یەکگرتوو ئیسلامی کوردستان ژمێژە رەخنەیێ ل “گەندەڵیێن” دەسەڵاتا پارتی دیمۆکراتی کوردستان و یەکێتی نیشتیمانی کوردستان دگریت. رەخنەگرێ راست ژی ئەوە پلانەك باشتر هەبیت. یەکگرتوو بەری چەند ساڵان بەشداری حکوومەتێ بوو. ئەڤ پێنگاڤە ژلایێ تیۆریڤە وەك چوونا جەنگەکی بوویە دژی “گەندەڵیێ”. دڤیابا سوارچاكێن دەسپاك و وێرەك پێشخستبان کو بەرامبەری سوارچاکێن پارتی و یەکێتیێ بان. لێ پراکتیزەکرنێ دیارکر کو یەك ژ تەمبەلترین رێڤەبەرێن میری کادرێ یەکگرتوویە. بەڵگە ژی رێنماییەکا “رێکخستنا کاری”یە کو حکوومەتێ ئاراستەی سازییا وی رێڤەبەری کرییە. رێڤەبەر ژی نەشیایە رێکخستنێ بکەت، لەوما کار راوەستیایە هەتا هەڤپشکەکێ وێرەك بۆ بڕیارێن وی پەیدا دبیت. هاوڵاتی ژی ب چاڤەڕێبوونێ باجا “سستییا” رێڤەبەر و کادرێ بەڕێزێ یەکگرتوو ددەت.
هەڵبەت کادرێن یەکگرتوو یێن ئەم ناسدکەین ددەسپاکن و ئەم نابێژین رێڤەبەرێن وان یێن میری ژی دزن. لێ رەخنەیا مە ل یەکگرتوویە کو بۆ دژایەتیکرنا گەندەڵیێ کەسێن وێرەك نەئیناینە پێش و دووڤچوون و هەڵسەنگاندنێ بۆ کادرێن خوە ناکەت و ئەڤە جهێ پرسیارێ یە. هەر بۆ نموونە ئەڤە نێزیکی ساڵەکێ یە سازییەكا حکوومەتا کوردستانێ ددەستێن واندا بێ بەرهەمە و تنێ مووچەی وەردگرن. پێویستبوو یەکگرتوو بەری حکوومەتێ ئەڤە ژ رێڤەبەرێ خوە قەبوول نەکربا. ژبەرکو ژبلی کو نەیاساییە، ل گۆر ئایینێ مە یێ پیرۆز گونەهە ژی! ئەڤجا ئەگەر چاکسازییا یەکگرتوو ئیسلامی کوردستان ئەو بیت مووچەی بۆ هندەك “دەستپاکێن تەمبەل” پەیداکەت و کارێن خەلکی راوەستینیت، ئەم دبێژین هزارێن وەسا گۆری گەندەڵەکێ وێرەکێ پارتی و یەکێتی بن!