پشتی ژدەستدانا دەلیڤەیا (32) ساڵان ژبۆ ئاڤاكرنا ھەرێمەكا دەستووری بۆ كوردستانێ كو بەرەڤانیێ ژ ھەموو مافێن پێكھاتەیێن كوردستانێ بكەت، ئەوژی ب سەدەمێ گرتنا دەستھەڵاتێ ژلایێ ھۆزەكا پارتی دیمكراسی كوردستان و ھۆزەكا ئێكەتی نشتیمانی كوردستان ب مەرەما بەردەوامیدان ب حوكمرانیەكا ھۆزەكی. وان ھەردوو ھۆزان ژبیركر كوردستان پارچەكە ژ ئاخا عیراِقا فیدرال. د وان ساڵێن بووریدا ب ھەموو شیانێن خۆ وان كوردستان تاڵانكر ژلایێ دەستوری و قانوونی و دیموكراسی و ئابووری و زانستی و تەندروستی و مافێ مرۆڤایەتی و جڤاكی ب مەبەستا دانانا حوكمرانیا ھۆزەكی یان حوكمێ شاھانە دناڤا خێزانا ھۆزەكا بتنێ دا.
ئەڤێ چەندێ كوردستان بەرەڤ نەھاڵەكا تاریڤە بر. كارتێكرنەكا خراب ل سەر ھەڤوەڵاتی و ئاخا كوردستانێ كر ب رێیا حوكمرانیەكا خراب و پر گەندەڵی و بێپاكیا دەستھەڵاتداری كو رۆژ ب رۆژێ قەیران و گرفت زێدەدبن و ھەڤوەڵاتی تۆرە دبیت و ھەوارێن خۆ بگەھینیتە عیراقێ. لێ دەولەتا عیراقا فیدراڵ ب رێیا دەستوورێ عیراقێ كو دەستھەڵات دایە دادگەھا فیدراڵ ب رێیا مادەیا (44\ب) ژ قانوونا كارگێرییا دەولەتا عیراقێ یا ساڵا (2003)ێ ھاتیە ھەبوونێ و دەستھەڵاتێن خۆ ب روونی دیاركرینە و د ھەمان دەمدا دەستوورێ عیراقێ وەك مادەیێن (92) و لدیڤدا ھەبوون و شێوازێ دروستبوون و دەستھەڵاتێن وێ دادگەھێ زۆر روون و ئاشكەرایی دیاركرینە. لێ چەندین كێموكاسی ژی د قانوونا ناڤبریدا ھەبووینە.
بمخابنیڤە ل وی دەمی ل سەر نوینەرێن كورد و قانوون دانەرێن كوردان دەربازبووینە و ئەڤرۆكە كورد دێ باجا ڤێ چەندێ دەن. ئەوژی ب رێیا دادگەھا فیدرالا عیراقێ كو رابوو ب دەركرنا چەندین بڕیارێن دەستووری، وەك نابیت ھەرێم سەربەخۆ گازێ بفرۆشیت، نەھێلانا پەرلەمانێ كوردستانێ یێ دەم سەرڤەچووی، گرتنا جڤاتێن پارێزگەھان، نەھێلانا (11) كورسیێن کۆتایا ھەلبژارتنان ل كوردستانێ. ھەروەسا نشتیمانیكرنا مووچەیێن فەرمانبەر و مامۆستا و خانەنیشینێن كوردستانێ. واتە كوردستان تنێ ما ناڤ ل سەر زمانی و وەرەقێ. ئەڤە ھەموو ژ سەدەمێ حوكمرانیا ھۆزەكی كو نەھێلا كوردستانێ دەستوورەكێ پێگیر ھەبیت، ئەڤڕۆ بەرەڤانیێ ژ مافێن كوردا بكەت. تنێ ھۆزەكا دەستھەڵاتدار بەرامبەری بڕیارێن دادگەھا فیدراڵ گۆتی دادگەھا فیدرالێ دادگەھەكا نە دەستووریە. ڤێ گۆتنا وێژی بوھا نینە و نەگۆت کو دەستھەڵاتا مە ژی ھۆزەكی و دەستووری نینە.
- رێڤەبەرێ نڤیسینێ