ئالۆزیێن عێراقێ هەرێم ژ خەو راکر

ل دەستپێکا وان خۆنیشاندانێن خەلکێ عێراقێ ل دەڤەرێن جودا جودا یێن عێراقێ دهاتنە ئەنجامدان هیچ کارتێکرنەک نەبوو ل سەر حکومەتا عێراقێ ئەوا نوکە هەرێم ژی پالپشتیا وێ دکەت. بەلێ پشتی ئەڤ خۆنیشاندانە رۆژ ب رۆژ بەرفرەهتر لێ هاتین و بوونە گەفێن مەترسیدار ل سەر حکوومەتا عێراقێ، ئێدی حکوومەت نەچاربوو بڕیارێن بلەز بۆ باشترکرنا بارودۆخێ وەلاتیێن عێراقی بکەت. بەلێ وەکو دیار یا بێ مفا بوو. ئەڤ چەندا ل بەغداد و دەڤەرێن جودایێن عێراقێ رویدای ئێدی بوونە مەترسی ل سەر هەرێما کوردستانێ ژی. لەورا دڤان رۆژاندا چەند دەرمانێن مسەکن ب سەر وەلاتیێن هەرێما کوردستانێ دا هاتنە بەلاڤ کرن، ئەو ژی ( کۆمبوونێن لایەنێن سیاسی یێن هەرێما کوردستانێ بوو کو هەمی پێکڤە د ئێک دەم و جهـ دا کۆم بوون ب تنێ دا بۆ خەلکێ خۆ بدەنە دیارکرن کو کورد ئێک دەنگن و بەغداد کێمتەر خەمە. هەروەسا دامەزراندنا چەندین نۆژداران و مامۆستایێن گرێبەست کو ئەڤ چەندە ژی دبیتە ئەگەرێ بێدەنگکرنا بهزاران وەڵاتیان)، ئەڤ کار و بڕیارێن حکوومەتا هەرێما کوردستانێ دڤی دەمیدا وێ چەندێ دگەهینیت کو ترسەک هەیە ل هەرێما کوردستانێ ژی ئەڤ چەندە روی بدەت.

بەلێ هیڤیدارین ئەڤ چەندە ب شێوێ بەغداد روینەدەت، ب تنێ ببیتە کارتەکا فشارێ ل سەر حکوومەتا هەرێما کوردستانێ ب تایبەت کابینەیا نوی بڕیارێن خۆ بکەتە کریار و ئەڤ دەرمانێن مسەکن ببنە دەرمانێن هەمیشەیی بۆ چارەسەرکرنا کێشە و کێموکاسیێن وەلاتیێن هەرێما کوردستانێ. ژلایەکێ دیڤە ئەڤ بڕیار و کریارێن حکوومەتا هەرێما کوردستانێ دبنە هندەک خالێن بهێز بۆ رازیکرنا وەلاتیێن هەرێما کوردستانێ ژ کابینەیا نوی و بانگەشەیەکە بۆ کابینەیەکا دی، لێ دەما وەلاتی مفادار دبن ب خزمەت دهێتە پێناسەکرن ئەگەر ئەڤ خزمەتە یا دویربیت ژ بەرژەوەندیێن حزبی، چونکی دڤان پرۆساندا ب تایبەت (دامەزراندن) لایەنێن حزبی ب دەلیڤە دبینن کو پێشینە بۆ رێکخستی و کادرێن وان بیت، ب ڤی شێوەی ژی هیڤی و ئۆمێدێن وەلاتی بەرەف ئاقارەکێ نەدیار دچن.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top