خۆنیشاندان دژی حكومەتێ ژبۆ دابینكرنا خزمەت گۆزاریان وەك كارەبا و ئاڤ و گاز و گرانیا بھایێ پانزینێ و بڕین و گیروبوونا موچەی…ھتد، چارەسەریا پاشەڕۆژەكا سەركەفتی ناكەت. چونكو ژ سیاسەتا ڤێ حكومەتێ چێكرنا گرفتان ژبۆ كونترۆڵكرنا ھەڤوەڵاتیان، لدووڤ وێ چەندێ گەلەك ئاساییە كارەبا بۆ دەمەكی بھێتە بڕین ب مەرما مژیلكرنا ھەڤوەڵاتیان كو ھەڤوەڵاتی داخازا دابینكرنا كارەبێ ژ حكومەتێ بكەت، پشتی حكومەت ئاریشا كارەبێ چارەسەركەت بۆ دەمەكی، دێ ئاریشا گرانیا بھایێ پانزینێ بەڵاڤەكەت ژبۆ ھەڤوەڵاتی ھیڤیا ژێ وێ بكەت ئاریشا بھایێ پازینێ ژی چارەسەر بكەت. ھەروەسا بۆ بەڵاڤكرنا ئاریشێن نە دامەزراندنێ و نە بوونا دەلیڤێن كاری و گرفتا موچەیان و نە بەڵاڤكرنا گازا سپی ل وەرزێ سارمایێ و بنپێكرنا مافێن گشتی ژبۆ خۆنیشاندانێن ھەڤوەڵاتیان كو ھیڤی و داخازێن وان ژ حكومەتێ چارەسەریا وان ئاریشان بیت و…ھتد.
خزمەتگوزاری مافێن رەوانە بۆ ھەموو مللەتەكی، ئەڤجا نە دابینكرنا وان، وێ رامانێ د گەھینیت كو حكومەت دژی مافێن ھەڤوەڵاتیانە و دڤێت ھەڤوەڵاتی كونترۆڵ بكەت ب ھەر شێوەیەكی كو بگەھیتە وی رادەی وەڵاتیان لسەر جادەیان ب قۆتن. وەك قوتانا مامۆستایان دەمێ خۆنیشاندان كرین و داخازا موچێ خۆ كری، یان ھەڤوەڵاتیان ب كوژن یان ھەر شێوەیەكێ دیتر بیت ژبۆ پاراستنا دەستھەلاتێ ئەڤە ژ لایەكیڤە.
ژلایەكی دیترڤە، كارئێخستنا پەرلەمانی ژلایێ پارتا دەستھەڵاتدارڤە و سفكاتی و بێرێزی ب قانوونێ و نە دادپەروەری د ناڤا كارگێریا كاروبارێن وەڵاتیانڤە و، پێشوازیكرنا نینەرێن وەڵاتان ل ماڵێن دەستھەڵاتداران نەك ل نڤیسینگەھێن حكومەتێ، ھەروەسا دبیت ھەلبژارتن بھێنەكرن ب سەختەكاری یان بھێنە پاشخستن، ئەڤ چەندە ھەموو وێ رامانێ د گەھینیت كو دەستھەڵاتدار حەز دكەت سیستەمێ حكومڕانیێ ل ھەرێمێ ژ سیستەمێ پەرلەمانی بكەتە سیستەمێ پاشایان كو كوچكا بارەگایەكێ دەستھەڵاداری جھێ پەرلەمانی بگریت (وەك وەڵاتێن قەتەر و بەحرێن و ئیماراتێ) كو دەستھەڵات ژ بابی بۆ كوری لدووڤدا بۆ نەڤی و…ھتد.
بدیتنا من، دڤێت خۆنیشاندان بھێنەكرن دژی سیستەمێ حكومڕانیێ و دووبارە دەستوور بھێتە نڤیسین. چونكو سیستەمێ حكومڕانیێ سەدەمێ ھەموو ئاریشێن ھەڤوەڵاتیانە ئەوێن من ئاماژە پێكری. ئەڤجا ژبۆ قورتالكرن ژ وان ئاریشان دڤێت سیستەمێ حكومڕانیێ بھێتە گھورین بۆ سیستەمێ سەرۆكاتی و دووبارە دەستوور بھێتە نڤیسان (وەك سیستەمێ ئەمریكا) دێ ھەموو ئاریشە چارەسەر بن.