كۆرۆنا دێ بەرپرسان ریتورسواكەت

ل دەمێ دەریمەتا كۆرۆنا ل جیھانێ بەڵاڤەبووی، دەولەتان رێكارێن پێتڤی وەرگرتن بۆ بەرسنگكرتنا بەڵاڤبوونا ڤێ دەریمەتێ. ل ھەرێما كوردستانا عیراقێ ھەموو ئەو رێكار وەرگرتن وەك (دەرخستنا رێنمایان و فەرمانان) كو ھەموو مللەت پێگیربیت ژبۆ نەھێلانا بەڵاڤبوونا ڤێ دەریمەتێ. ئەڤ رێكارە ژی لایەنێ مادی بخۆڤە ناگرن، لێ گەندەڵیا بەڵاڤ ل دامودەزگەھێن حكوومەتێ بوو ئەگەرێ روودانا چەند كارێن نێگەتیڤ. وەك ل بەرواری (14/3/2020) ڤەگەڕیانا ھندەك كەسایەتیێن بەرنیاسێن ئاسایشێ و ئەندامێن پەرلەمانی یێن ئایینی و بازرگان ژ وەلاتێ ئەڵمانیا بۆ فڕۆكخانا ھەولێرە و پاش بۆ پارێزگەھا دھۆكێ، بێی ئەڤ كەسێن ھەنێ بھێنە گەرەنتیكرن بۆ ماوەیێ (14) رۆژان لدووڤ رێنمایێن حكوومەتێ. ئەڤ كارە وەسا دیاردكەت كو ئەو رێنمایی یە تنێ بۆ وان كەسێن بێ واستەنە و كەسێن خودان واستە ناگرن. ئەڤ رەفتار بۆ ئەگەرێ ھاتنا دەریمەتا كۆرۆنا بۆ پارێزگەھا دھۆكێ و بوو گەفەك ل سەر ژیانا ھەموو ھەڤوەڵاتیان. ھەڤوەڵاتیێن دهۆكێ ژ ئالیێ خۆڤە ئەو كەسێن نەھاتینە کەرەنتینكرن ریتورسواكرن، ب بەڵاڤكرنا ناڤ و وێنەیێن وان دھۆیێن راگەھاندنێدا. لێ ژ ئالیێ حكوومەتێڤە دڤێت وان و ئەو كەسێن ھاریكاریا وان كرین رادەستێ دادگەھێ بكەن دا سزایێ خۆ وەربگرن لدووڤ قانوونا عیراقی یا ساڵا (1969) ژمارە (111) مادەیا (368)دا بھێنە سزادان ب سزایێ نەزێدەتر ژ (3) ساڵان. چونكو وان كارەكێ دژی قانوونێ و بەرڤاژی رێنماییێن کەرەنتینكرنێ كر.

ئەڤەژی دبیتە ئەگەرێ بەڵاڤبوونا دەریمەتا كۆرۆنا كو بوویە گەفەك ل سەر ژیانا ھەڤوەڵاتیان ل پارێزگەھا دھۆكێ. ئەو كەسێن نەھاتینە کەرەنتینكرن دێ ب سزایا تاوانا (قوتانا دبیتە ئەگەرێ مرنێ) ھێنە سزادان ل دووڤ مادەیا (410) بۆ ماوەیەكێ نە ژ (15) ساڵان زێدەتر و دھێتە ھژمارتن ژ تاوانێن جینایاتان، چونكو ئەوان خۆ بەرھەڤكربوو و ھزرا پلانا سەرپێچیا قانوونێ و رێنماییان ب جھئینایە. ئەڤجا ئەگەر حكوومەتێ ئەو كەسێن ئاماژە پێكری رادەستێ دادگەھێ كرن دا سزایێ خۆ وەربگرن. ھنگی دێ زانین كو كەس دسەر قانوونێدا نینە. لێ لدووڤ بۆچوونا من ئەو رادەستێ دادكەھێ ناھێنەكرن، چونكو قانوون لنك وان یا بێ رێزە و ھەتا گەندەڵی یا چوویە دناڤ جھازێ قەزایێ ژی دا. چونكو داواكارێ گشتی رێكارەكێ پێتڤی بۆ ڤان سەرپێچكاران نەوەرگرتیە. ئەز دبێژمە ڤێ حكوومەتا گەندەڵ (سەركردە، بەرپرس، پەرلەمانتار، كەسایەتیێن ئاینی و…) ل ماوێ (29) ساڵان ھوون نەشیان دامودەزگەھێن حكوومی یێن چاكسازی ئاڤاكەن، ئێدی دەست ژ كارێ خۆیێ چاكسازیا ھەڤوەڵاتیان بەردەن و خۆ چاكبكەن. چونكو نەیا بەرئاقلە ھەوە جھازێن ئاسایشێ ھەبن و سەرپێچیا ھەوە بھێتەكرن ب واستە. ھوون ل سەر گاز و غازا روینن و ھەڤوەڵاتی مووچەیێ خۆ وەرنەگرن. ئەز باوەر دكەم پێخەمەتێ مانا دەستھەڵاتا خۆ دێ چەكی و ڤایرۆسان ژ دەرڤە كرن دا ھەڤوەڵاتیان پێ بكوژن.

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top