هەیامەکە ئەم هاتینە گوندی. پتریا دەمان بەرەڤاژی رێنمایێن تەندروستی، ئەم ژبۆ پاراستنا ساخلەمیا خوە و بهێزکرنا بەرگریا لەشێ خوە دەرکەڤینە دەرڤە. ئەم دچینە ناڤ قەرەبالەخیا سروشتی و تێکەلیا کەسکاتی، ئاخ، دار، کانی، رووبار، بەر، کەڤر، با و… هتد دکەین. هندەك جاران ژی ل گیایێن بوهارێ دگەرین و خوارنێن مە پێ ساخلەم و دەوڵەمەند دکەین. ب شەڤ ژی ئەم ئەڤ هژمارا دەسنیشانکری یا مرۆڤان پێکڤە کۆم دبین. هندەك بەحسا رۆژەڤا خوە دکەن، هندەك یاریان دکەن، هندەك دووڤچوونا نووچەیان دکەن، هندەك دخوینن و هندەك ژی شرینی و مژوولیێن شەڤێ دروست دکەن. ل دوماهیێ ژی شەڤبێریا خوە ب تەماشەکرنا نووترین فلم دەربازدکەین کو پتریا وان سەرهاتی و چیرۆکێن راستینە دەربارەی ژیانا ناڤداران، بوویەرێن دیرۆکی و داهێنانێن مرۆڤایەتیێ.
لێ ئەم هیڤیدارین کەسوکارێن مە یێن ل باژێری و خەلكێ هەمی باژێرێن وەڵاتی ژ مالێن خوە دەرنەکەڤن. بلا هەیامەکی دگەل خێزان و زارۆکێن خوە بن. ئەوێن هەڤالێن پەرتووکان بن ئەڤە باشترین دەرفەتە کو ل دیوانا وان بن. بۆ دۆستێن تەلەڤزیۆن و دەزگەهێن راگەهاندنێ ژی، ب سەدان کەنال هەنە کو خوە پێڤە مژوول بکەن. خوەشبەختانە ب رۆژ کارەبا نیشتیمانی و یا تایبەت تنێ دوو دەمژمێران دهێتە بڕین. ڤان کەناڵان ژی رۆژانە فلم و پرۆگرامێن نوو و مالباتی هەنە کو دشێن دەمێن خوە پێڤە ببوورینن و سوودێ ژێ ببینن. هەر کەسێ ژ نەچاری دەردکەڤیت ژی بلا نەچیتە دەستێ کەسێ و زوی ڤەگەریتە مال و دەستوچاڤێن خوە ب سابوونێ بشۆت. ژبەرکو کۆرۆنا مەترسییەکا هار و رژدە ل سەر هەمی مرۆڤان.
گرنگترین تشت ژی ئەوە خەلکێ وەڵاتی بزانن کو دڤێت پشتبەستنێ ل سەر شیانێن خوە و خوەپارێزیێ بکەن. ژبەرکو گەلەك جاران شیانێن حکوومەتێ دچارچۆڤێ بەڵاڤکرنا رێنماییاندانە. بلا کەس بەرێ خوە نەدەتە کورسی، سەروبەر و کۆچکێن سەرۆکاتیا حکوومەت و وەزارەتان کو ژ یێن هندەك دەولەتێن زلهێز جوانتر، رێکوپێکتر و مەزنترن. بەلکو دڤێت بەرێ خوە بدەنە ناڤەرۆکا دەستهەڵاتێ و شیانێن وێ کو ژ دەردێ نەخوەشییا گەندەڵیێ دنالیت. گەهشتییە ئاستەکێ وەسا نزم و خراب کو ئەڤ وەڵاتێ بچووك یێ رۆژانە ب سەدان هزاران بەرمیلێن نەفتێ دفرۆشیت، خەلك و رێکخراوێن خێرخاز خێران پێ دکەن؛ هندەك ئەمبولانسان بۆ دابین دکەن، هندەك ئاموورێن پزیشکی پێشکێش دکەن، هندەك نیشتەرگەریان بۆ نەخوەشێن وان دکەن، هندەك دەرمانان بۆ دئینن و هندەك بنگەهێن تەندروستی بۆ ئاڤادکەن. ب هەمان شێوە د وارێن دیدا ژی؛ بۆ نموونە هندەك رێکخراو و دەولەت قوتابخانەیان بۆ دروست دکەن، هندەك کەلوپەلێن چاندنێ بۆ دئینن، هندەك ئاڤا ڤەخارنێ بۆ دەردئینن و…هتد. ئەڤە ژبلی کو دەرفەتێن کاری بۆ ب هزاران گەنجان پەیدادکەن کو حکوومەتێ هێلاینە ل کۆلانان.
هەروەها دڤێت ژبیرنەکەین کو چین، ئیتالیا و ئیران ژ کەڤنترین دەولەتێن دنیایێ یێن خودان شارستانیەتن. وان گەلەك زانستێن پزیشکی، مرۆڤایەتی، سیاسەت و کارگێری نیشا دنیایێ داینە و نوکە ژ دەردێ کۆرۆنایێ دنالن. ئەڤجا خودێ نەکەت ئەگەر ئەڤ نەخوەشییە ب شێوەیەکێ مەزن ل وەڵاتێ مە بەڵاڤ ببیت. باوەرناکەین حکوومەتا مە بشێت بەرگریێ بکەت، ژبلی کو دەستێ خوە ل بەر رێکخراوێن خێرخاز، خەلکێ بیانی و دەولەتان پان بکەت هەتا یەك ماسکەکێ یان دژەڤایرۆسەکێ بدەتێ. ئەوژی دێ بۆ بەرپرسان و خزم و کەسوکارێن وان بیت. لەوما ئەم دێ هەر بێژین و بێژینەڤە؛ باشترین رێ و چارەسەری خوەپارێزییە. “رەشۆ ب دەستێن خوە” دا خەلك و خاکا مە ژ هەر نەخوەشییەکێ دووربن.