ئەم دچووینە گەشتەکێ دەما رۆژنامەڤانەکی پەیوەندی کری دا بەشداری پرۆگرامەکی بین ل سەر گۆهرینێن کارگێری، لەوما نەشیاین ئامادەببین. لێ بابەتێ گۆهرینان بیرا مە ل سەرهاتییەکێ ئینا. برادەرەکێ بەڕێز بۆ مە ڤەگێرا کو جارەکێ پارێزگەهێ دڤیا کارمەندەکی دامەزرینیت ب هندەك مەرج و تایبەتمەندییان. برادەر ژی کو نەحزبی بوو، لێ هەمی مەرج و تایبەتمەندی تێدا هەبوون، سیڤی پێشکێشکر. دهەڤدیتنێدا گۆتنێ چاوا تۆ نەحزبیی و دخازی ل پارێزگەهێ کاربکەی؟! برادەری ژی دیارکربوو پارێزگەهـ جهەکێ حکوومییە. وانژی گۆتبوویێ ژبلی تابلۆیان هیچ جوداهییەکا دی دناڤبەرا بارەگایێن حزبێ و حکوومەتێدا نینە و هەر دەما بخازن دشێن تابلۆیا لقێ ب ئاڤاهیێ پارێزگەهێ ڤەکەن و بەروڤاژی، بێی پێکگوهارتنا کارمەند و کادرێن وان!
لەوما ئەم دبێژین ئەڤا دهێتە کرن نەگوهارتنە بەلکو پێکگوهارتنە. گوهرینا دروست ددەستێن خەلکیدا یە. خەلك دەما دبینن دەسەڵاتدارییا لایەنەکی بێسەروبەرە، جارەکا دی دەنگی نادەنێ و وی دەمی گوهرین چێدبیت. لێ ئەم هەردەم هەمان لایەنان هەلدبژێرین. پاشی گلەیێ دکەین و گوهرین و چاکسازیێ ژێ دخازین! ئەڤە ژی ل چ جهان نینە. ژبەرکو خودانێ پتریا دەنگان مافێ ویێ دیموکراتییە کەسێن خوە دامەزرینیت. ژخوە ل دەسپێکا ڤێ حکوومەتێ دیاربوو “گوهرین” نابن. ژبەرکو پتر گرنگیێ ب وارێ ئەمنی ددەت و هەردەم وەزیرێ ناڤخوە ل پێشە. داوی نموونە ژی دانانا بەڕێز د. عەلی تەتەر وەك پارێزگارێ دهۆکێ کو ئەزموونا وی یا ئەمنی زاڵترە. ددەمەکیدا گوهرین و چاکسازیێ پێویستی ب ئابوورناسانە دا کێشەیا سەرەکی کو ئابوورییە، چارەسەربکەن.