د شۆڕەشا چەکداری دا، مە شیا خۆ ل سەر لنگان بگرین و خەباتێ بکەین و پشتی هەر شکەستنەکێ ب رحەکا تازە ڕابینە سەر پێیان و دووبارە بۆ ئارمانجێ بجەنگین. د شۆڕەشا کولتووری دا ب سەدان ساڵانە ژ بەر نەبوونا دەوڵەتێ کارێ ل سەر کولتوورێ مە دهێتە کرن و ڤان جیرانە دڕندەیان هند پنی ژێ ڤەکرینە و ئیخستینە سەر کولتوورێ خۆ. لێ ژ بەر رحا کوردینیێ و خوەدی دەرکەفتن ژ ناسناڤێ ڕاست یێ کورداتیێ، مە شیایە ستران و مۆزیک و جل و ڕەوشت و تیتاڵ و زمانێ خۆ بپارێزن. د شۆڕەشا ئابووری دا باشترین نموونە ساڵێن نۆتانە ل باشوور دەما خەلکی شیای بەرسینگێ برسا مەزن بگرن و ب کەدا خوها خۆ زارۆکێن ڤی وەڵاتی زکێ وانێ برسی تێر بکەن. ئاها ل وی دەمی مە تشتەک نەبوو ب ناڤێ حکومەتێ. چونکی هندا ساڤا بوو هێشتا د ناڤا لاندکێ دابوو دەما شەر ل سەر هاتیە سەپاندن. د شۆڕەشا ئاڤەدانیێ ژی دا یا دیارە کانێ ڤی گەلی چاوا ملدایە بەر ئاڤەدانیا گوند و باژێران و ئەو ماڵێن ب سەدان ساڵان ئاخ ئەڤڕۆ بوونە خۆشترین جهێن ژیانێ، کو د ڤی بیاڤی دا حکومەت خودان کێمترین پشکە.
هەروەسا د شۆڕەشا پاراستنا دەستکەفتنا ژی گەلێ ڕەپ و رویت وان گەنجێن نوو ژیان دیتی وان کورێن خۆین گەرم و کچێن جوان ڕەف ب ڕەف ملدا بەر پاڕاستنا هەرێما کوردستانێ و شیان ب خوینا هزاران پێشمەرگان ڤێ جوانیا کوردی د ناڤا تاریپەرێسیا عەرەبان دا بپارێزن و نەهێلن داعش نێزیکی ئاخا پیرۆز و وەڵاتێ ئاگر و ڕۆژێ ببیت. لێ د ئاست شۆڕەشا باوەریێ دا هەر تشت مر، مرۆڤ مر، کوردینی مر، ئاخ مر، وەڵات مر، پێشمەرگە مر. چونکی دەستهەڵاتدارێن مافیایی یێن کورد هەمی پیرۆزی ئێخستنە ژێر لنگێن خۆ و پیرۆزترین پیرۆزیا وان بۆ پارەپەرێسی، لەورا ئەو شۆڕەشا بۆ ژیانێ هاتی دەستپێکرن ئەڤڕۆ ل ڤی وەڵاتی ژ بەر باوەریێ یا د گۆری دا.
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)