رەوشا تەندروستی ل ھەرێما كوردستانێ زۆر نەیا باشە ئەگەر بھێتە بەراوردكرن دگەل دەولەتێن ھەڤسویێن ھەرێمێ و تا دەولەتێن تازەگەشەدكەن ژی، ب تایبەت رەوشا نەخۆشێن تووشی ئێشا پیس و دلی و گولچیسكان بووین و ھندەك دۆخێن زارۆكبوونێ ئەوێن پێتڤی نەشتەگەریا قەیسەری ھەی. ئەگەرێ ڤێ چەندێ ڤەدگەریێت بۆ كێمبوونا پارەیێن تەرخانكری بۆ كەرتێ تەندروستی ژ ئالیێ حكومەتا ھەرێما كوردستانێڤە ھەر ژ ساڵا (1992) و تا نھا. ھەر ژ پێكئینانا نەھ كابینەیێن حكومی پشتی ساڵا (1991) و تا نھا وان حكومەتان رەوشا تەندروستی بەرچاڤ وەرنەگرت وەك گرنگترین كار. ئەڤەژی بۆ ئەگەر سیستەمێ تەندروستی بەرەڤ نەباشیێ بچیت و ئاستێ وێ ژ ئاستێ دەولەتێن تازەگەشەدكەن نزمتربیت، ئەوژی ژبەر لاوازیا چاڤدێریێ و گرنگینەدانا ب نەخۆشان و كێماسی د دەرماناندا و زێدەباری وی پارەیێ ژ وان كەسان وەردگرن ئەوێن سەرەدانا نەخۆشخانەیێن حكومی دكەن. وەك پارەیی كارتا سەرەدانا نەخۆشخانەیا حكومی دەمێ سپێدێ ب (500) دینارانە و دەمێ ئێڤاری ب (2000) دیناران. ئەڤەژی بۆ ئەگەرێ پەیدابوونا نەخۆشخانەیێن ئەھلی خزمەتێن تەندروستیێن باش و دەرمانێن باش و كادرێ پزیشكیێ باش و شارەزاییەكا باش و ئامیرێن پزیشكیێن زۆر باش بۆ نەخۆشیان دابیندكەن. لێ بەرامبەر ڤێ خزمەتێ كوژمەیەكێ زۆرێ پارەی ژ نەخۆشان وەردگرن.
پرسیارا من حكومەت نەشێن خزمەتگوزاریێن باش ل نەخۆشخانێن حكومی پەیدابكەت، لێ بازرگانەك دێ شێت نەخۆشخانەیەكا پێشكەفتی دانیت؟ ئەڤەژی وەدكەت خەلكێ ھەژار بەرەڤ نەخۆشخانەیێن حكومی بچن، لێ كەسێن دەولەمەند سەرەدانا نەخۆشخانێن تایبەت دكەن و خزمەتگوزاریێن زۆر باش بدەست وان دكەڤن. بۆ زانین ھندەك كادرێن پزیشكی ھەنە ل نەخۆشخانەیێن گشتی رادبن ب پێشكێشكرنا خزمەتگۆزاریان ل نەخۆشخانەیێن تایبەت ب كوژمێن مەزنێن پارەی، نموونە بۆ ڤێ چەندێ ئەنجامدانا نەشتەگەریەكا قەیسەری ل نەخۆشخانەكا حكومی دێ ب كوژمەكێ كێمێ پارەی بیت، لێ دبیت دور پشتی چەند ھەیڤان بگەھیتە نەخۆشی و ھەر ئەو پزیشك دێ نشتەگەریا قەیسەری ل نەخۆشخانەكا تایبەت كەت و دبیت ھەر د دوێ رۆژێدا ب كوژمێ (750000 یان 1000000) دیناران. یا ژڤێ خرابیتر ھندەك جھێن راگەھاندنێ رادبن ب پالدانا وەڵاتیان بۆ سەرەدانا نەخۆشخانەیێن توركی یان ئیرانی. ئەڤەژی بەڵگەنە بۆ ھەرفتنا سیستەمێ تەندروستی ل ھەرێمێ ژ ئەنجامێ گەندەڵیا كارگێڕی د كەرتێ تەندروستیدا ژبەر لاوازیا مەزاختنا حكومەتێ و لاوازیا زێرەڤانیا حكومی و ڤەشارتنا گەندەڵیێ ب تایبەت سەبارەت دەرمانان ئەوێن دھێنە ھەرێمێ ب رێكێن نە قانوونی دا سیستەمێ تەندروستیێ گشتی بھێتە ڤەگوھاستن بۆ سیستەمێ تەندروستیێ تایبەت و پارەیێن وان بچیتە بەریكێن گەندەڵكاران.