“سەیدایەك” ل دەستپێکا ژیانا خوە یا سیاسی ئەندامێ پارتییەکێ بوو. دەمەکی پارتییا وی لاوازبوو گەهشتە پارتییەکا دووەم. پشتی هەیامەکی پارتییا دووەم ژی لاوازبوو ڤەگەریا پارتییا یەکەم. دەما دووبارە پارتییا یەکەم لاوازبووی گەهشتە پارتییەکا سێیەم. پشتی پارتییا سێیەم لاوازبووی ڤەگەریاڤە پارتییا یەکەم. سێبارە پارتییا یەکەم لاوازبوو، ئەوژی زڤریڤە پارتییا سێیەم. دووبارە پارتییا سێیەم لاوازبوو، ئەوژی ڤەگەریا پارتییا یەکەم. هەروەسا ل گۆر بەڵگەیێن بەڵاڤبوویی و هاتینە بەحسکرن “سەیدای” ب درێژیا ڤان دەمان پەیوەندی دگەل “نەیاران” ژی هەبوون. نوکە ژی وەك کەسەکێ “خودان پرەنسیپ” و دلسۆز راوێژ پێ دهێتە کرن و خودان بڕیارە بۆ ئەنجامدانا چاکسازیێ ل دەڤەرەکا گرنگ یا پڕی کەسێن دلسۆز کو ب راستی خودان پرەنسیپن.
هەڵبەت بڕینا مووچەیێن بندیوار و سزادانا گەندەڵان بچووکترین پێنگاڤا چاکسازیێ یە. گرنگترین پێنگاڤ ژی دەسنیشانکرنا کەسێن هەژی و دلسۆزە بۆ رێڤەبرنێ دا گەندەڵی بنبڕببیت. ئەڤ کارە دڤێت تنێ ددەستێن کەسێن دلسۆز و خودان پرەنسیپدا بیت دا گۆمان ل سەر راستییا پرۆسەیێ نەبیت. لێ ئەگەر جێبەجێکرنا چاکسازیێ بدەنە کەسێن وەك ڤی “سەیدای” کو دشەڤ و رۆژەکاندا ژ بنێ راستڕەۆیێ بچنە سەرێ چەپگەرایێ و لێڤەببنەڤە. یان راوێژێ ب “نەیاران” بکەن، بێگۆمان دێ گۆمان دروست بیت. ژبەرکو ئەڤە دێ بەرەڤانیێ ژ کەسێن وەکی خوە کەن، پلانێن نەیاران جێبەجێکەن و ئەگەر “گەندەڵەکی” ژی سزا بدەن دێ کەسەکێ وەک خوە نەدلسۆز و “بێ پرەنسیپ” داننە جهی. واتەیا ڤێژی بەردەوامیدان و شەرعییەتدانە ب گەندەڵیێ و بەرەف مالوێرانیێ.
