دونیا ئەو جیهانا بچیک ددەستێ مەدیایێ دا و ئامرازێن پێشکەفتیێن راگەهاندنێ وەکریە دزویترین دەمدا هەر بوویەر و روویدانەکا ل هەر جهەکێ دونیایێ روویبدەت ئەم ب شێوەیەکێ ئێکسەر ببینن یان ب شێوەیەکێ ب لەز بگەهینە راستیا روویدانێ، لێ جودا ژ ڤێ چەندێ مخابن ئەم خەلکێ کوردستانێ هندەک تەنگاسیان دڤێ چەندێ دا دبینن هەتا بگەهین راستیا بابەتان، ژبەر کو مە فەوجەکا رۆژنامەیان و کۆمارەکا تیڤیان و باژێرەکێ رادیو و مالپەر و دیجیتال مەدیایێن ئەلیکترۆنی هەیە و هەر ئێک ژ ڤان ل ژێر فشارێن ئایدۆلۆژیەکێ و حزبەکێ و کەسایەتیەکێ سیاسی و بزنزمان روویدانا پەخش دکەن و ئاستێ چەواشەکاریا بینەر و بیسەر و خواندەڤانێن میدیایا کوردی گەهشتیە وی رادەی ئێدی باوەری دناڤبەرا خەلکێ و مەدیایا کوردی دا نەمایە. گەلەک جاران ئێک روویدان چ ل سەر ئاستێ ناڤخوە یان دەرەکی ب چەندین شێوازێن جودا جودا د مەدیایا کوردیدا دهێتە پەخش کرن و هەر دەزگەهەک ل دیڤ حەزا خوە خواندنێ ددەتە روویدانێ و خەلک دێ کەڤیتە دوودلیێ و ب زەحمەتە بگەهیتە راستییا بابەتی. ئەڤەژی بو وێ چەندێ دزڤریت یاسایا کارێ رۆژنامەڤانی ب دروستی ل ڤێرێ ناهێتە جێبەجێکرن و ب سەدان مالپەرێن وەهمی د سۆشیال میدیایێ دا کاردکەن بێ مۆلەت و سەروشوێنن رۆژانە هەوالێن بێ بنەما بەلاڤ دکەن و چەواشەکاریێ دکەن و مەدیایا بازرگانی ئەڤا ب تنێ کارێ مەدییایی وەک بزنز دبینیت و دیر ژ ئەتێتێن رۆژنامەڤانی ب شێوەیەکێ نەبەرپرسیارانە کاردکەت و ململانا دژوارا حزبی ژی وەکریە پتریا کەنالێن کوردی سیبەربن و روویدانا دبەرژەوەندا حزبا خوە دا پەخش بکەن هتد … وەکریە ئێدی بینەرێ کورد نەگەهیتە راستیا وان بوویەر و روویدانێن دبنە روۆژەڤ دژیانا مەدا و ئاستێ باوەریێ دناڤبەرا میدیا کوردی و بینەرێ وێ دا بگەهیتە خالا سفرێ.
هەر ژ راگەهاندنا خشتەیێ مووچەیی بگرە تا دگەهیتە پرسێن ئاسایشا نەتەوەیی چەواشەکاری و درەو جهێ خوە دمەدیایا کوردی دا دکەت. ئەڤەژی فەوزایەکا ئالۆز دجادەیا کوردی دا پەیدادکەت، گەلەک فەرە دیڤچوون بۆ وان سایت و مالپەرێن وەهمی بهێتەکرن و بهێنە ژناڤبرن و یاسایا کارێ رۆژنامەڤانی و رێکخراو و سەندیکایێن کارێ رۆژنامەڤانی کار ل سەر هندێ بکەن هەر دەزگەهەکێ چەواشەکاریێ بکەت بدەنە دەست دادگەهێ و نەهێلن دەستێن تێکدەر و چەواشەکار جهێ خوە د مەدیایا کوردی دا بکەن دا جارەکا دی باوەریا دناڤبەرا بینەر و بیسەر و خواندەڤانێن مەدیایا کوردی بزڤرینن. ئەز دێ ڤێ گوتارێ ب گوتنەکا مەزنە نڤیسکارێ ئیتالی ماکیافیلی ب دۆماهیک ئینم دبت مەرەم ژڤێ گوتنێ پتر سیاسی بت لێ تەمام ل سەر مەدیایا کوردی دگونجیت دەمێ دبێژیت (نە مەرجە ئەو وێنەیێن ئەم دبینن راست بن یان خواندنا مە بو وان روویدانێن روویددەن دروست بیت، دبیت ل پشت وان وێنەیان هندەک وێنەیێن دی هەبن یان هندەک مەبەستێن دی ل پشت وان روویدانان ڤەشارتی بن).
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)