دبیت مللەتێ کورد ئێک بن ژ وان مەزنترین مللەتێن جیهانێ کو رووبروویێ تەعدا و نەخوەشی و قوربانیدانا جینۆساید و ئەنفالان بوونە. دەمێ ئەم بەرپەرێن دیرۆکێ ڤەددەین و ئەنفال و کیمیاباران و کۆمکوژیان دخوینن و دبینین، ب نێرین و حێبەتی دپرسین گەلۆ ئەڤە چ هۆڤاتی بوویە ڤان دڕندان هەمبەری مە کری، چەوا ئەڤ هەمی تشت چێبوونە؟ پشتی ئەڤان گهۆرینا جیهانی و سەردەمێ مۆدێرن کێم جارا د مەژیێ هند کەسان دا هاتیە ل ڤێ جیهانێ و ل سەدێ بیست و ئێک و جیهانا گلۆبال کارەساتەکە هوسا مەزن چێببت. ئەڤ جینۆساید و رەشەکوژیا ل شنگالێ چێبووی بۆ جیهانا مۆدێرن و پێشکەفتنا نها جهێ پرسێ یە. بۆ نڤشێ نوکە کارەساتا شنگالێ دبیت کو مەزنترین کارەسات بیت، چونکی بوویەرێن ئەنفالان تنێ مە بیهستیه و ب رێکا دیکومێنتاری دیتیە، وەلێ بوویەرا شنگالێ چونکی مە ب چاڤێن خوە دیتیە و د سەردەمێ ژیانا مە دا بوویە. لەو ب باندۆرترین و تراژیدیترین کارەسات دبینن کو دەرحەقێ گەلێ کورد هاتبیتە کرن. ئیرۆ جڤاکا ئێزیدیان پێدڤی گرنگی پێدانێنە، چونکی پرانیا وان د ناخێ خوە دا شکەستینە و هەست ب تشتەکی دکەن کو ژلایێ وان چوویە. لێ پاقژیا کچ و ژنێت وان ژ رهـ و ئیدۆلۆجیستان پاقژتر و وێرەک ترەژی.
لەو ئەم ب فەر و پێدڤی دبینن کو سەرەدەریەکا تایبەت د گەل جڤاکا ئێزیدیان و ئۆل و بیروباوەریا وان هەتا کورداتیا وان ژی بهێتە کرن. مۆرالێ وان بلند بکەن و ناڤچەیێن وان ژی جودا ژ دەڤەرێن دن ب گرنگی بهێتە تەمەشاکرن و ئاڤەدانکرن. ب راستیژی هند کەس هەنه کو گرنگی و ئەڤان حالەتان بەرچاڤ وەردگرن نەخاسمە سەرۆکێ هەرێمێ و ب تایبەت ژی د گووتارا خوەی خەمگینیێ سەخمەراتی سالڤەگەڕا کارەساتا شنگالێ ب قەولەکی ئیزیدیان دەست پێکر و ب قەولەکە دن دوماهیک ب ئاخفتنا خوە ئینا، هەروەسا گەلەک پەسنا لالش و مەزارگەها شەرفەدین کر، ب ئاشکرا دیاربوو کو گرنگیدانەکا تایبەت بوو بۆ ئێزیدیان ژلاێی ئۆلی و باوەرێی ڤە. هەروەسا ژلایێ جڤاکی ژی پتر ژ دووجاران تەکەز ل سەر کوردستانیبوونا ئێزیدیان کر و گۆت کوردستان بێی ئێزدی نابت و ئێزیدیژی بێ کوردستان نابیت. ئەڤ گرنگیپێدانا نێچرڤان بارزانی ب بیرو هزرێن جوودا و نەخاسمە ئێزیدیان، دەنگەکی باش و دلخۆشکەر بوویە بۆ وان. چونکی بارزانی ب ئاوایەکی پراکتیکی دناڤا پرۆسەیا بزاڤا باشترکرنا ژیان و رزگارکرنا واندا بوو یان بوویە. ب شێوەیەکی هەر ل دەمێ کارەساتا شنگالێ، رابوون ب ڤەکرنا (نڤیسینگەها کاروبارێن رەڤاندیان) کو راستەراست گرێدای نڤیسینگەها نێچیرڤان بارزانی یە. و کار ل سەر کریە تانها 2225 کچ و ژن و 1284 کوڕ و زەلام هاتنە رزگاکرن و دلنیایی دا بۆ کارکرنا بەردەوام. کوردستان مالا هەمی پێکهاتێن ئۆلی و مەزهەبی و نەتەوانە. ب راستیژی ئێزیدیاتی ل ئاوارەیی و وەلاتێن دەرڤە ناهێتە کرن و پاراستن، بەلێ پێدڤیە جهـ و وارێ ژیارا وان بهێتە ئاڤەدانکرن و ژیانەکا ژهەژی بۆ بهێتە دابینکرن؛ دوور ژ هەڤرکیێن ناڤخوەیی و ئیقلیمی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)