پەیدابوونا ڤایرۆسێ کۆرۆنا زۆربەیا وەلاتێن جیهانێ بخوەڤە گرتیە. باندۆرا خوە یا نەرێنی ل سەر ژینگەهێ و ساخلەمیا مرۆڤان دکەت. هەلبەت ئەڤ جۆرە ڤایرۆسە یێ بوویە جهێ گەنگەشە و گفتوگۆیێ ل جەم هندەك شارەزا و پسپۆرێن بایۆلۆجی و نۆژدارێن جیهانێ. دیتنا رێکێن چارەسەریێ بەردەوام یێ ل سەر زاراڤێ کۆمەڵ و جڤاک و مێدیایێ دا تێتە گوتن و ب کارئانینا ب رێکێن بەرهنگاربوونێ دژی ڤی ڤایرۆسێ کو هەیا نها ژی نە ل عەردو نە ل ئاسمان نەهاتیە ئاشکراکرن. ل ڤێرێ جارێ دێ ڤەگەرن بال هەرێما کوردستانێ ڤە دگەل کەرت و تیمێن ساخلەمی و پزیشکی کا شیایە چ بەرهەڤیا بکەن بۆ دەرکرنا هندەك رێنمایێن ساخلەمی و هشیارکرنا ڤی خەلکی کا چاوان دمال ڤە بێنە کەرەنتینکرن و پێخەمەت ساخلەمیێ خوە ژ ڤێ ڤایروسێ کۆرۆنا بپارێزن. هەگەر ئەم ل بەرنامە و پلانێن هندەك حکوومەت و دەسهەلاتدارێن جیهانێ بنێرین پلان و پێنگاڤێن باشتر هاتیە هاڤێتن بۆ خەلکێ وان وەلاتان. دابینکرنا کەرستەێن پێدڤی و گەشەکرنا خۆشگۆزەرانیا ژین و ژیارا خەلکێ خوە دڤێ کەرەنتینکرنێ دا.
سەبارەت قەدەغەکرنا هاتنوچوونێ و کەرەنتینکرنا ڤی خەلکی دمال ڤە، نەچارەیە. دڤیا جهێن بەرپرسیار و سیاسەتمدارێن مە ژبەری پربوونا ڤێ شەپۆلا ڤایرۆسێ، هزر ددارشتنا پلانێن هەمەجۆر دا کربان دا ئەڤ خەلك و هاوەلاتیێن مە بڤێ کەرەنتینکرنێ دلخوەش بیت ب تایبەت تەخا مرۆڤێن بێ کار و هەژار و کێم دەراڤ. هەروەسا پشکەك ژ خەلکێ ڤی وەلاتی ژی مووچەخۆرن. ژیارا وانژی ب هیڤیا وی مووچەیی ڤەیە و ژیانێ دبنە سەر. ڤێ شەپۆلا ڤایرۆسێ کۆرۆنا بیە ئەگەرێ بێدەنگکرنا سیاسەتمدارێن مە کو ژبەری نها بەحسێ دارشتنا پرۆژەیێن چاکسازیێ و چارەکرنا کێشە و کریزان و موکۆمکرنا ئێکگرتن و ئێکرێزیا ئالیێن سیاسیێن کوردی و گەلەك تشتێن دن دکرن. جارێ ئەڤە هەمی هاتینە پاشئێخستن ب هێجەتا ڤێ ڤایرۆسێ کۆرۆنا. ئەم بهەڤرە یێ دکەتینە چەپەرێن بەرهنگاربوونێ دا دژی ڤێ ڤایرۆسێ کو ل سەر گەلێ مە و ڤێ جیهانێ بداوی بێت و ئەڤا مایی ب هیڤیا خودایێ مەزن ڤەیە.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)