سەرەدانا (سەزاى تەمەللى) هەڤسەرۆکێ هەدەپێ و شاندێ دگەل دا ل 8 ى ئەیلولا سالا 2019 بۆ هەرێما کوردستانێ و کومبون دگەل سەرکردێ کورد (مەسعود بارزانى)، سەرۆکێ هەرێما کوردستانێ (نێچیرڤان بارزانى)، سەرۆک وەزیرێن هەرێما کوردستانێ (مەسرور بارزانى) ل هەولێرا پایتەخت بو گفتوگوکرن ل سەر چەندین پرسگرێکێن جودا جودا یێن گرێداى رەوشا کوردان، ئەڤ سەرەدانە دهێتە هژمارتن ئێکەمین سەرەدانا شاندێ هەدەپێ پشتى پێکئینانا حکومەتا نوى یا هەرێما کوردستانێ، ئارمانجا شاندێ هەدەپێ ڤەدگەریتەڤە بو سێ ئارمانجان، ئارمانجا ئێکێ ژ هاتنا شاندێ هەدەپێ بو مەرەما پیرۆزباهیکرن ل سەرۆکێ هەرێما کوردستانێ و سەرۆک وەزیرێن هەرێما کوردستانێ و سەرۆکاتیا پەرلەمانێ کوردستانێ، ئارمانجا دووێ مەرەما چەوانیا دروستکرنا ئێکەتیا کوردان ل هەر چار پارچێن کوردستانێ کو باشوور ب ئەڤى ئەرکێ مەزن رۆلێ خوە بگێریت، ئارمانجا سیێ داخازا پشتەڤانیا کوردێن باشوور ژ بۆ کوردێن باکوور د ڤەگەراندنا قوناغا ئاشتیێ ل ناوچەیێن باکوور.
د کۆمبوونا شاندێ هەدەپێ د گەل سەرۆکێ هەرێما کوردستانێ (نێچیرڤان بارزانى) مژارا قوناغا ئاشتیێ هاتە باسکرن، سەرۆکێ هەرێما کوردستانێ دا دیارکرن کو نوکە دەما ئاشتیێ یە و پرسگرێکا کوردان پێدڤیە د رێکا ئاشتیێ دا بهێتە چارەسەرکرن، هەروەسان دیارکر کو شەر چ ئاریشەیان چارەسەر ناکەت و نابیت چ دەرفەتێن ئاشتیێ ل تورکیا بهێنە ژ دەست دان، ژ بۆ دەستپێکرن و سەر ئێخستنا پرۆسەیا ئاشتیێ ل تورکیا دێ د پێکۆلێن بەردەوام دا بین و هەر چ ژ دەستێ مە بهێت دێ ئەنجام دەین، ل ڤێرێ بۆ مە دیار دبیت رۆلێ سەرۆکێ هەرێما کوردستانێ (نێچیرڤان بارزانى) وەک سەرکردەکێ گرنگ ل ناوچێ رۆلەکێ ئێکجار مەزنە د چەسپاندنا ئاشتیێ ل تەڤایا ناوچێ، لەوران ئەڤ چەندە بوویە ئەگەر کو گەلێ کورد ل باکوور داخازا دەستپێشخەریا ئاشتیێ ل سەرۆکێ هەرێما کوردستانێ (نێچیرڤان بارزانى) بکەن، د باوەریەکا مەزن دانە کو دێ قوناغا ئاشتیێ ب پشتەڤانیا سەرۆکێ هەرێما کوردستانێ هێتە دەستپێکرن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
