چەوان ژ ئالوودەبوونا (کەرەستەیێن هۆشبەر) رزگاربووم؟

کەرەستەیێن هۆشبەر گەلەک ب مەترسینە ل سەر تاک و جڤاکان. لێ ل هەموو وەلاتان و دناڤ هەموو تەخ و چینێن جڤاکی دا، ڤێ دیاردەیێ هەبوونا خۆ هەیە. لەوما ئەز ژی بێ بەهر نەبووم ژ وێ ژەهرێ. ئەز ل وەلاتێ ئیرانێ هاتیمە سەر دونیایێ و قوتابیەکێ زیرەک و چالاک بووم ل قوتابخانێ و هەردەم سەرکەفتیێ ئێکێ بووم ل سەر پۆلا خۆ. مامۆستا و رێڤەبەرێن قوتابخانێ دگەل کەسوکارێن من و ب تایبەت مالباتا من پێشبینییا پاشەرۆژەکا گەش و و پر سەرفەرازی بۆ من دکرن ل وەلاتێ من. تا پشتی ب ئێکجاری هاتینە هەرێمێ و ب رێکا هەڤالەکی کو ب راستی ژی کەسانێن هۆسا نابیت وەک هەڤال ناڤ ببەین، بەلکو دوژمنن کو ب فێلبازی مرۆڤی پالددەن بۆ کارێن شاش کو ئێك ژ وان بکارئینانا وان کەرەستەیانه. وی هەڤالی (یان دشێین بێژین وی دوژمنی) ئەو کەرەستە کو من نەڤێت ناڤی لێ بینم ژ بەرینکا خۆ ئینا دەر و گووت وەرە دێ پێکڤە بکارئینین و دێ چینە دونیایەکا دی و خۆشترین تشتە. ژ نەبوونا زانیاریان ل سەر وی تەوەری ب مخابنیڤە من ژی بکارئینا و هێدی هێدی فێربووم و بوومە بکارهێنەر. براستی دونیایەکا تاری و تژی نەخۆشی و ئازارە. جیهانا بکارئینانا کەرەستەیێن هۆشبەر. هێدی هێدی ژمال و جڤاکی ڤەقەتیام و بوومە ئێک ژ بکارهێنەرێن وی کەرەستەی. هەستکرن ب بەرپرسیارەتیێ ل هەمبەر قوتابخانا خۆ، خاندن، جڤاک، هەڤال، کاروبارێن مالێ، کەسایەتی و… هتد، من ژدەست دان و بوومە مرییەکێ نەڤەشارتی.

بکارئینانا وان کەرەستەیان دەولەمەندان هەژار دکەت و هەژاران دبەتە بن هێلا هەژاریێ و… هتد. هەلبەت دجیهانا بێهۆشیێدا هندە دلیڤە پەیدا دبن ژبۆی هندێ کو مرۆڤ بشێت خۆ ژ وێ تاریاتیێ رزگار بکەت. ئەز شیام برێکا دەستپێک ئیرادەیا خو و پاشان ب رێکا پرۆگرامەکێ ئەمریکی کو ژ 12 خالان پێک دهێت ژێ رزگارببم و ببمە فاکتەر و نموونەکێ بهیز بۆ وان گەنجێن ل هەرێمێ کو تووشی وێ نەخوشیا کوژەک بووینە ب مەبەستا رزگاربوونێ. ل ڤێرە گرنگە بزانین کو کەسێ تووشبوویی کەسەکێ نەخوشەوە پێدڤی ب چارەسەریا دۆمدریژ یا دەروونی هەیە. نەک رەخنە و ئەشکەنجەدان و زیندانکرنێ و… هتد. تاوانکارێ سەرەکی ئەو کەسە یێ بازرگانیێ ب وان کەرەستەیان دکەت و خۆ دەولەمەند دکەت ب بهایێ مرنا مرۆڤان. ل ڤێرە پێدڤی بوو پتر روونکرن ل سەر وی بابەتی و تایبەت چیرۆکا من ئاخفتبام. لێ ژبەرکو بابەت درێژە و خاندەڤان پێڤەعاجز نەبن، من ب کورتی و ب رامان پەیام گەهاند. هەر دیسان من ژیێ خۆ یێ مایی هەمی تەرخان کریە ژبۆی هندێ جڤاکی هشیار کەم ل سەر زیانێن وان کەرەستەیان. تایبەت دناڤ تەخا گەنجاندا و ب وێ مەبەستی من رێکخراوەک دامەزراند ژبۆی هوشیارکرنا وەلاتیان سەبارەت زیانێن وان کەرەستەیان. ب هیڤییا وێ چەندێ ببین خودەیێن جڤاکەک ساخلەم و تەندروست دویر ژ بازرگانی و ب کارئینانا کەرەستەیێن هۆشبەر. هەروەسان ل دوماهیک پەیاما من بوو وان کەسێن هێشتا د وێ تاریاتیێدا دژین، ژبیر نەکەین بکارئینانا تە بۆ کەرەستەیێن هۆشبەر هۆکارێ لاوازبوونا کەسایەتیا تەیە دناڤ جڤاکیدا و ئیرادەیا تاکەکەسی بهیزترە کو مرۆڤ ببیتە ئێخسیرێ وان کەرەستەیان.

  • چالاکڤان

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top