بوهایێ دیناری و سەنگا هەرێمێ

چەند هەیڤە دینارێ عیراقی بەردەوام بوهایێ خوە ژدەست ددەت. حکوومەتا بەغدا و بانکا ناڤەندی یا عیراقێ ژی بەردەوام بڕیار و رێنمایان دەردکەن و رێبازێن تازە پەیرەو دکەن بۆ پاراستنا بوهایێ دیناری، کو ل گۆر هندەك راپۆرت و بسپۆران ئەو پێرابوونێن بانك و حکوومەتا عیراقێ دراست و دروستن. لێ دیسان ژی کاریگەریا وان یا دەمکی یە و دووبارە دینار دادکەڤیت! سەدەم ژی ب باوەریا مە ئەوە کو ئەڤ پێنگاڤە گیروبووینە و ددەمێ خوەدا نەهاتینە. ژبەرکو وەزارەتا گەنجینەیا ئەمریکا ژمێژە ئاگەهدارییا عیراقێ کربوو و هۆشداری دابوونێ دا نەگەهنە ڤێ رەوشێ. نوکە ژی دەم ب سەرڤەچوویە و بوهایێ دیناری بلند نابیتەڤە. لێ ب هەبوونا ئیرادەیێ، پتر داناکەڤیت.

ژلایەکێ دیڤە هەرێما مە ژی بەردەوام سەنگا خوە ژدەست ددەت. هەرچەندە حکوومەتا کوردستانێ بزاڤان دکەت. لێ ئاستەنگان دبینیت، ژبەرکو ب باوەرییا مە گیروبوویە و پێویستبوو یەکەمین کابینەیا کوردستانێ ئەڤ بزاڤە کربان. ژبەرکو هینگێ، (پشتی سەرهلدانا 1991)، کوردستانێ سۆزا گەل و وەڵاتان راکێشابوو و پارتی و یەکێتی ب پشتەڤانیا دۆستان، کوردێن پسپۆر و خوین گەرمێن ل دیاسپۆرایێ، دشیان بناخەیەکێ ساخلەم بۆ دەسەڵاتەکا قایم و سەردەمیانە دابنن. لێ پارتیان هێزێن چەکدار بۆ خوە چێکرن کو شەڕێ خوەکوژی بەرهەم ئینا. نوکە ژی کو داخازی، ئاگەهداری و هۆشداریێن دۆستان بۆ خوەرێکخستنێ نەهاتنە وەرگرتن، دەم ب سەرڤەچوویە و سەنگا بەرێ نازڤریتەڤە. لێ ب پێنگاڤێن ژیرانەتر و واقعیانەتر بارێ خەلکی سڤکتر دبیت و سەنگا هەیی دهێتە پاراستن.

  • خودان و سەرنڤیسکارێ (رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top