وسا دیارە دەما میزانیا هەرێمێ یا سالانە دهێتە دانان و خەملاندن بۆ خزمەتکرنا هەر باژێرەکی کۆژمەکێ پارەی وەک بودجە دهێتە دیارکرن یان دهۆک بگشتی و قەزایا سێمێلێ ب تایبەت د نەخشە و هەژمارەیا هەرێمێ دا نینن یان کارگێریا پارێزگەها دهۆکێ و کاربدەستێن وێ د بێخەم و نەوێرەکن و نەشێن بەرەڤانیێ ژ پشکا وێ بکن. یان دهۆک ب گشتی یا د بەریکێ دا و یا گەرەنتی کریە ژ ئالیێ دەنگان ڤە و خەلکێ وێ یێ رازی یە ژ ڤێ خوەلیسەریێ؟! ئەگەر بێنە سەر بابەتێ مەرەم پێ و بەحسا چێکرنا جادەیا بکن کو دهۆک یا ژێ دنالت و هەولێر هەر سال یا جادەیەکا مەزنتر ڤەدکت!، هەر دەما خەلکی خوە نەرازی کر دێ هندەک سۆز ژ ئالیێ کاربدەستێن حوکمەتێ ڤە پێ هێنە دان و خەلک پێ هێتە بەنج کرن هەتا بابەت دهێتە ژبیرکرن.
فلکا مرنێ ل سێمێلێ وەک نموونە کو بڤی ناڤی هاتیە بناڤ کرن ژبەرکو فلکەکا ب مەترسی یە و رویدانێن نەخوازیار لێ رویداینە. پێشتر سۆزا چێکرنا ئۆڤەرپاسەکێ ل وێ فلکێ ب خەلکێ وێ هاتبوو دان و ئێدی ئەو جادەیە دا هێتە ڤەژاندن و شۆفێران ژ مرنێ و رویدانێن دلتەزین رزگار کت. لێ وە دیارە ئەو سۆزا ڤەژاندنا فلکا مرنێ ژی هات مراندن و ئەو پارەیێ دا بۆ هێتە تەرخانکرن بۆ جادەیێن 120 و 100 متری یێن هەولێر و سلێمانیێ چوون! ئاخر بەرئاقل نینە ل جادەیەکا ستراتیژی و سەرەکی و گشتی و پر قەرەپالغترین دناڤبەرا (دهۆک، سێمێل، زاخۆ)دا هندە پێدڤی ب ئۆڤەرپاس و ئەندرپاسان بت و ل هەولێرێ جادەیێن مەزن ل جهێن نە ئاکنجیبوونێ و نە قەرەبالغی بێنە دروستکرن! ئەرێ دەم نەهاتییە ئێدی حوکمەتا نوی بەشە بودجەیا دهۆکێ زێدەکت و خوە ل مەغدووریا خەلکێ خەباتکەرێ ڤێ پارێزگەها خودان شەهید و خەباتکەر و شۆرەشگێر بکتە خودان؟ ئەرێ دەم نەهاتییە ئێدی کاربدەستێن دهۆکێ نەهێلن غەدر ژ ئالیێ چێکرنا پرۆژەیان ل دهۆکێ ببت؟ دەم دێ بۆ مە ڤێ راستیێ دیارکت.
- مافپەروەر
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)