیێن کڕینا دۆمین و دروستکرنا سایتی ب ستۆیێ خوەڤە گرتین. ژ نوکە وێڤە ژی دێ وەکو رێڤەبەرێ نڤیسینێ ل سایتێ (رۆژئارتیکڵ) دەست ب کاربیت. دیسان سوپاسییا هەڤکارێ خوە شارەزایێ پرۆگرامێن کۆمپیوتەری، بەڕێز حکمەت ناڤشکی دکەین کو ب کارێن تەکنیکی و دیزاینا سایتی رابوویە و ئەوژی دێ وەکو رێڤەبەرێ تەکنیکی یێ (رۆژئارتیکڵ) تەڤلی ستافێ گووتارنامەیا مە بیت. ل دوماهیێ ئەم هیڤیدارین هەمی رۆژنامەڤان، نڤیسکار، دۆست و پشتەڤانێن مە ل هەر جهێ لێ بن، مە بێبار نەکەن ژ بۆچوون و تێبینیێن خوە بۆ باشترکرن و خورتترکرنا ناڤەڕۆکا ڤی پرۆژەی. پێشوەخت ژی دبێژین بۆ هەمی کێماسییان ل مە ببۆرن ژبەرکو “گرارا روون ژ کێم دانی یە”