دڤان رۆژاندا دگەل کێ باخڤی و گوهدارییا هەر کەس و سازییەکا کوردی بکەی، گەلەک ب سادە، سڤک و سانەهی دێ بێژن: “پشتی رۆژئاڤا کوردستانێ گەرا باشوورە!” ئانکو پلانا دەستهەڵاتدارییا تورکی ئەوە پشتی سەرکەفتنا ئۆپەراسیۆنا وان یا سەربازی یا ب ناڤێ “کانیا ئاشتیێ” ل رۆژئاڤا، ئەو دەولەتا مەزن و ئەنداما مەزنترین هەڤپەیمانیا سەربازی (ناتۆ) دێ بەرێ چەك و سەربازێن خوە دەتە باشوور دا بێخیتە بن کۆنترۆڵا خوە! ئەڤە ژی بێگومان دیتن و پێشبینییەکا گەلەك مەترسیدارە ل سەر هەمی گەلێ کورد و کوردستانێ ب پلەیا یەکەم و پاشی ل سەر رۆژهەڵاتا ناڤین و هەمی جیهانێ ژی. لێ کەس نابێژیت کا چ بهێتە کرن دا خوە ژ ئەگەرا بجههاتنا ڤێ پێشبینیێ ب پارێزین، یان چ بەرهەڤی و ئامادەکاری بۆ بەرگریێ دباشن، یانژی ئەرکێ تاک، جڤاک، گەل و دەستهەڵاتێ چییە بۆ ڤێ قۆناخێ و قۆناخا داهاتی؟!
ل ڤێرە ئەم دبێژین مادەم پشتی رۆژئاڤا و سووریێ گەرا باشوورە، واتە دڤێت هەمی هەوڵدان بهێنە کرن کو شەرڤانێن کورد ل رۆژئاڤا بەردەوامبن ل سەر بەرگریێ و نەراوەستن و ب سەرکەڤن، دا کو پلانا تورکی (یا کو بەحس ل سەر دهێتە کرن)، سەرنەگریت یانژی ب کێماتی بۆ ڤێ قۆناخێ هێڕشا تورکیا بۆ سەر باشوور گیروببیت. ئەڤ رەوشە ژی بۆ مە لایەنەکێ دی یێ گرنگ ژ ڤی شەڕی رۆنتردکەت کو دبیت هندەك کورد ب سڤکی بەرێ خوە ددەنێ یانژی نەڤێت بەحس ل سەر بکەن. ئەوژی ئەوە کو بەرگرییا شەرڤانێن کورد ژ رۆژئاڤا ب شێوەیەکێ راستەوخۆ و نەراستەوخۆ دبیتە بەرگری ژ باشوور ژی! ئەڤجا مادەم رەوش ئەڤەیە واتە پێویستە ئەڤرۆ بەری سوبە هەمی تاک و سازییێن ڤی وەڵاتی (ب تایبەت ل باشوور) بەرەیێن شەڕی دگەل تورکیا ل هەر دەم و جهەکی مەزن و بەربەڵاڤکەن، دا هێڕشا وێ یا ل سەر رۆژئاڤا سست بکەن و دا نەهێلن پلانا وێ یا ل دژی باشوور و پارچەیێن دیژی بهێتە جێبەجێکرن!
لێ بۆچی هەتا نوکە ئەم تشتەکی بەرچاڤ دپراکتیکێدا نابینین؟! ئایا مەترسی وەسا نینە وەکی ژێ دبێژن، یان زانین و شیانێن مە نینن یانژی باشترە ئەم خوە بگرین هەتا شەڕ بهێتە بەر دەرازینکا مالا مە ل باشوور؟! بەرسڤا دروست یا ل دەف خودانێن هێز و بڕیارێ!