یاخوەیایە دماوێ ڤان دوو مەهێن دەربازبوویێ دا هێدێ هێدی دیاردەیا ڤایرۆسێ کۆرۆنا گەهشتیە زۆربەیا وەلاتێن ئەورۆپی و رۆژهەلاتا ناڤین. ل دەسپێکێ هەر ژ وەلاتێ چینێ هاتیە و پاشا زۆربەیا ڤان وەلاتێن دنژی ڤەگرتیە. هەلبەت چ پێ نەڤێت پربوونا ڤێ دیاردەیا ڤایرۆسێ کۆرۆنا کارتێکرنا خوەیا خراب هەیە ب شێوەکی گشتی ب تایبەت ل سەر ژینگەهێ و تەندروستیا مروڤان. دیاردەیەکا مەترسیدارە و بێگۆمان هەگەر ئەم ل ڤێ ڤایرۆسێ کۆرۆنا بنێرن ب تایبەت ل جەم شارەزا و پسپۆرێن بایۆلۆژی و نۆژدارێن تایبەتمەند، هەر ئێك ب رەنگەکێ ب تێروتەسەلی ڤەکۆلینێن زانستی و ل دویڤچوونێن بەردەوام ل سەر ڤی بابەتی یێ دئێتە کرن. تەڤایا گەل و نەتەوەیێن جیهانێ هانداینە بۆ دناڤا چەپەرێن بەرهنگاری بوونێ دا دژی ڤایرۆسێ. ل گۆرەی رینمایێن ساخلەمیێ بهەڤکاریا رێکخراوێن تەندروستیا جیهانی و تیمێن پزیشکی و هێزێن دەستهەلاتدار. پیخەمەت هشیارکرنا وی خەلکی و دائێخستنا جهێن گشتی و خوە کەرەنتینکرن دمال ڤە و خوە ژ ڤێ ڤایرۆسێ کوژەك بپارێزن.
ل ڤێرێ یاخوەیایە هەرێما کوردستانێ ژی کەتیە ژێر ڤێ دیاردەیا ڤایرۆسێ کۆرۆنا و دڤیا جهێن پەیوەندیدار و ژبەری دەرکرنا بریارێن کەرەنتینکرنا ڤی خەلکی دمال ڤە، پێدڤی بی هندەك بەرنامە و پلانێن هەمەجۆر دارشتی یان پێشکێشکرنا خزمەتێن هەرە گرنگ و کەرەستە و پێداویستیێن تایبەت. ژبلی دەرکرنا وان بریار ورێنمایێن ساخلەمیێ کو دچاوا ئەڤ خەلکێ هەنێ خوە بپارێزن. نەخاسمە بۆ وان خێزانێن هەژار و کێم دەراڤ. بەلێ هەگەر هات و ئەڤ قەدەغەیا هاتنوچوونێ ب ڤی ئاوایێ درێژببیت، بدیتنا من ئەو خەلك و هەژارو بەلەنگازێن مە ئێدی نکارن ڤێ هەناسەیا کەرەنتینکرنێ دمال ڤە بهەلکێشتن و هشك و زوها بێ کار. دویر نینە کارڤەدانێن نەرێنی ل دووڤ خوەڤە بینت و ببیتە ئەگەرێن پێشێلکرنا ڤێ قەدەغەیا هاتنو چوونێ و کەرەنتینکرن دمال ڤە. دێ بهەمی رەنگا هەول و بزاڤا کەن دووبارە ڤەگەرن بۆ ژیانێ و پەیداکرنا پاریەکێ نانی ژبۆ خودانکرنا خێزانێ و بەرهەڤ نینن ژین و ژیارا خوە ب هیڤیا کەسەکی خێرخوازو دەولەمەند ڤە بهێلن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)