دەستپێکێ د هەر نڤیسین و بوچوونەکا خۆدا ئەز ڕێزێ ل هەر کەسەکی دگرم. چونکی رێزگرتن ئێکە ژ بنەمایێن سەرکەفتن و بەردەوامبوونا مرۆڤی د ژیان و کاودانێن د ڕێیا تە دا. بەلێ هندەك دامودەزگەهـ و جهێن کاربەدەست هندەك مرۆڤێن مری یان نەساخ کو حەز و ڤیانا وان بۆ کاری نینە، بەلکو هیڤیا وان تنێ بدەستڤەئینانا ماڵ و مولکی یە ژ وی پۆستێ پێ هاتییە سپاردن ونەزێدەتر. هەڵبەت ئەگەر نموونەیان بینن زۆرن ل سەر جهێن مە یێن کاری و دبیت ئەو کەسە نە هەژی وی جهییە ژی بیت. بەلێ یێ بوویە تاپۆ ل سەر وێ کورسییێ بێی کو هزر د گوهورینێ دا بکەت یان خۆ گونجاندن دگەل بارودوخێ نوکە و سەردەم بۆ سەردەمی بهێتە گوهورین. ئەڤ چەندە ل دەف وی نینە و دبیت ئەو کەسێن دسەر وی دا ژی هەمان دابونەریتێ نە شارستانی و نەپێشکەفتی هەیە. لێ هەر هند پێنگاڤان ب سەرکەڤی بێگومان دێ کەسانێن خودان سەربور بینی.
ئەم دبێژین دڤێت چاڤدێرییەك ل سەر ڤان کەسان هەبیت و بەردەوام گوهورین هەبن، دا نەهێنە تاپۆ کرن ل سەر وێ کورسیکێ هەتا بۆ نەڤیچرکێن وان بمینن. بێی کو چ پێشکەفتنێ دکاریدا ب دەستڤەبینن. لەوما ئەڤ گوهورین زۆر جاران ئەم دبینین یان گوهلێ دبیت، ئەو ب شێوەیەکێ نەزانستیانە دهێنە کرن. ژبەرهندێ بەردەوام ل وان جهان هەردەم دکەڤنە بەر کەڤێن ژناڤبرنێ، یان ژی نەسەرکەفتیانە دهینە قەلەمدان. ئەگەر مە جڤاکەك ساخلەم و پێشکەفتی دڤێت، ئیکەم جار ئەم خوە بگوهورین و دگەل گوهورینین سەردەم و تەکنەلۆژیایێ بچین و بهێنە گوهورین و وان کەسانێن نەساخ ژی دوویر بکەین ل وان جهان و دەرگەه بهێنە ڤەکرن بۆ کەسین پسپۆر و خودان شیان و هزرێن نوی.
- هەلبەستڤان و سەرنڤیسەرێ دەزگەهێ میدیایی (زێیێ بادینان).
- (گۆتار دەربڕینا بۆچوونا نڤیسکارانە، نەیا سایت و گۆتارنامەیا رۆژئارتیکڵ)